މޯލްޑިވިއަނުން މިމަހު ޢުމްރާ ދަތުރުތައް ފަށަނީ

ޤައުމީ އެއަރލައިން މޯލްޑިވިއަންއިން މިމަހު ފަހުކޮޅު ޢުމްރާ ދަތުރުތައް ފެށުމަށް ނިންމައިފިއެވެ. މޯލްޑިވިއަނުން ވިދާޅުވީ މިއަހަރުގެ ޙައްޖު މޫސުމުގައި އެ ކުންފުނިން ކުރި ދަތުރުތަކާއި ގުޅިގެން ގިނަ އަދަދެއްގެ ޢުމްރާ ކުންފުނިތަކަކުން ޢުމްރާ ދަތުރުކޮށްދޭން އެދެމުންދާކަމަށެވެ.

ޤައުމީ އެއަރލައިން މޯލްޑިވިއަނުން ވަނީ މިއަހަރު ރާއްޖެއިން ޙައްޖަށް ދިޔަ ހައްޖާޖީން ގެންދިއުމަށް ސައުދީއަށް 2 ދަތުރުކޮށްފައެވެ.

މޯލްޑިވިއަން ހިންގާ އައިލެންޑް އޭވިއޭޝަންގެ މެނޭޖިންގ ޑިރެކްޓަރ އިބްރާހިމް އިޔާސް ވިދާޅުވީ، މޯލްޑިވިއަންއިން ޚިދުމަތް ފުޅާކުރުމަށް ކުރަމުންދާ މަސައްކަތުގެ ދަށުން މިމަހުގެ ފަހުކޮޅު ޢުމްރާ ދަތުރުތަކެއް ކުރުމަށް ހަމަޖެހިފައިވާކަމަށެވެ. އަދި މުޅި އަހަރަށް ބަހާލައިގެން މިއަހަރުގެ ތެރޭގައި ޢުމްރާ ދަތުރު ކުރާނެކަމަށް އިޔާސް ވިދާޅުވިއެވެ.

"މިމަހު ފަހުކޮޅު އަލަށް އުމްރާގެ ދަތުރުކުރުމަށް ވަނީ ހަމަޖެހިފައި. އިރާދަކުރެއްވިއްޔާ މިމަހު ފަހު ހަފްތާގައި އަޅުގަނޑުމެން ފްލައިޓްސްތަކެއް އެބަ އަޅަން އުމްރާއަށް އަދި މިއަހަރުގެ އެކި މުއްދަތުތަކުގެ ތެރޭގައިވެސް އުމްރާ ދަތުރުތައް ކުރަމުންދާނަން." އިޔާސް ވިދާޅުވިއެވެ.

މިއަހަރުގެ ޙައްޖުގެ އަޅުކަމަށް ޤައުމީ އެއަރލައިން މޯލްޑިވިއަންގެ ބޯޓެއްގައި ދަތުރުކުރުމުގެ ފުރުސަތު ހައްޖާޖީންނަށް ލިބުމާ ގުޅިގެން ބައެއް ހައްޖާޖީން ވަނީ އެކަމުގެ ޝުއޫރުތައް ހިއްސާކޮށްފައެވެ.

ގައުމީ އެއަރލައިންގައި މިފަދަ އަޅުކަމެއް އަދާކުރުމަށް ދިއުމުގެ ފުރުސަތު ލިބުމަކީ ވަރަށް އުފާވާކަމެއްކަމަށް އެ ފަރާތްތަކުން ވަނީ ފާހަގަކޮށްފައެވެ. އަދި މޯލްޑިވިއަންގެ ފްލައިޓްތަކަކީ ޑައިރެކްޓް ފްލައިޓްތަކަކަށްވުމުން ވަގުތު ސަލާމަތްވެއެވެ. އަދި މިއީ ލިބިގެންދާ ވަރަށް ބޮޑު ފަސޭހައެއްގެ ގޮތުގައި އެ ހައްޖާޖީން ފާހަގަކުރިއެވެ.

މޯލްޑިވިއަންއިން ވިދާޅުވީ ޢުމްރާ ދަތުރުތައް ކުރުމަށް އަދި ހަމަޖެހިފައިވަނީ ހައްޖު ކޯޕަރޭޝަނާއި އަމިއްލަ ކުންފުންޏަކަށް ކަމަށެވެ. މޯލްޑިވިއަންއިން ޙައްޖު ކޯޕަރޭޝަނަށް ކޮށްދޭ ޢުމްރާ ދަތުރުތައް އޮންނާނީ މިމަހުގެ 22 ވަނަ ދުވަހާއި 27 ވަނަ ދުވަހުއެވެ.

މޯލްޑިވިއަންއިން ޢުމްރާ ދަތުރުކުރަނީ މިއަހަރު އެ ކުންފުންޏަށް ގެނައި ވައިޑް-ބޮޑީ މަތިންދާބޯޓުގައެވެ. މިއަހަރުގެ ތެރޭގައި އިތުރު ވައިޑް-ބޮޑީ މަތިންދާބޯޓެއް ގެނައުމަށް އެ ކުންފުނިން ދަނީ މަސައްކަތްކުރަމުންނެވެ. މިއާއިއެކު އިތުރު މަންޒިލްތަކަށް އެ ކުންފުނީގެ ދަތުރުތައް ފުޅާކުރުމަށް އެހީތެރިވެދޭނެކަމަށް މޯލްޑިވިއަނުން ވަނީ ވިދާޅުވެފައެވެ.