ބްރެޒިލްގެ ޑިފެންޑަރު ގެބްރިއަލްއަށް ލިބިފައިވާ އަނިޔާގެ ސަބަބުން މި ސީޒަނުގައި އޭނާއަށް ދެން ނުކުޅެވޭނެކަމަށް އާސެނަލްއިން ބުނެފިއެވެ.
މިދިޔަ އަންގާރަ ދުވަހު ޕްރިމިއާ ލީގުގައި ފުލަމް އާއި ދެކޮޅަށް އާސެނަލް ކުޅުނު މެޗުގެ ފުރަތަމަ ހާފުގައި ގެބްރިއަލްއަށް ލިބުނު އަނިޔާގެ ސަބަބުން އޭނާ ވަނީ ބަދަލުކޮށްފަ އެވެ. އަދި އެ ކްލަބުން ބުނެފައިވަނީ އޭނާގެ ހެމްސްޓްރިންގ އަށް ލިބުނު އަނިޔާގެ ސަބަބުން ސާރޖަރީއެއް ހަދަން ޖެހިފައިވާ ކަމަށެވެ. މި މެޗުން އާސެނަލް ވަނީ 2-1 ގެ ނަތީޖާއަކުން މޮޅުވެފަ އެވެ.
އުމުރުން 27 އަހަރުގެ ގެބްރިއަލް ވަނީ މި ސީޒަނުގައި ޕްރިމިއާ ލީގުގައި އާސެނަލް ކުޅުނު 30 މެޗުގެ ތެރެއިން 28 މެޗުގެ ފުރަތަމަ އެގާރައިގައި ހިމެނިގެން ކުޅެފަ އެވެ. އަދި އެ ޓީމުގެ ޑިފެންސްލައިންގައި އޭނާ ވަނީ މުހިންމު ދައުރެއް އަދާކޮށްފަ އެވެ.
އާސެނަލްއިން ނެރެފައިވާ ބަޔާނެއްގައި ބުނެފައިވަނީ ގެބްރިއަލް އަށް ލިބުނު އަނިޔާގެ ސަބަބަބުން ސާރޖަރީއެއް ހަދަން ޖެހިފައިވާ ކަމަށާއި އޭނާގެ ރިހެބިލިޓޭޝަން މަސައްކަތް މިހާރު ފަށާފައިވާ ކަމަށެވެ.
"ކުރިއަށް އޮތް ދުވަސްތަކުގައި ގެބްރިއަލްގެ ހެމްސްޓްރިންގް ސާރޖަރީއެއް ކުރެވޭނެ އަދި ވަގުތުން އޭނާގެ ރިހެބިލިޓޭޝަންގެ ކަންތައްތައް ފެށިގެންދާނެ. އަދި އަލުން އޭނާއަށް ކުޅުމުގެ ތެރެއަށް އާދެވޭނީ ކުރިއަށް އޮތް ފުޓްބޯޅަ ސީޒަނުގެ ކުރީކޮޅު'' އާސެނަލްގެ ބަޔާނުގައި ބުނެފައިވެ އެވެ.
ބައެއް މީޑިޔާ ރިޕޯޓްތައް ބުނެފައިވާ ގޮތުގައި ގެބްރިއަލް ނެތުމަކީ އާސެނަލްއަށް ލިބިގެންދާނެ ވަރަށް ބޮޑު ދެރައެކެވެ. އަދި މި ސީޒަނުގެ ކުރިއަށް ހުރި މެޗުތަކުގައި އޭނާ ނެތްކަމުގެ އަސަރު އެ ޓީމުން ފެންނާނެ އެވެ.
ގެބްރިއަލް އަށް ލިބުނު އަނިޔާއާއިއެކު މިއީ މި ސީޒަނުގައި ޕްރިމިއާ ލީގުގައި ރެކޯޑް ކުރެވިފައިވާ 119 ވަނަ ހެމްސްޓްރިންގް އިންޖަރީ އެވެ.
މި ސީޒަނުގެ ފުޓްބޯޅަ ކަލަންޑަރު ރޭވިފައިވާ ގޮތުން ކައިރި ކައިރީގައި ގިނަ މެޗުތަކެއް ކުޅެން ޖެހޭތީ އެކަމުގެ އަސަރު ކުޅުންތެރިންނަށް ކުރަމުންދާކަމަށް ގިނަ ކްލަބްތަކާއި ކޯޗުން ވަނީ ބުނެފަ އެވެ.