ޖަރުމަންގެ ބަޔާން މިއުނިކުގެ ގޯލްކީޕަރު މެނުއަލް ނޯޔާއަށް އަނެއްކާވެސް އަނިޔާވެއްޖެއެވެ.
މި ފަހަރު އޭނާގެ ކުޑަކަޅުވާ އަށް އަނިޔާވީ މި މަހުގެ ކުރީކޮޅު ލިބުނު އަނިޔާ އަށް ފަރުވާ ކުރުމަށްފަހު އަލުން ޕްރެކްޓިސް ކުރަން ފެށުމާއެކުގަ އެވެ.
ބަޔާން މިއުނިކުން ނެރުނު ބަޔާނުގައި ބުނެފައިވަނީ މި އަނިޔާގެ ސަބަބުން ނޯޔާ އަށް އިތުރު މުއްދަތެއްގައި ނުކުޅެވި ހުންނަން ޖެހިދާނެ ކަމަށެވެ.
މިހެންވެއްޖެނަމަ އުމުރުން 38 އަހަރުގެ ކީޕަރަށް މި މަހުގެ 29ގައި ޖަރުމަނު ލީގުގައި ޕައުލީއާ ދެކޮޅަށް ކުޅޭ މެޗާއި ޔޫރަޕިއަން ޗެމްޕިއަންސް ލީގުގެ ކުއާޓާ ފައިނަލުގައި އަންނަ މަހުގެ ކުރީ ކޮޅު އިޓަލީގެ އިންޓަމިލާނާ ދެކޮޅަށް ވެސް ނުކުޅެވިދާނެ އެވެ.
ނޯޔާ އަނިޔާވިއިރު ބަޔާންގެ ބަދަލު ކީޕަރު އުމުރުން 21 އަހަރު ޖޯނަސް އަށް ވެސް ވަނީ އަނިޔާވެފަ އެވެ. އެނަގެ ފައިތިލަ އަށް ލިބިފައިވާ އަނިޔާގެ ސަބަބުން ޖަރުމަނުގެ 21 އަހަރުން ދަށުގެ ޓީމު މި ހަފުތާގައި ކުޅުނު އެކުވެރިކަމުގެ މެޗަށް ޖޯނަސް އަށް ނޭރުނެވެ.
މި ދެ ކީޕަރުންނަށް އަނިޔާވެފައިވާއިރު ބަޔާންގައި ދެން ތިބީ އިޒްރޭލުގެ ކީޕަރަކާއި ޖަރުމަނުގެ ޒުވާން ކީޕަރެކެވެ. ބަޔާން މިވަގުތު އޮތީ ބުންޑަސް ލީގާގެ ތާވަލުގައި ދެ ވަނާގައިވާ ޗެމްޕިއަން ބަޔާ ލެވަކޫސަން އަށް ވުރެ ހަ ޕޮއިންޓް ކުރީގަ އެވެ.