ސިނގިރޭޓު ކޮންޓެއިނަރުތައް ވަގަށް ނެގި މައްސަލާގައި ހިމެނޭ ކަސްޓަމްސްގެ މުވައްޒަފު ސަސްޕެންޑުކޮށްފި

ކަސްޓަމްސްއިން ހިފަހައްޓާފައި ހުރި 2 ސިނގިރޭޓު ކޮންޓެއިނަރު ވަގަށް ނެގި މައްސަލާގައި ހައްޔަރުކޮށްފައިވާ ކަސްޓަމްސްގެ ސުޕްރިންޓެންޑެންޓް ޒިވާރު އިސްމާޢީލް ވަޒީފާއިން ސަސްޕެންޑުކޮށްފިއެވެ.

ކަސްޓަމްސްގެ ބެލުމުގެ ދަށުގައި ހުރި 2 ކޮންޓެއިނަރު ސިނގިރޭޓް ވަގަށް ނެގުމުގައި އިސްކޮށް ހަރަކާތްތެރިވިކަަމަށް ތުހުމަތުކުރެވޭ 4 މީހަކު ހަައްޔަރުކޮށްފައިވާއިރު، މީގެ ތެރޭގައި ހިމެނެނީ 2 ވިޔަފާރިވެރިއަކާއި ކަސްޓަމްސް އަދި މިފްކޯގެ އިސް މުވައްޒަފެކެވެ.

ކަސްޓަމްސްއިން ތަހުޤީޤު ކުރަމުންދާ މައްސަލައެއްގައި ހިމެނޭ ސިނގިރޭޓް ގެއްލިފައިވާ މައްސަލައާ ގުޅޭ:
މިމައްސަލައިގައި ތުހުމަތުކުރެވޭ މިސަރވިސްގެ މުވައްޒަފެއްކަމުގައިވާ، ސުޕްރިންޓެންޑެންޓް ޒިވާރު އިސްމާޢީލް ވަނީ މިއަދުން ފެށިގެން ވަޒީފާއިން ސަސްޕެންޑުކުރެވިފައެވެ.

— Maldives Customs Service (@CustomsMv) October 15, 2025

ކަސްޓަމްސްއިން ވިދާޅުވީ، މިމައްސަލާގައި ތުހުމަތުކުރެވޭ ސުޕްރިންޓެންޑެންޓް ޒިވާރު އިސްމާޢީލް މިއަދުން ފެށިގެން ކަސްޓަމްސްގެ ވަޒީފާއިން ސަސްޕެންޑުކޮށްފައިވާކަމަށެވެ. އަދި ތަހުޤީޤަށް ފާހަގަކުރެވޭ ކަންކަމަށް ބަލައި އަޅަންޖެހޭ ފިޔަވަޅުތައް އަޅަމުންދާނެކަމަށްވެސް ކަސްޓަމްސްއިން ވިދާޅުވިއެވެ.

މިމައްސަލައިގެ ތަހުޤީގަށް 4 މީހަކު ހައްޔަރުކޮށްފައިވާއިރު، 12 މީހަކު ފުރުން މަނާކޮށް، ބައެއް އުޅަނދުތަކާއި، ތަންތަން ވަނީ ބަލައި ފާސްކޮށްފައެވެ.