ލާޒްލޯ ކިސްގެ އިރުޝާދުގެ ދަށުން ވިކްޓްރީ ކުޅުނު ފުރަތަމަ މެޗުން މާޒިޔާ މޮޅުވިޔަ ނުދީ ހިފަހައްޓައިފިއެވެ.
ވަރުގަދަ ސްކޮޑެއް އޮތް މާޒިޔާއާ ދެކޮޅަށް ވިކްޓްރީން މިއަދު ކުޅުނު މެޗް އެއްވަރުވީ ތިން ލަނޑު ތިން ލަނޑުންނެވެ. މެޗްގައި ފުރަތަމަ ލަނޑު ޖަހާ ކުރި ހޯދީ ވިކްޓްރީ ސްޕޯޓްސް ކްލަބުންނެވެ. މި ލަނޑު އެޓީމަށް ފުރަތަމަ ހާފްގެ 30 ވަނަ މިނެޓްގައި ކާމިޔާބުކޮށްދިނީ އޮމޮދޫ ވެސްޓެވެ. އޭގެ 7 މިނެޓް ފަހުން މާޒިޔާއަށް މެޗްގެ ނަތީޖާ ހަމަހަމަކޮށްދިނީ އައްސަދު އަލީއެވެ.
ފުރަތަމަ ހާފްގެ38 ވަނަ މިނެޓްގައި ވިކްޓްރީގެ ކެޕްޓަން ރިލްވާން ވަޙީދު ކުރި ކުށަކާ ގުޅިގެން އޭނާއަށް ވަނީ ރަތްކާޑު ދައްކާ ދަނޑުން ފޮނުވާލާފައެވެ. މާޒިޔާގެ ގާސިމް ސަމާމް އަތުން ބައިކޮޅަށް ވަތް ލަނޑާއެކު ވިކްޓްރީން ފުރަތަމަ ހާފް ނިންމާލީ ދެ ލަނޑު އެއް ލަނޑުގެ ލީޑަކާއެކުއެވެ. ދެވަނަ ހާފްގައި ވިކްޓްރީއަށް މި ލީޑް އިތުރަށް ފުޅާކޮށްދިނީ މުހައްމަދު ރިސްވާންއެވެ.
މާޒިޔާގެ ދެވަނަ ލަނޑު ކާމިޔާބުކޮށްދިނީ ކެޕްޓަން އަސަދުﷲ އަބުދުﷲއެވެ. މެޗްގެ ނަތީޖާ ހަމަހަމަކޮށްދިން ލަނޑު މާޒިޔާއަށް ކާމިޔާބުކޮށްދިނީ އަމްދާން އަލީއެވެ. މި މެޗުން ލިބުނު ޕޮއިންޓާއެކު މާޒިޔާ ތާވަލްގެ އެއްވަނާގައި އޮތީ 21 ޕޮއިންޓާއެކުއެވެ. ވިކްޓްރީ އޮތީ ތާވަލްގެ ހަތްވަނާގައި 5 ޕޮއިންޓާއެކުއެވެ.