މޯލްޑިވްސް ޓޫރިޒަމް އެވޯޑް: 8 ފެސިލިޓީއަކަށް 10 އެވޯޑެއް

މިއަހަރުގެ މޯލްޑިވްސް ޓުއަރިޒަމް އެވޯޑް ހަފްލާގެ ތެރެއިން 8 ފެސިލިޓީއަކަށް ޖުމްލަ 10 އެވޯޑެއް ދީފިއެވެ. ބާސެލޯ ނަސަންދުރާގައި މިއަދު ބޭއްވި މޯލްޑިވްސް ޓުއަރިޒަމް އެވޯޑް ހަފްލާ ޝަރަފްވެރިކޮށްދެއްވީ، ފަތުރުވެރިކަމާ ތިމާވެއްޓާބެހޭ ވަޒީރު ޠާރިޤު އިބްރާހީމެވެ.

މޯލްޑިވްސް ޓޫރިޒަމް އެވޯޑް ދިނުމުގެ މައިގަނޑު މަޤްސަދަކީ ފަތުރުވެރިކަމުގެ ދާއިރާގައި މަސައްކަތްކުރާ ފަރާތްތަކާއި ކުންފުނިތަކުގެ އަގުވަޒަންކުރުންކަމަށް ފަތުރުވެރިކަމާ ތިމާވެއްޓާބެހޭ ވުޒާރާއިން ވިދާޅުވެއެވެ.

"މޯލްޑިވްސް ޓުއަރިޒަމް އެވޯޑް" ހަފްލާގެ ތެރެއިން ޖުމްލަ 8 ފެސިލިޓީއަކަށް 10 އެވޯޑެއް ދީފައިވެއެވެ. އޭގެތެރޭގައި ޓޫރިސްޓް ރިސޯޓުތަކާއި، ޓޫރިސްޓް ހޮޓެލްތަކާއި، ޑައިވް ސެންޓަރުތަކާއި، ގެސްޓްހައުސްތަކުގެ އިތުރުން، ޓްރެވަލް އެޖެންސީތައް ހިމެނެއެވެ.

މި ހަފްލާ ޝަރަފްވެރިކޮށްދެއްވާ ދެއްކެވި ވާހަކަފުޅުގައި ފަތުރުވެރިކަމާ ތިމާވެއްޓާބެހޭ ވަޒީރު ޠާރިޤު އިބްރާހީމް ވިދާޅުވީ، ކުރިއަށްއޮތްތަނުގައި މި އެވޯޑަށް ކެޓެގަރީތައް އިތުރުކުރުމުގެ މަސައްކަތް އެ ވުޒާރާއިން ކުރައްވަމުން އަންނަކަމަށެވެ.

"މިއަދު އަޅުގަނޑު އިއުލާނުކޮށްލަން ބޭނުންވޭ ދެން އަންނަ ޓޫރިޒަމް އެވޯޑް ހަފްލާއަކަށް ކެޓަގަރީތައް އިތުރުުރެވޭނެ ވާހަކަ. އޭގެތެރޭގައި، ވިމެން އެމްޕަވަރމެންޓް، ރާއްޖޭގެ ސަޤާފަތާއި އާދަކާދަ ދައްކުވައިދޭ މަސައްކަތްތައް ކުރާ ފަރާތްތައް އަދި ހަމައޭގެއިތުރަށް ފަތުރުވެރިކަމުގެ ދާއިރާގައި މަސައްކަތްކުރާ އިންޑިވިޖުއަލް ފަރާތްތަކަށް ޚާއްސަ ކެޓެގަރީއެއްވެސް ތަޢާރަފްކުރަން އަޅުގަނޑުމެން މިދަނީ މަސައްކަތްކުރަމުން." ވަޒީރު ވިދާޅުވިއެވެ.

ފަތުރުވެރިކަމުގެ ސިނާއަތަށް ޚާއްސަކޮށްގެން ފަތުރުވެރިކަމާ ތިމާވެއްޓާބެހޭ ވުޒާރާއިން އަންނަނީ، ފަތުރުވެރިކަމުގެ ދާއިރާގައި މަސައްކަތްކުރާ ފަރާތްތަކާއި ކުންފުނިތަކުގެ އަގުވަޒަންކުރުމަށް އެ ފަރާތްތަކަށް ޚާއްސަކޮސްގެން "މޯލްޑިވްސް ޓޫރިޒަމް އެވޯޑް" ހަފްލާ ކޮންމެ އަހަރުކުވެސް ބާއްވަމުންނެވެ.

އެގޮތުން މިއަހަރު އެވޯޑު ދީފައިވަނީ 2023 ވަނަ އަހަރުގެ ޖޫން އިން މިދިޔަ އަހަރުގެ މޭއިމަހުގެ ނިޔަލަށް އެވޯޑްތަކަށް ނޮމިނޭޓްވެފައިވާ ފަރާތްތަކަށެވެ.