ސިފަނުވި ދުލަކުން: ފަހު އެޕިސޯޑް، ލޯތްބަށްޓަކައިވީ ބޮޑު ގުރުބާނީއެއް

މިރަމަޟާންމަހަށް ހާއްސަކޮށްގެން ޕީ.އެސް.އެމް ނިއުސްއިން ގެނެސްދޭ "ސިފަނުވި ދުލަކުން" ސިލްސިލާގެ ޕްރޮގްރާމްތަކަށް ބެލުންތެރިންގެ ބޮޑު ތަރުހީބެއް ވަނީ ލިބިފައެވެ. މިސިލްސިލާގެ ފަހު އެޕިސޯޑް މިރޭ 22:00ގައި ޕީ.އެސް.އެމް ނިއުސް އިން ގެނެސްދިނުމަށްވަނީ ހަމަޖެހިފައެވެ.

މިސިލްސިލާގެ ފަހު އެޕިސޯޑުގައި ގެނެސްދޭނީ އދ. ހަންޏާމީދޫއަށް އުފަން އުމުރުން 36 އަހަރުގެ މުޙައްމަދު މުސްލިމާއި އޭނާގެ އަންހެނުން ޝާނީގެ އަސަރުންފުރިފައިވާ ވާހަކަތަކެކެވެ. ލޯފަންވުމަކީ މުޖުތަމައުގައި ބާކީވެ، މޮޅީގެ ފޭރާންލާންޖެހޭ ސަބަބެއް ނޫންކަން މުސްލިމް ސާބިތުކޮށްދޭނެއެވެ. ޝާނީ މުސްލިމަށްޓަކައިވީ ގުރުބާނިގެ ވާހަކައަކީ ލޮލުންފާއްދާލާ ކަރުނައާއި އެކު ގައިން ހީބިހި ނަގައިގެންދާނެވަރުގެ ވާހަކަތަކެކެވެ. ކޮންމެއަކަސް މީއީ ލޯތްބަށްޓަކައިވީ ބޮޑު ގުރުބާނީއެއްކަން މި އެޕިސޯޑުން އިގިގެން ދާނެއެވެ.

"ސިފަނުވި ދުލަކުން" މި ޕްރޮގްރާމް ޚާއްސަކޮށްފައިވަނީ ލޯފަން މީހުންގެ އިޙްސާސްތައް އެމީހުންގެ ދުލުން ގެނެސްދިނުމަށެވެ. ލޯފަންވިކަމުގައި ވީނަމަވެސް އެހެން މީހުންނެކޭ އެއްފަދައިން މުޖުތަމައުގައި ބާކީނުވެ، އަބުރުވެރި ދިރިއުޅުމެއް މިފަދަ ފަރާތްތަކަށްވެސް އުޅެވިދާނެކަން އަންގައި ދިނުމަކީ މި ޕްރޮގްރާމްގެ އެންމެބޮޑު އެއް މަޤްޞަދެވެ.

މި ޕްރޮގްރާމުގައި ލޯފަން ހަތަރު މީހެއްގެ ދިރިއުޅުމުގެ ޙާލަތު، އެމީހުންގެ ތަޖުރިބާ، އެމީހުންނާއި ޢާއިލާ މެންބަރުންގެ ވާހަކަތައް ވަރަށް ތަފްޞީލުކޮށް ގެނެސްދެވޭނެއެވެ. މިއީ އެމީހުން ދިރިއުޅޭ ރަށްރަށަށް ނިއުސްޓީމުން ގޮސްގެން ނަގާފައިވާ ޕްރޮގްރާމްތަކެކެވެ. ހަތަރު އެޕިސޯޑްގެ މައްޗަށް އުފައްދާފައިވާ މި ޕްރޮގްރާމް ޝޫޓްކޮށްފައި ވަނީ އެކިއެކި ރަށްރަށުގައެވެ. ކޮންމެ އެޕިސޯޑަކުންވެސް ބެލުންތެރިންނަށް އިބުރަތްތެރި އައު ވާހަކަތަކެއް ގެނެސްދޭނެއެވެ.

"ސިފަނުވި ދުލަކުން" މި ސިލްސިލާގެ ފުރަތަމަ އެޕިސޯޑް ހާއްސަކޮށްފައިވަނީ ހދ. ކުމުންދޫއަށް އުފަން އުމުރުން 50 އަހަރުގެ އަޙްމަދު ޞާލިހާއި އަންހެނުން ފާއިޒާއަށެވެ. ދިރިއުޅުމުގައި ވެއްޓޭ ކޮންމެ ފަހަރަކު ތެދުވެ، އަނެއްކާވެސް ފަހަތައް ބެލުމެއްނެތި، ކުރިއަށް ދާނެ މިސްރާބެއް ނެތޭ އެތައްބަޔަކު ބުންޔަސް މަންޒިލަށް ވާސިލްވުމުގެ ފުރިހަމަ އުއްމީދުގައި ހުރި ޞާލިޙުގެ ކެތްތެރިކަމާއި ހިތްވަރު މި އެޕިސޯޑުން އަންގައިދިނެވެ. އަދި އޭނާގެ އަންހެނުން ފާއިޒާއާ ދެމެދު އުފެދިފައި އޮތީ ހިތާ ހިތުގެ ގުޅުމެއްކަންވެސް މި އެޕިސޯޑުން ހަމާވެގެންދިއައެވެ.

ދެވަނަ އެޕިސޯޑްގައި ގެނެސްދިނީ ފ. ފީއައްޔަށް އުފަން އުމުރުން 33 އަހަރުގެ ހުސެއިން ޝަރީފްގެ ވާހަކަތަކެވެ. ލޯފަން މީހަކަށް ވުމަކީ ތައުލީމުން މަހުރޫމްވާންޖެހޭ ސަބަބެއްނޫންކަން ހުސެން ސާބިތުކޮށްދިނެވެ. ކޮންމެއަކަސް މިއީ ހިތްވަރުގަދަ ބައްޕައެކެވެ. ދަރިފުޅަށްޓަކައިވީ ބޮޑު ގުރުބާނީއެކެވެ.

ތިންވަނަ އެޕިސޯޑް ހާއްސަކުރީ މުޙައްމަދު ފާއިޒްގެ ވާހަކަތަކަށެވެ. އޭނަ ކިޔައިދިނީ ބައްޕައެއްގެ ލޯބިން މަހުރޫމްވި ވާހަކައެވެ. ވޭންތަކުން ދިން ހިތި ހަނދާންތައް މާޒީގެ ސަފްހާތަކަށް ބަދަލުވިގޮތުގެ ވާހަކައެވެ. ލޯފަން މީހަކަށް ވީނަމަވެސް ދިރިހުރިހާ ހިނދަކު އުއްމީދު ކަނޑާނުލާނެ ވަހަކައެވެ.

ސިފަނުވި ދުލަކުން ކިޔައިދިން މިވަހާކަތަކަށް ހާއްސަކޮށްގެން ގެނެސްދިން މި ސިލްސިލާގެ ޕްރޮގްރާމްތައް މިނިންމާލަނީ މުޖުތަމައުއަށް ރަނގަޅު މެސެޖްތަކެއް ދެވުނު ކަމުގެ އުއްމީދުގައެވެ.