23 ވަނަ ރަން މެޑަލްއާއެކު މައިކަލް ފެލްޕްސް އޮލިމްޕިކްސް ކެރިއަރު ނިންމާލައިފިއެވެ. އޮލިމްޕިކްސްގައި މިހާތަނަށް ފެނުނު އެންމެ ކާމިޔާބު އެތުލީޓު ކަމަށްވާ އެމެރިކާގެ ފެލްޕްސް އޮލިމްޕިކް ކެރިއަރު ރޭ ނިންމާލީ ހަތަރެއް ގުނަ ސަތޭކަ މީޓަރ ރިލޭގެ ރަން މެޑަލާއެކުއެވެ.
2000ވަނަ އަހަރު އޮލިމްޕިކްސްއަށް ނުކުތް މައިކަލް ފެލެޕްސް މިހާތަނށް ހޯދި މެޑަލްގެ އަދަދަކީ 28އެވެ. އެއީ 23 ރަން މެޑަލް ، 3 ރިހި މެޑަލް އަދި 2 ލޯ މެޑަލްއެވެ. 2012 ވަނަ އަހަރުގެ އޮލިމްޕިކްސްއަށްފަހު ރިޓަޔަރ ކުރި ފެލެޕްސް އަލުން އެނބުރި ފެތުމުގެ ތެރެއަށް އައީ 2014 ވަނަ އަހަރުއެވެ. އަދި މިފަހަރުގެ ގޭމްސްއާ ފެލްޕްސް ކުރިމަތިލީ އޭނާގެ ފަހު ގޭމްސް ކަމަށް ބުނެއެވެ.
31 އަހަރުގެ ފެތުންތެރިޔާއަކީ އޮލިމްޕިކްސް ކުޅިވަރު މުބާރާތްތައް ފެށުނު ފަހުން މިހާތަނަށް ދުނިޔެދުއް އެންމެ ކާމިޔާބު އެއް އެތުލީޓެވެ. ރޭގެ ފަހު ފެތުމަށްފަހު ފެލެޕްސް ބުނީ އޭނާ ކެރިއަރު ނިންމާލަން ބޭނުންވީ ރަން މެޑަލަކާއެކު ކަމަށާއި، މިއީ އޭނާ އަބަދުވެސް ދެކެމުން އައި ހުވަފެނެއް ކަމަށެވެ.
" ނިންމާލަން ބޭނުންވީ ކާމިޔާބީގެ ކަރުނައާއެކު. އެކަން ވެއްޖެ. މިއީ އަބަދުވެސް ދެކުނު ހުވަފެނެއް، މެޑަލް ތަކަކާއެކު ރިޓަޔަރ ކުރުން" ފެލެޕްސް ބުންޏެވެ.
img:http://s3.psmnews.mv/images/660x400/14711639706553.jpg|
އޮލިމްޕިކްސްގައި ވާދަކުރާ ޤައުމުތަކުގެ ތެރެއިން މެޑަލް ޓޭބަލަށް ބަލާއިރު ފެލްޕްސް ހޯދާފައިވާ މެޑަލްގެ އަދަދު އުޅެނީ 175 ޤައުމަށްވުރެ މަތީގައެވެ. އަށާވީށް މެޑަލް ހޯދާފައިވާ ފެލްޕްސް ހޯދި މެޑަލްގެ އަދަދަށްވުރެ ގިނައީ 31 ޤައުމަކުން ހޯދާފައިވާ މެޑަލްއެވެ.