ނޮވެންބަރު 3ގެ ޝަރަފުގެ ޚާއްޞަ އައްޑަނަ ރައީސް މައުމޫނަށް އަރުވައިފި

ނިޝާން ޣާޒީގެ ޢިއްޒަތުގެ ވެރިޔާ، ރައީސް މައުމޫން ޢަބްދުލްޤައްޔޫމަށް ނޮވެންބަރު 3ގެ ޝަރަފުގެ ޚާއްޞަ އައްޑަނަ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަރުވައިފިއެވެ.

ރައީސް މައުމޫނަށް ނޮވެންބަރު 3ގެ ޝަރަފުގެ ޚާއްޞަ އައްޑަނަ އެރުވީ މިއަހަރުގެ ނަޞްރުގެ ދުވަހުގެ ރަސްމީ ޖަލްސާގައެވެ.

ނޮވެންބަރު 3ގެ ޝަރަފުގެ ޚާއްޞަ އައްޑަނައަކީ 1988 ވަނަ އަހަރުގެ ނޮވެންބަރު މަހުގެ 3 ވަނަ ދުވަހުގެ ޢުދުވާނީ ޙަމަލާގައި އޭރުގެ ރައީސުލްޖުމްހޫރިއްޔާ ކުރެއްވި ތަޢުރީފު ޙައްޤު މަސައްކަތްޕުޅުތައް ފާހަގަކޮށް، އެ ދުވަހު ޤައުމަށް ކޮށްދެއްވި ޚިދުމަތުގެ އަގު ޤައުމީ ފެންވަރެއްގައި ދައުލަތުން ވަޒަންކުރެއްވުމުގެ ގޮތުންނެވެ.

ނިރުބަވެރިންނާ ދެކޮޅަށް ކުރި ހަނގުރާމަ ކާމިޔާބުކުރުމަށް ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާގެ މަޤާމުގައި ހުންނަވައިގެން ރައީސް މަޢުމޫން ދެއްވި އިރުޝާދާއި ކުރައްވާފައިވާ އަގުހުރި ޚިދުމަތް ފާހަގަކޮށްލެވެއެވެ. އަދި ދުޝްމަނުންގެ ޢުދުވާނީ ހަމަލާ ނާކާމިޔާބުކޮށްލުމަށް ޙިކުމަތްތެރިކަމާއި ވިސްނުންތެރިކަމާއެކު އެޅުއްވި މުހިންމު ފިޔަވަޅުތައް ފާހަގަކޮށްލެވެއެވެ.

ނަޞްރުގެ ދުވަހަކީ، 1988 ވަނަ އަހަރުގެ ނޮވެންބަރު މަހުގެ 3 ވަނަ ދުވަހު ބޭރުގެ ނިރުބަވެރި ބަޔަކު ދިން ޢުދުވާނީ ޙަމަލާގައި ރާއްޖެއަށް ނަޞްރު ލިބުނު ދުވަހެވެ. ދިވެހި 6 ޚާއިނުން، ނިރުބަވެރި ޖަމާޢަތަކާ ގުޅިގެން ދިން އެ ޙަމަލާގައި 19 ދިވެއްސަކު ޝަހީދުކޮށްލާފައިވެއެވެ.

ކުރިމަތީގައި އޮތް ބިރުވެރި ޙާލަތު އޮޅުންފިލުއްވައި، ވަޒީރުންނާއި ދިފާޢީ ވުޒާރާ އަދި ކަމާ ގުޅޭ އެންމެހައި ފަރާތްތަކަށް ދެއްވަންޖެހޭ އިރުޝާދު ދެއްވައި ވަގުތުންވަގުތަށް ރައީސް މަޢުމޫން މަސައްކަތް ފެށްޓެވިއެވެ. މިގޮތުން ބޭރުގެ އެހީ ހޯއްދެވުމާއި ރާއްޖޭގެ އެކި ކަންކޮޅުތަކުގައި ތިބި ދިވެހި ރައްޔިތުންގެ ޙާލު ގާތުން ބެއްލެވުމުގެ މަަސައްކަތް ކުރައްވަމުން ގެންދެވިއެވެ.

މި ހާދިސާއަކީ ރާއްޖެއާއި ބޭރުދުނިޔެއާ އޮތް ގުޅުމާއި އޭރު ރާއްޖޭގައި އޮތް ފުރިހަމަ ޚާރިޖީ ސިޔާސަތު ވަރަށް ފެނުނު ހާދިސާއެކެވެ. ރައީސް މައުމޫނު ބޭރުގެ ޤައުމުތަކާއެކު ބާއްވަމުން ގެންދިޔަ ގާތް ގުޅުމުގެ ނަތީޖާއަކީ އަވަށްޓެރި އިންޑިޔާއިން ވަރަށް ހަލުވިކަމާއެކު އަސްކަރީ އެހީތެރިކަން ފޯރުކޮށްދިނުމެވެ.

އެ ރޭ ފަތިހު ދިވެހި އަސްކަރިއްޔާއާއި އިންޑިޔާ ސިފައިންގެ އެހީތެރިކަމާއެކު ރައީސްގެ ޢާއިލާ، ދިވެހި ސިފައިންގެ މައި މަރުކަޒަށް ގެންދެވިއެވެ. ޙަމަލާގެ ފުރަތަމަ ވަޒަނުން ފެށިގެން، ބާޣީގެ ކިބައިން ދިވެހި ވަޠަން ސަލާމަތުގެ އައްސޭރިއަކަށް ގެންދެވެންދެން އެމަނިކުފާނު ގެންދެވީ ކެނޑިނޭޅި މަސައްކަތް ކުރައްވަމުންނެވެ.