ދަނޑުވެރި ނަފާ ލޯނު: 6 އަހަރު ތެރޭ ލޯނު ދެވުނީ އެންމެ 45 ފަރާތަކަށް

ދަނޑުވެރިކަމުގެ ޕޯޓަލްގައި ރެޖިސްޓްރީކޮށްފައިވާ ފަރާތްތަކުގެ ތެރެއިން ލޯނަށް އެދިފައިވަނީ މަދު އަދަދެއްގެ ދަނޑުވެރިންކަން ދަނޑުވެރިކަމާއި ދިރޭތަކެއްޗާބެހޭ ވުޒާރާގައި ތަފާސްހިސާބުތަކުން ދައްކައިފިއެވެ.

"ދަނޑުވެރި ނަފާ" ލޯނަކީ އެސްއެމްއީ ފައިނޭންސް ޑިވެލޮޕްމެންޓް ކޯޕަރޭޝަނާއި ދަނޑުވެރިކަމާއި ދިރޭތަކެއްޗާބެހޭ ވުޒާރާ ގުޅިގެން ރާއްޖޭގައި ދަނޑުވެރިކަން ކުރާ އަދި ދަނޑުވެރިކަމާއި ދިރޭތަކެއްޗާބެހޭ ފަރާތްތަކަށް އެހީތެރިވުމުގެ ގޮތުން އެކުލަވާލެވުނު ލޯނެކެވެ. މި ލޯނުގެ ސަބަބުން މިދާއިރާގައި ހަރަކާތްތެރިވާ ފަރާތްތައް މެދުވެރިކޮށް ރާއްޖޭގެ އިގްތިސާދު ހަރުދަނާކުރުމަށް ބާރުއެޅޭނެކަމަށް އެސްޑީއެފްސީން ވިދާޅުވެއެވެ.

ދަނޑުވެރިކަމާއި ބެހޭ ވުޒާރާއިން އާންމުކޮށްފައިވާ ތަފާސްހިސާބުތައް ދައްކާ ގޮތުން އެ ވުޒާރާގެ ދަނޑުވެރިންގެ ދަފްތަރުގައި 6699 ދަނޑުވެރިން ރެޖިސްޓްރީކޮށްފައިވެއެވެ. ނަމަވެސް ދަނޑުވެރިކަން ކުރިއެރުވުމަށް 2019 އިން ފެށިގެން ދޫކުރާ ދަނޑުވެރި ނަފާ ލޯނު މިހާތަނަށް ދޫކޮށްފައިވަނީ 45 ފަރާތަކަށް ތަފާސްހިސާބުތަކުން ދައްކައެވެ.

ދަނޑުވެރި ނަފާ ލޯނުގައި 2 ގިންތިއަކުން ލޯނު ދޫކުރެއެވެ. އެއީ އެއްލައްކަ ރުފިޔާއާއި ހަމައަށް ދޫކުރާ ލޯނަކާއި އެއްލައްކައިން ފެށިގެން 2 މިލިޔަނާއި ހަމައަށް ދޫކުރާ ލޯނެވެ. މިއިން ކޮންމެ ލޯނަކަށްވެސް އަހަރަކު ނަގާނީ 6 އިންސައްތައިގެ އިންޓަރެސްޓެވެ. އެހެން ނަމަވެސް އެއްލައްކަ ރުފިޔާއާއި ހަމައަށް ނެގޭ ލޯނު ދެއްކުމަށް އެންމެ ދިގު މުއްދަތަކަށް ކަނޑައަޅާފައިވަނީ 3 އަހަރެވެ. އަދި 2 މިލިޔަނާއި ހަމައަށް ދޫކުރާ ލޯނު ދެއްކުމަށް ދެނީ ގިނަވެގެން 7 އަހަރެވެ.

މިދިޔަ މޭ މަހު ދަނޑުވެރިކަމާއި ބެހޭ ވުޒާރާއިން، އާންމުކޮށްފައިވާ ތަފާސް ހިސާބުގައިވާ ގޮތުން ދަނޑުވެރި ނަފާ ލޯނުގެ ތެރެއިން އެއްލައްކަ ރުފިޔާ އާއި ހަމައަށް ނެގޭ ލޯނު އެހައިތަނަށް ޖުމްލަ 18 ފާރާތަކުން ނަގާފައިވެއެވެ. އެ ފަރާތްތަކަށް 1.4 މިލިޔަން ދޫކޮށްފައިވާއިރު، 2 މިލިޔަނާއި ހަމައަށް 23 ފަރާތަކުން ވަނީ ނަގާފައެވެ. އެފަރާތްތަކަށް 14.5 މިލިޔަން ދޫކޮށްފައިވާކަމަށް މުހާ ވިދާޅުވިއެވެ.

ދަނޑުވެރިކަން ކުރިއެރުވުމަށް ދޫކުރާ ލޯނު މަދު ފަރާތަކުން ނެގިއިރު، ރާއްޖެއަށް ބޭނުންވާ ކާބޯތަކެތި ރާއްޖޭގައި އުފައްދައި އިމްޕޯޓަށް ބަރޯސާވުން ކުޑަކުރުންކަމަށް އެގްރިކަލްޗަރ އިކޮނޮމިކް ޒޯނެއް ތަރައްޤީކުރުމުގެ މަސައްކަތް ސަރުކާރުން ދަނީ ކުރަމުންނެވެ. މިކަމުގެ އެއްބަސްވުމުގައި ޗައިނާ ހާބަރ އިންޖީނިއަރިންގ ކުންފުންޏާއެކު ވަނީ ސޮއިކޮށްފައެވެ.