އުރީދޫ ދިވެހި ޕްރިމިއާރ ލީގުގެ މެޗުތައް އަލުން ފެށުމަށް ހަމަޖެހިފައިވަނީ މިއަންނަ މަހުގެ އެއްވަނަ ދުވަހުކަމަށް އެފްއޭއެމްއިން ބުނެފިއެވެ.
މިނިވަންދުވަހާ ގުޅުވައިގެން ލީގު މެދު ކަނޑާލުމަށްފަހު، ކުރިން ލީގު ފެށުމަށް ހަމަޖެހިފައި އޮތީ އަންނަ ހޮނިހިރު ދުވަހުއެވެ. ނަމަވެސް މިހާރު އެފްއޭއެމްއިން ވަނީ ލީގުގެ 2 ވަނަ ބުރުގެ ކުޅުން އަލުން ފަށާނީ މިއަންނަ މަހުގެ 1 ވަނަ ދުވަހުގަކަމަށް ނިންމާފައެވެ. މިއަންނަ މަހުގެ 1 ވަނަ ދުވަހު ލީގު އަލުން ފެށުމަށް ހަމަޖެހިފައިވާއިރު، އެދުވަހު ހަވީރު ކުޅުމަށް ހަމަޖެހިފައިވާ މެޗުގައި ވާދަކުރާނީ މާޒިޔާ ސްޕޯޓްސް އެންޑް ރެކްރިއޭޝަންއާ ވިކްޓްރީ ސްޕޯޓްސް ކުލަބެވެ. އަދި އެދުވަހުގެރޭ ކުލަބް އީގަލްސްއާ ބީޖީ ސްޕޯޓްސް ކުލަބް ބައްދަލުކުރާނެއެވެ. މިއަންނަ މަހުގެ 2 ވަނަ ދުވަހު ހަވީރު ކުޅުމަށް ހަމަޖެހިފައިވާ މެޗުގައި ވާދަކުރާނީ ޔުނައިޓެޑް ވިކްޓްރީއާއި ކުލަބް އީގަލްސް އަދި އެރޭ ކުޅުމަށް ހަމަޖެހިފައިވާ މެޗްގައި ވާދަކުރާނީ ޓީސީ ސްޕޯޓްސް ކުލަބާއި ނިއު ރޭޑިއަންޓް ސްޕޯޓްސް ކުލަބެވެ.
މިއަންނަ މަހުގެ 1 ވަނަ ދުވަހު އުރީދޫ ދިވެހި ޕްރިމިއާރ ލީގްގެ ކުޅުން އަލުން ފަށާއިރު، ލީގްގެ 1 ވަނާގައި 20 ޕޮއިންޓްއާއެކު އޮތީ މާޒިޔާއެވެ. 2 ވަނާގައި 17 ޕޮއިންޓްއާއެކު އޮތީ ކުލަބް އީގަލްސްއެވެ. އަދި 14 ޕޮއިންޓާއެއެކު ލީގްގެ 3 ވަނާގައި އޮތީ ޓީސީ ސްޕޯޓްސް ކުލަބެވެ. ނިއު ރޭޑިއަންޓް ސްޕޯޓްސް ކުލަބް 13 ޕޮއިންޓްއާއެކު އޮތީ ލީގްގެ 4 ވަނާގައެވެ. ލީގުގެ އެންމެ ފުލުގައި އޮތީ 3 ޕޮއިންޓްއާއެކު ބީޖީ ސްޕޯޓްސް ކުލަބެވެ.