ރާއްޖޭގެ ފުޓްބޯޅައިގެ މުސްތަޤްބަލް ކަނޑައެޅުމަށް ޑެންމާކްގެ ސްޕޯޓްސް ސައިންސް ޕްރޮފެސަރ ބަންގްސްބޯ ގެންނަން ނިންމައިފިއެވެ.
އަންނަ މަހު ރާއްޖެ ބަންގްލަދޭޝްއާއި ލާއޯސްއާ ދެކޮޅަށް ކުޅޭ މެޗް ދިރާސާކުރުމަށް ޔުވެންޓާސްއާ ޑެންމާކްގެ ކުރީގެ އެސިސްޓެންޓް ކޯޗްކަންވެސް ކޮށްފައިވާ ބަންގްސްބޯ ގެންނަން އެފްއޭއެމްއިން ނިންމީ އެކްސްޕާޓެއްގެ އިރުޝާދެއްގެ ދަށުން ރާއްޖޭގެ ފުޓްބޯޅައިގައި ހުރި މައްސަލަތައް ދެނެގަނެ އެކަންކަން ހައްލު ކުރުމަށް ކަމަށް އެފްއޭއެމްއިން ބުނެއެވެ.
އެމްއޭއެމްގެ ރައީސް އަހުމަދު ތާރިގު ވިދާޅުވީ ބަންގްސްބޯ ގެނައުމުގެ އެންމެ ބޮޑު ބޭނުމަކީ އެކްސްޕާޓެއްގެ އިރުޝާދާއެކު ރާއްޖޭގެ ފުޓްބޯޅައިގެ މުސްތަޤްބަލް ކަނޑައެޅުން ކަމަށެވެ. ޑެންމާކްގެ ބަންގްސްބޯ ވަނީ މީގެ ކުރިން ޔުވެންޓާސްގައި ކާލޯ އެންޗެލޯޓީއާއެކުވެސް މަސައްކަތްކޮށްފައެވެ. މީގެ އިތުރުން ބަންގްސްބޯ ވަނީ ފަހަކާ ޖެހެންދެން ޑެންމާކްގެ ފިޒިކަލް ކޯޗެއްގެ ގޮތުގައިވެސް މަސައްކަތްކޮށްފައެވެ.
ފީފާ، ޔޫއެފާ، އަދި އޭއެފްސީގެ އިންސްޓްރަކްޓަރެއްގެ ގޮތުގައި މަސައްކަތް ކުރައްވާ ބަންގްސްބޯއަކީ އިންޓަރނޭޝަނަލް ސްޕޯޓްސް އެންޑް ސައިންސްގެ ސްޓިއަރިންގ ކޮމިޓީގެވެސް މެމްބަރެކެވެ.