ކުޅިވަރުގެ ޒަރީޢާއިން ބޭރު ދުނިއެއަށް ރާއްޖެ ތަޢާރަފުކުރަންޖެހޭކަމަށް ކުޅިވަރާއި ހަށިހެޔޮކަމާއި ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ.
ރާއްޖެއަށް އަލަށް ތަޢާފަރުވަމުން އަންނަ ސްޕޯޓްސް ޓޫރިޒަމްއާއި ގުޅޭގޮތުން ޕީއެސްއެމް ނިއުސްއަށް ދެއްވި ޚާއްސަ އިންޓަވިއުއެއްގައި ވަޒީރު ވިދާޅުވީ ކުޅިވަރުގެ ޒަރީޢާއިން ބައިނަލްއަޤްވާމީ ދުނިޔެއަށް ރާއްޖެ ތަޢާފަރުކުރުމަކީ ވަރަށް މުހިންމުކަމެއްކަމަށެވެ. އަދި ސްޕޯޓްސް ޓޫރިޒަމަކީ ބޭރު ދުނިޔެއަށް ރާއްޖެ އިޝްތިހާރުކުރުމަށް ވަރަށް މުހިންމު ދާއިރާއެއްކަމަށްވެސް ވަޒީރު ފާހަގަކުރެއްވިއެވެ.
"ވަރަށް މުހިންމު ދާއިރާއެއް. ކުޅިވަރުގެ ޒަރީޢާއިން ޓޫރިޒަމް ޕްރޮމޯޓްކޮށް ރާއްޖެ ބޭރު ޤައުމުތަކަށް ތަޢާރަފުކޮށް ރާއްޖެ އިޝްތިހާރުކުރެވޭނީ ކުޅިވަރުގެ ތެރެއިން" ވަޒީރު ވިދާޅުވިއެވެ.
ވަޒީރު ވިދާޅުވީ އަންނަމަހު ކުޅުދުއްފުށި ސިޓީގައި ބޭއްވުމަށް ހަމަޖެހިފައިވާ ކޮމަންވެލްތު ބީޗް ހޭންޑްބޯޅަ މުބާރާތަކީ އެފަދަ މިސާލެއްކަމަށެވެ. އަދި އުންމީދަކީ މިއީ މިހާތަނަށް ރާއްޖޭގައި ބޭއްވޭ ބައިނަލްއަޤްވާމީ އެންމެ ފެންވަރު ރަނގަޅު މުބާރާތަށްވުންކަމަށް ވަޒީރު ވިދާޅުވިއެވެ.
ކޮމަންވެލްތުގެ މިންގަނޑުތަކާއި އެއްގޮތަށް މިމުބާރާތް ބޭއްވޭއިރު، ކުޅުދުއްފުށި ސިޓީގައި ބައިނަލްއަޤްވާމީ މިންގަޑުތަކަށް ފެތޭ ބީޗް އެރީނާއެއް ޤާއިމުކުރައްވާނެކަމަށް ވަޒީރު ވިދާޅުވެފަވެއެވެ. އެތަނަކީ ޖާގައިގެ ގޮތުން ތަނަވަސް ގިނަ ބަޔަކަށް އެއްފަހަރާ ކުޅިބަލަން ވަދެވޭގޮތަށް ފަރުމާކޮށްފައިވާތަނަކަށް ވާނެކަމަށް ވަޒީރު ހާމަކުރެއްވިއެވެ.
"މިސާލަކަށް އަޅުގަނޑު ހަމަ ދަންނަވާފާނަން، އަންނަމަހު މިބިމުގައި ކުޅުދުއްފުށި ސިޓީގައި އޮންނަ ކޮމަންވެލްތު ބީޗް ހޭންޑްބޯލް ޓޯނަމެންޓަކީ އޭގެ ހަމަ މިސާލެއް. އިރާދަކުރެއްވިއްޔާ މިއީ މީންދުވަހަކު ރާއްޖޭގައި ނުބާއްވާ ފެންވަރުގެ ބީޗް ޓޯނަމަންޓެއް މިބޭއްވިގެންދަނީ ކޮމަންވެލްތު ލެވެލްގެ ހޭންޑްބޯލް ފިރިހެނުންގެ ބީޗް ޓޯނަމެންޓު މިބާއްވަނީ. ބޭރު ޤައުމުތަކުން އައިސް ކުޅުދުއްފުށީގައި މި ޓޯނަމެންޓު ކުރިއަށްދާގޮތަށް މިހާރު ހަމަޖެހިފަ މިއޮންނަނީ. އަދި މިކަން ކުރިއަށްދާއިރުގައި އަޅުގަނޑު ދަންނަވާނީ ހުރިހާ ބޭފުޅުންނަށްވެސް މިތަނުގައި އިރާދާކުރެއްވިއްޔާ މިތަނުގައި ޤާއިމުވެގެންދާނީ އިންޓަނޭޝަނަލް ގޭމްސް ކުޅެވޭވަރުގެ ބީޗް އެރީނާއެއް. އެއީ ހިޔާގަނޑާ އެއްކޮށް ސީޓިންގ ކެޕޭސިޓީ ލާފަ މެދުގައި އެތާ އެތެރޭގައި ބީޗް ކޯޓު ލެވިގެން" ވަޒީރު ވިދާޅުވެފަވެއެވެ.
ވަޒީރު އިތުރަށް ވިދާޅުވީ އެމުބާރާތުގެ ސަބަބުން ކުޅުދުއްފުށި ސިޓީއަށް ރަނގަޅު ބަދަލުތަކެއް އަންނާނެކަމަށާއި، އެތަންވެގެންދާނީ މުސްތަގުބަލުގައިވެސް ބޭއްވޭ މިފަދަ މުބާރާތްތައް ކުޅޭނެ ތަނަކަށްކަމަށެވެ. އެހެންކަމުން އެއީ ކުޅުދުއްފުށި ސިޓީއަށް އަންނާނެ ވަރަށް ބޮޑު ކުރިއެރުމެއްކަމަށް ވަޒީރުވަނީ ހާމަކުރައްވާފައެވެ.