ފްރާންސް ބަލިކޮށް ޔޫރޯ ފުޓްބޯޅަ މުބާރާތުގެ ޗެމްޕިއަންކަން ޕޯޗްގަލް ހޯދައިފިއެވެ. ފައިނަލް މެޗް ޕޯޗްގަލް ކާމިޔާބުކުރީ އެއްލަނޑު ސުންލަނޑުންނެވެ.
މެޗްގެ ހަމައެކަނި ލަނޑު މެޗްގެ ފުރިހަމަ ވަގުތު ހަމަވެގެން ކުޅުނު އިތުރު ވަގުތުގެ ދެވަނަ ހާފްގައި ޕޯޗްގަލްއަށް ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން ނުކުތް އެޑާއެވެ. މިމެޗްގެ ފުރަތަމަ ހާފްގެ ވަރަށް ކުރީކޮޅު އަނިޔާގެ ސަބަބުން ޕޯޗްގަލްގެ ކެޕްޓަން ކްރިސްޓިއާނޯ ރޮނާލްޑޯ ވަނީ ބަދަލުކޮށްފައެވެ. މެޗްގައި ޕޯޗްގަލްއަށް ލަނޑު ޖަހަން ލިބިފައިވަނީ މަދު ފުރުސަތުތަކެކެވެ. ނަމަވެސް ފްރާންސަށް މުޅި މެޗްގައި ލަނޑު ޖަހަން ގިނަ ފުރުސަތުތަކެއް ލިބުނުކަން ފާހަގަކޮށްލެވެއެވެ.
މިތަށި ވެފައިވަނީ ޤައުމީ ޓީމާއެކު ޕޯޗްގަލް ކެޕްޓަން ކްރިސްޓިއާނޯ ރޮނާލްޑޯ ހޯދި ފުރަތަމަ ތައްޓަށެވެ. މުބާރާތުގެ އެންމެ މޮޅު ޒުވާން ކުޅުންތެރިއަކަށް ހޮވުނީ ޕޯޗްގަލްގެ 18 އަހަރުގެ ރެނާޓޯ ސަންޗޭޒްއެވެ. އެންމެ ގިނަ ލަނޑު ޖަހާ ކުޅުންތެރިއަކަށްދޭ ރަން ބޫޓް ލިބުނީ ފްރާންސްގެ ގްރީޒްމަންއަށެވެ. ގްރީޒްމަން ވަނީ މިފަހަރުގެ ޔޫރޯގައި 6 ލަނޑު ޖަހާފައެވެ. ފައިނަލް މެޗްގެ މޮޅު ކުޅުންތެރިއަކަށް ހޮވުނީ ޕޯޗްގަލްގެ ޑިފެންޑަރ ޕެޕޭއެވެ.
މީގެ 12 އަހަރު ކުރިން 2004 ވަނަ އަހަރުގެ ޔޫރޯ ފައިނަލުން ޕޯޗްގަލް ބަލިވީ ގްރީސް އަތުންނެވެ. މިއީ ޕޯޗްގަލް ޔޫރޯ ފުޓްބޯޅަ މުބާރާތް ކާމިޔާބުކުރި ފުރަތަމަ ފަހަރެވެ.