އެމެރިކާގައި މިހާރު ކުރިއަށްދާ ޔޫއެސް އޯޕަން ޓެނިސް މުބާރާތުގެ ތިންވަނަ ބުރުގެ ޖާގައެއް އެރީނާ ސަބަލެންކާ އާއި ކާލޯސް އަލްކަރާޒް ހޯދައިފިއެވެ.
ދުނިޔޭގެ އެއްވަނަ އަންހެން ޓެނިސް ކުޅުންތެރިޔާގެ ގޮތުގައި ހުރި ސަބަލެންކާ މި މުބާރާތުގެ ތިންވަނަ ބުރުގެ ޖާގައެއް ހޯދާފައިވަނީ މި މުބާރާތުގައި ސީޑުކޮށްފައިނުވާ ރަޝިޔާގެ ޕޮލިނާ ކުޑަމެޓޯވާއާ ދެކޮޅަށް ކުޅުނު މެޗު ހަތެއް ހައެއް އަދި ހައެއް ދޭއްގެ ނަތީޖާއަކުން މެޗު ކާމިޔާބުކޮށްގެންނެވެ.
މީގެ ކުރިންވެސް މި ދެ ކުޅުންތެރިން މިދިޔަ ޖެނުއަރީ މަހު ބައްދަލުކުރި މެޗުގެ ފުރަތަމަ ސެޓުން ޕޮލިނާ ވަނީ ރަގަޅު ކުޅުމެއް ދައްކާފަ އެވެ. ނަމަވެސް އިއްޔެގެ މެޗެކޭ އެއް ގޮތަށް ދެވަނަ ސެޓުގައި ސަބަލެންކާ ވަނީ އޭނާގެ ކުޅުން ރަގަޅުކޮށް މެޗު ކާމިޔާބުކޮށްފަ އެވެ.
މި މުބާރާތުގެ ފިރިހެން އިވެންޓުގައި އިއްޔެ ސްޕެއިންގެ ކާލޯސް އަލްކަރާޒް ވަނީ މަޓިއާ ބެލޫޗީއާ ދެކޮޅަށް ކުޅުނު މެޗު ހައެއް އެކެއް, ހައެއް ސުމެއް އަދި ހައެއް ތިނެއްގެ ނަތީޖާއަކުން ކާމިޔާބުކޮށްފަ އެވެ.
މި މެޗަށް ނިކުތްއިރު އަލްކަރާޒްއަށް އޮތް އެންމެ ބޮޑު ނުތަނަވަސްކަމަކީ މިދިޔަ އަހަރުގެ ޔޫއެސް އޯޕަން ޓެނިސް މުބާރާތުގެ ދެވަނަ ބުރުން ހިތްދަތޮ ގޮތަކަށް ބަލިވެ މުބާރާތުން ކަޓާފައިވުމެވެ. އެހެންކަމުން މި މެޗުގައި އޭނާ ވަނީ ވިސްނުންތެރިކަމާއިއެކު މޮޅު ކުޅުމެއް ދައްކާފަ އެވެ.
މި މުބާރާތުގެ ތިންވަނަ ބުރުގައި އަލްކަރާޒްއާ ދެކޮޅަށް ނިކުންނާނީ އިޓަލީގެ ލޫސިއާނޯ ޑާޑެރީ އެވެ.