ތަރައްޤީގެ މަޝްރޫޢުތަކަށް ފައިސާ ދޫކުރާނީ ހަރުދަނާ މިންގަނޑެއްގެ ތެރެއިން: މާލީ ވަޒީރު
-
ކޮންޓްރެކްޓަރ ފައިނޭންސް އުސޫލުން 206 މަޝްރޫޢެއް ވަނީ ހަވާލުކޮށްފައި
-
މަޝްރޫޢުތައް ސަރުކާރު މުޢައްސަސާތަކުން ވަޒަން ކުރާނެ
-
ރައްޔިތުން އެދޭ މަޝްރޫޢުތަކަށް ވަނީ އިސްކަން ދީފައި
ސަރުކާރުން އަމިއްލަ ކުންފުނިތަކާއި ހަވާލުކުރާ މަޝްރޫޢުތަކަށް ފައިސާ ދޫކުރާނީ އެ މަޝްރޫޢު ކުރިއަށްދާ މިންވަރަށް ބަލައި ހަރުދަނާ މިންގަންޑެއްގެ ތެރެއިން ކަމަށް މާލީ ކަންކަމާއި ތަރައްޤީގެ ރޭވުންތެރިކަމާ ބެހޭ ވަޒީރު މޫސާ ޒަމީރު ވިދާޅުވެއްޖެއެވެ.
ތަރައްޤީގެ މަޝްރޫޢުތައް އަމިއްލަ ކުންފުނިތަކާއި ހަވާލުކުރުމަށް ބޭއްވި ރަސްމީއްޔާތު ވާހަކަ ދައްކަވަމުން މާލީ ވަޒީރު މޫސާ ޒަމީރު ވިދާޅުވީ ސަރުކާރުން 206 މަޝްރޫޢުއެއް ކުންފުނިތަކާއި ހަވާލުކޮށްފައިވަނީ ކޮންޓްރެކްޓަރ ފައިނޭންސް އުސޫލުން ކަމަށެވެ. މީގެ ސަބަބުން ބޭންކުތަކުން ފައިނޭސިންގ ލިބި ދައުލަތުގެ ބަޖެޓަށް ބަރޯސާނުވެ، ރައްޔިތުން އެދޭ އަވަސް މިނެއްގައި މަޝްރޫޢުތައް ކުރިއަށް ގެންދެވޭނެ ކަމަށެވެ.
ވަޒީރު ވިދާޅުވީ މިމަޝްރޫޢުތަކުގެ ތެރެއިން ސަރުކާރުން 4 އަމާޒެއް ހާސިލްކުރަން ބޭނުންވާ ކަމަށެވެ. އެގޮތުން މަޝްރޫޢުތަކުގެ ދެމެހެއްޓެނިވިކަމަށް އިސްކަން ދޭނެ ކަމަށާއި، ފައިސާ ދޫކުރުމުގައި ސްޓޭންޑަޑައިޒް ނިޒާމެއް ޤާޢިމްކޮށް ސަރުކާރު މުޢައްސަސާތަކުން މަޝްރޫޢުތަކުގެ ހިންގުން ވަޒަން ކުރާނެ ކަމަށް ވިދާޅުވިއެވެ. މީގެ އިތުރުން މަޝްރޫޢުތަކުގެ ދެމެހެއްޓެނިވިކަން ކަށަވަރުކުރުމަށް މެއިންޓެނެންސް ޒިންމާތައް މަޝްރޫޢުތަކުގެ އެއްބަސްވުމުގައި ބަޔާންކޮށްފައިވާނެ ކަމަށް ވަޒީރު ވިދާޅުވިއެވެ. މީގެ އިތުރުން ދިވެހިންނަށް ޕްރައިވެޓް ސެކްޓަރގެ ތެރެއިން ލިބޭ ވަޒީފާ ފުރުސަތު އިތުރުކުރުމަކީވެސް މިކަމުން ހާސިލްކުރަން ބޭނުންވާ އަމާޒެއް ކަމަށް ވަޒީރު ވިދާޅުވިއެވެ.
" މިއަދު ސޮއިކުރެވޭ މަޝްރޫޢުތަަށް ސަރުކާރުން ކަނޑައަޅާ ޕާފޯމެންސް މިންގަނޑުތަކާއި، މަސައްކަތުގެ ނަތީޖާ ތަކާއި ގުޅިފައިވާ ގޮތަށް ފައިސާ ދިނުމުގެ ސާފު އޮނިގަނޑެއް ޤާއިމްކުރެވޭނެ. މިއީ ހަލުވިކަމާއި ޖަވާބުދާރީވުން އެއްކޮށްލާ ނިޒާމެއް. މި ޕްރޮގްރާމުގެ ބޭނުމަކީ ރައްޔިތުން އެދޭފަދަ ނަތީޖާއެއް ނެރެދިނުން. ކޮންމެ މަޝްރޫޢެއް އެކުލަވާފައިވާނީ ރައްޔިތުންގެ ދިރިއުޅުމުގެ ސީދާ އަސަރުކުރާނެ " ވަޒީރު ޒަމީރު ވިދާޅުވިއެވެ.
މާލީ ވަޒީރު ވިދާޅުވީ މިމަޝްރޫޢުތަކާއެކު އެކި ފަރާތްތަކުގެ އަތްމަތި ތަނަވަސްވެ ދިވެހި ވިޔަފާރިތަކަށް މާލީ މަންފާ ލިބޭނެ ކަމަށެވެ. އަދި މަސައްކަތްތެރި ޒުވާން ޖީލެއް ބިނާކުރުމަށް މިއީ އެޅިގެންދާ ބިންގަލެއް ކަމަށް ވަޒީރު ވިދާޅުވިއެވެ. މީގެ އިތުރުން ދިވެހި ވިޔަފާރިތައް ބާރުވެރިކޮށް ބޭރުގެ ވިޔަފާރިތަކުން ޤައުމުން ބޭރުކުރާ ބޭރުފައިސާ މަދުކުރަންވެސް މިހާރު ސަރުކާރުން މަސައްކަތް ކުރަމުންދާ ކަމަށް ވަޒީރު ވިދާޅުވިއެވެ.
" މަޝްރޫޢު ހިންގުމާއި ހަވާލުވާ ދިވެހި ވިޔަފާރިތަކަށް ބަރާބަރަށް ފައިސާ ލިބޭނެ. މި އެއްބަސްވުންތައް ހިމެނޭނީ އާންމު އިންވެސްޓްމެންޓް ފްރޭމްވޯކުގެ ތެރޭގައި މޮނިޓަރިން އިންތިޒާމު ހިމެނޭހެން. އެހެން ކަމުން ބޭންކުތަކަށްވެސް ފައިދާ ލިބި އިތުރު މަޝްރޫޢުތަކަށް ފައިސާ ފޯރުކޮށްދޭން މަގުފަހިވެގެންދާނެ. " މާލީ ވަޒީރު މުސާ ޒަމީރު ވިދާޅުވިއެވެ.
ސަރުކާރުން ވަނީ ދިވެހިރާއްޖޭގައި ދިވެހި ވިޔަފާރިތަކަށް އިސްކަން ދޭން ޖެހޭ ކަމަށް ވިދާޅުވެފައެވެ. މިއާއެކު އިމާރާތްކުރުމުގެ ސިނާޢަތަށް ބޮޑު ކުރިއެރުމެއް ލިބި ދިވެހިރާއްޖޭގެ އިޤްތިޞާދު ކުރިއަަރައިގެންދާނެ ކަމަށް ވިދާޅުވިއެވެ. އަދި މި މަޝްރޫޢުތައް ކުންފުނިތަކާއި ހަވާލުކުރަނީ މާލިއްޔަތު ޤަވާދުގެ ތެރެއިން ހަރުކަށި ޝަރުތުތަކާއެކުގައެވެ.