100 މީޓަރ ޕްރިލިމިނަރީ ބުރުން އެއްވަނަ ހޯދައިގެންރާއްޖޭގެ ހަސަން ސާއިދު އޮލިމްޕިކްސްގެ ފުރަތަމަ ބުރަށް ހޮވިއްޖެއެވެ.
ރާއްޖޭގެ އެންމެބާރު ދުވުންތެރިޔާ ހަސަން ސާއިދު ޕްރިލިމިނަރީ ބުރު ނިންމީ 10.43 ސިކުންތުންނެވެ. މި ހީޓުން ދެވަނަ ހޯދި ޓޮންގާގެ ދުވުންތެރިޔާ ހީޓު ނިންމީ 10.76 ސިކުންތުންނެވެ. މިއީއޮލިމްޕިކްސްގެ ބުރެއް ރާއްޖޭގެ ދުވުންތެރިއަކު ކާމިޔާބުކުރި ފުރަތަމަ ފަހަރެވެ.
100 މީޓަރ ފުރަތަމަ ބުރުގައި ސާއިދު މިރޭ ދުވާނީ ރާއްޖެގަޑިން އަށެއް ޖަހާއިރުއެވެ.ޖެމެއިކާގައި ތަމްރީންތައް ހަދަމުންދާ ސާއިދު ވަނީ މިދިޔަ އަހަރުގެ އިންޑިއަންއޯޝަން އައިލެންޑް ގޭމްސްގައި 100 މީޓަރ ދުވުމުން ރާއްޖެއަށް ރަންމެޑަލްހޯދަދީފައެވެ.
އޮލިމްޕިކްސްއަށް ބްރެޒިލްއަށް ފުރުމުގެ ކުރިން ސާއިދުވަނީ އިންޑީއާގައި ބޭއްވި ގްރޭންޑް ޕްރިކްސް މުބާރާތުގެ ރިހި މެޑަލްވެސް ހޯދާފައެވެ.
އޮލިމްޕކްސްގެ ފުރަތަމަ ބުރުގައި ސާއިދު މިރޭ ދުވާއިރު ލައްވާލީ ފަސްވަނަ ހީޓަށެވެ. މި ހީޓުގައި އެމެރިކާ އަދި ފްރާންސްގެ އެތުލީޓުން ވާދަކުރެއެވެ. ދުނިޔޭގެ އެއްވަނަ ދުވުންތެރިޔާ އުސެން ބޯލްޓް ދުވާނީ ހަތްވަނަ ހީޓުގައެވެ.