ގްރީޒްމަންގެ ދެލަނޑުން ދުނިޔޭގެ ޗެމްޕިއަން ޖަރމަނީ ބަލިކޮށް ޔޫރޯ ފުޓްބޯޅަ މުބާރާތުގެ ފައިނަލުން ފްރާންސް ޖާގަ ހޯދައިފިއެވެ. މުބާރާތް ބާއްވާ ޤައުމު ފްރާންސް ސެމީ ފައިނަލް މެޗް ކާމިޔާބުކުރީ ދެލަނޑު ސުންލަނޑުންނެވެ.
މެޗްގެ ފުރަތަމަ ލަނޑު ގްރީޒްމަން ކާމިޔާބުކޮށްދިނީ ފުރަތަމަ ހާފްގައި ލިބުނު ޕެނަލްޓީއަކުންނެވެ. ގްރީޒްމަން ދެވަނަ ލަނޑު ދެވަނަ ހާފްގައި ކާމިޔާބުކޮށްދިންއިރު މިލަނޑާއެކު އޭނާ މިފަހަރުގެ ޔޫރޯގައި ޖެހި ގޯލްގެ އަދަދު ވަނީ ހަޔަކަށް އަރާފައެވެ. މެޗްގައި ގިނަ ވަގުތު ބޯޅަ ހިފަހައްޓައިގެން ކުޅުނު ޖަރުމަނަށްވެސް ވަނީ ލަނޑު ޖަހާނެ ރަނގަޅު ފުރުސަތުތަކެއް ލިބި ބޭކާރުވެފައެވެ.
މިއީ 1958 ވަނަ އަހަރުގެ ފަހުން ފްރާންސް ބޮޑު މުބާރާތެއްގައި ޖަރމަނީ އަތުން މޮޅުވި ފުރަތަމަ ފަހަރެވެ. ފައިނަލްގައި ފްރާންސް ވާދަކުރަން ޖެހޭނީ ވޭލްސް ބަލިކޮށް ފައިނަލުން ޖާގަ ހޯދި ޕޯޗްގަލްއާއެވެ. މިމެޗް ކުޅޭނީ އަންނަ އާދިއްތަ ދުވަހުގެ ރޭ ބާރަ ޖަހާއިރުއެވެ.