އޭއެފްސީ އޭޝިއަން ކަޕް ކޮލިފައިންގައި ރާއްޖެއާ ދެކޮޅަށް ކުޅޭ މެޗު ބެލުމަށް ފިލިޕީންސް ސަޕޯޓަރުންނަށް ހިލޭ ޓިކެޓު ދޭން ނިންމައިފިއެވެ.
ފިލިޕީންސް ފުޓްބޯޅަ ފެޑަރޭޝަނުން ނިންމާފައިވަނީ އަންނަ އަންގާރަ ދުވަހު ކުޅޭ މި މެޗަށް ދަނޑުގެ މަތީ ސްޓޭންޑްގައި ޖަހާފައިވާ ޓިކެޓްތައް ހިލޭ ދޫކޮށްލުމަށެވެ. މިއީ ދާދި ފަހުން އެ ގައުމުގެ ބޭންކާއެކު ސޮއިކުރި ސްޕޮންސަރޝިޕް އެއްބަސްވުމުގެ ތެރެއިން ފުޓްބޯޅައިގެ ކުރިއެރުމަށް ކުރަން ނިންމު ކަންތައްތަކުގެ ބައެއް ކަމަށް ވެސް ފިލިޕީންސް ފުޓްބޯޅަ އެސޯސިއޭޝަނުން ބުނެ އެވެ.
ރާއްޖެ އާއި ފިލިޕީންސްގެ މެޗު ކުޅޭ ކަޕަސް ޓާލަކްގައިވާ ސްޕްރޯލިން ނިއު ކްލާކް ސްޓޭޑިއަމުގަ އެވެ. ފިލިޕީންސްގައިވާ މަލްޓިޕާޕޯސް މި ތަނަނީ 20000 މީހުންނަށް ކުޅިބަލަން ތިބެވޭ ސްޓޭޑިއަމެކެވެ. ދަނޑުގެ މަތީބަރީގައިވާ ގޮނޑިތަކަށް ސަޕޯޓަރުން ހިލޭ ދޫކޮށްލުމުން ގާތްގަނޑަކަށް 10000 ވަރަކަށް މީހުން ހިލޭ ކުޅިބަލަން ވަންނާނެ އެވެ. ފިލިޕީންސް ފުޓްބޯޅަ ފެޑަރޭޝަނުން ނިންމާފައިވަނީ ދަނޑުގެ ތިރީބަރީގައިވާ ގޮޑިތައް 450 ފިލިޕީންސް ޕެސޯ އަށް ވިއްކާލުށެވެ. ދިވެހި ރުފިޔާއިން މިއީ ޓިކެޓަކަށް 120 ރުފިޔާ އެވެ. ވީއައިޕީ ޓިކެޓްތައް ވިއްކަން ހަމަޖައްސާފައިވަނީ 201 ދިވެހި ރުފިޔާ އަށެވެ.
ރާއްޖެއާ ދެކޮޅަށް ކުޅެން ފިލިޕީންސް ތައްޔާރުވާއިރު އެ ގައުމުގެ ގިނަ ކުޅުންތެރިންތަކަކަށް ވަނީ އަނިޔާގެ މައްސަލަ ކުރިމަތިވެފައި ކަމަށް ޓީމުގެ މެނޭޖަރު ފްރެޑީ ގޮންޒާލޭޒް ބުންޏެވެ.
ރާއްޖެ ވަނީ މި މެޗަށް ތައްޔާރުވުމަށް އިންޑިޔާއާ އެކު އެކުވެރިކަމުގެ މެޗެއް އެ ގައުމުގެ ޝިލޮންގްގައި ކުޅެފަ އެވެ. މި މެޗުން ރާއްޖެ ބަލިވީ 3-0އިންނެވެ. ފިލިޕީންސް އެންމެ ފަހުން މެޗެއް ކުޅެފައިވަނީ މިދިޔަ ޑިސެމްބަރު މަހު ތައިލެންޑާ ދެކޮޅަށެވެ. މި މެޗުން ފިލިޕީންސް ބަލިވީ 3-1އިންނެވެ.
ސައޫދީ އަރަބިއާގައި 2027 ވަނަ އަހަރު ބާއްވާ އޭޝިއަން ކަޕުގެ ކޮލިފައިން ރާއްޖެ ހިމެނެނީ ގްރޫޕް އޭގަ އެވެ. މި ގްރޫޕުގައި ހިމެނެނީ ތަޖިކިސްތާނާއި ޕިލިޕީންސް އަދި ރާއްޖެ އާއި ޓިމޯ ލެސްޓާ އެވެ.
ރާއްޖެ އާއި ފިލިޕީންސް ވަނީ މިހާތަނަށް ފަސް ފަހަރު ބައްދަލުކޮށްފަ އެވެ. މީގެ ތެރެއިން ރާއްޖެ މޮޅުވީ 2009 ވަނަ އަހަރު މާލޭގައި ކުޅެގެންނެވެ. އޭގެ ފަހުން ކުޅުނު ތިން މެޗުން ބަލިވިއިރު އެންމެ ފަހުން ކުޅުނު މެޗުވީ އެއްވަރެވެ.