ޚަބަރު

މުޝްފިޤް ހޯދުމަށްޓަކައި 92 އަކަނޯޓިކަލް މޭލަށްވުރެ ބޮޑު ސަރަޙައްދެއް ބަލައިފި


  • މުޝްފިޤް ގެއްލިފައިވަނީ ބޯޓުގައި ރޯވުމުން ސަލާމަތްވުމަށް މޫދަށް ފުންމާލި ފަހުން

  • އޭނާ ހޯދުމުގެ މަސައްކަތް ކަނޑާއި ވައިގެ މަގުން އަދިވެސްދަނީ ކުރަމުން

"ހޮޅުދޫ ބޯޓު"ގައި ހިނގި އަލިފާނުގެ ޙާދިސާގައި ގެއްލިގެން ހޯދަމުންދާ ޢަލީ މުޝްފިޤް ޝަރީފް ހޯދުމަށް މިހާތަނަށް 92 އަކަނޯޓިކަލް މޭލުގެ ސަރަޙައްދެއް ބަލާފައިވާކަމަށް ޤައުމީ ދިފާޢީ ބާރު، އެމްއެންޑީއެފްއިން ވިދާޅުވެއްޖެއެވެ.

ތ. ހިރިލަންދޫއިން ފުރައިގެން މާލެ ދަތުރުކުރަމުން ދިޔަ މި މުދާ އުފުލާ ބޯޓުގައި އަލިފާން ރޯވުމާއި ގުޅިގެން ސަލާމަތްވުމަށް ކަނޑަށް ފުންމާލި ފަހުން ޚަބަރެއް ނުވެގެން ހޯދަމުންދާ ޢަލީ މުޝްފިޤް ޝަރީފް ހޯދުމަށް ކަނޑާއި ވައިގެ މަގުން ސިފައިން ދަނީ ސަރޗް އެންޑް ރެސްކިސު އޮޕަރޭޝަނެއް ހިންގަވަމުންނެވެ.

މިގޮތުން ސަރފޭސް ސަރޗްގެ ގޮތުގައި 92.42 އަކަ ނޯޓިކަލް މޭލުގެ ސަރަޙައްދެއް ބަލާފައިވާއިރު، ކަނޑު އަޑި، ޑައިވިންކޮށްގެން މިހާތަނަށް 65،100 އަކަ މީޓަރުގެ ސަރަޙައްދެއް ބަލާފައިވާކަމަށް އެމްއެންޑީއެފްއިން ވިދާޅުވެއެވެ.

މި ބޯޓުން ދަތުރު ކުރީ ކެޕްޓަނާއެކު 18 މީހުންނެވެ. އޭގެތެރެއިން އެކަކު ފިޔަވައި އެންމެން ސަލާމަތްކޮށްފައިވާކަމަށް އެމްއެންޑީއެފުން ވިދާޅުވިއެވެ. އަދި މިހާތަނަށް ފެނިފައިނުވަނީ ލ. މާވަށަށް ނިސްބަތްވާ ޢުމުރުން 25 އަހަރުގެ ޢަލީ މުޝްފިގް މުޙައްމަދު ޝަރީފެވެ. ބުދަ ދުވަހުގެ ރޭ "ހޮޅުދޫ ބޯޓު"ގައި ރޯވެ ހިނގި ޙާދިސާއަށްފަހު މުޝްފިޤް ހޯދުމުގެ މަސައްކަތް އަންނަނީ ކުރަމުންނެވެ.

މި ޙާދިސާގައި އެ ބޯޓު ވަނީ އަޑިއަށްގޮސްފައެވެ. ބޯޓުގައި ރޯވާން މެދުވެރިވި ސީދާ ސަބަބެއް ކަމާބެހޭ ފަރާތްތަކުން މިހާތަނަށް ހާމަކޮށްފައެއްނުވެއެވެ.