ބޮޑު ކުރިއެރުމަކާއެކު ފަތުރުވެރިންގެ އަދަދު 1.5 މިލިޔަނަށް
-
އަމާޒަކީ 2.3 މިލިޔަން ފަތުރުވެރިން
-
އަމާޒު ހާސިލްކުރަން ދެން ބޭނުންވަނީ 8 ލައްކަ ފަތުރުވެރިން
އަހަރުގެ މިހާތަނަށް ރާއްޖެއަށް 1.5 މިލިޔަން ފަތުރުވެރިން ޒިޔާރަތްކޮށްފިއެވެ. މިއީ މިދިޔަ އަހަރުގެ މި މުއްދަތާއި އަޅާބަލާއިރު %9.7 އިތުރު އަދަދެކެވެ.
ފަތުރުވެރިކަމާ ބެހޭ ވުޒާރާއިން އާންމުކޮށްފައިވާ ތަފާސްހިސާބުތައް ދައްކާގޮތުން ސެޕްޓެމްބަރ 7 ވަނަ ދުވަހުގެ ނިޔަލަށް ރާއްޖެއަށް 1،520،699 ފަތުރުވެރިން ވަނީ ޒިޔާރަތްކޮށްފައެވެ. މިއީ މިދިޔަ އަހަރުގެ މި މުއްދަތުގައި ރާއްޖެއަށް ޒިޔާރަތްކޮށްފައިވާ 1,386,554 ފަތުރުވެރިންނާ އަޅާ ބަލާއިރު %9.7 އިތުރު އަދަދެކެވެ.
ސެޕްޓެމްބަރ މަހުގެ ފުރަތަމަ 7 ދުވަހު ރާއްޖެއަށް އައި ފަތުރުވެރިންގެ އަދަދު މިދިޔަ އަހަރުގެ މި މުއްދަތާއި އަޅާބަލާއިރު ވަނީ %23.6 އިތުރުވެފައެވެ. އެއީ މުޅި ޖުމްލަ 33،773 ފަތުރުވެރިންނާއިއެކުގައެވެ.
މިއަހަރު ރާއްޖެއައި ފަތުރުވެރިންގެ އަދަދު:
* ޖަނަވަރީ: 214،863 ފަތުރުވެރިން
* ފެބްރުއަރީ: 214،091 ފަތުރުވެރިން
* މާރޗް: 203،468 ފަތުރުވެރިން
* އޭޕްރީލް: 198،322 ފަތުރުވެރިން
* މެއި: 135،614 ފަތުރުވެރިން
* ޖޫން: 141،772 ފަތުރުވެރިން
* ޖުލައި: 186،738 ފަތުރުވެރިން
* އޮގަސްޓް: 192،058 ފަތުރުވެރިން
* ސެޕްޓެމްބަރ 7ގެ ނިޔަލަށް: 33،773 ފަތުރުވެރިން
ރާއްޖެއަށް އެންމެ ގިނަ އަދަދަކަށް ފަތުރުވެރިިން ޒިޔާރަތްކުރަނީ ޗައިނާއިންނެވެ. އެޤައުމުން ރާއްޖެއަށް ވަނީ 2 ލައްކައަށްވުރެ ގިނަ ފަތުރުވެރިން ޒިޔާރަތްކޮށްފައެވެ. އަދި އަހަރުގެ މިހާތަނަށް ރާއްޖެއަށް އެންމެ ގިނައިން ފަތުރުވެރިން އައި 5 ޤައުމަށް ބަލާލާއިރު، ކޮންމެ ޤައުމަކުންވެސް ރާއްޖެއަށް ވަނީ ލައްކައަކަށްވުރެ ގިނަ ފަތުރުވެރިން ޒިޔާރަތްކޮށްފައެވެ.
އެންމެ ގިނައިން ފަތުރުވެރިން އައި 5 ޤައުމު:
* ޗައިނާ: 240،828 ފަތުރުވެރިން
* ރަޝިއާ: 182،315 ފަތުރުވެރިން
* އިނގިރޭސިވިލާތް: 136،619 ފަތުރުވެރިން
* އިޓަލީވިލާތް: 107،736 ފަތުރުވެރިން
* ޖަރުމަނުވިލާތް: 104،764 ފަތުރުވެރިން
We have crossed 1.5 million tourist arrivals as of 8th September, moving steadily towards our target. Every visitor is part of our journey as the world’s leading destination. pic.twitter.com/FRE6nzlOJ5
— Ministry of Tourism and Environment (@MoTmv) September 8, 2025
ރާއްޖެއަށް މިހާރު އެވްރެޖްކޮށް ދުވާލެއްގެ މައްޗަށް 6000 އަށްވުރެ ގިނަ ފަތުރުވެރިން އާދެއެވެ. ރާއްޖެއަށް މިއަހަރު ގެނައުމަށް ސަރުކާރުން އަމާޒުހިފާފައިވަނީ 2.3 މިލިޔަން ފަތުރުވެރިންނެވެ. މި އަމާޒު ހާސިލްކުރުމަށް ދެން އިތުރަށް ބޭނުންވަނީ 8 ލައްކަ ފަތުރުވެރިންނެވެ.
ރާއްޖެއަށް 1.5 މިލިޔަން ފަތުރުވެރިން އައުމާއިއެކު ފަތުރުވެރިކަމާ ބެހޭ ވުޒާރާއިން ވިދާޅުވީ، މިއަހަރަށް ކަނޑައެޅި އަމާޒު ހާސިލްވާނެކަމުގެ އުންމީދު ބޮޑުކަމަށެވެ. ދުނިޔޭގެ އެންމެ މަޤްބޫލު މަންޒިލްގެ އެވޯޑް ރާއްޖެއަށް ވިދިވިދިގެން 5 ފަހަރު ލިބިފައިވާއިރު ކޮންމެ ފަތުރުވެރިއަކީވެސް މި ދަތުރުގައި މުހިންމު ބައިވެރިއެއްކަމަށެވެ.