ޔޫއެފާ ޗެމްޕިއަންސް ލީގުގައި ބާސެލޯނާއާ މެންޗެސްޓަރ ސިޓީ އެއް ގްރޫޕެއްގައި ލައްވާލައިފިއެވެ.
ޕެޕް ގާޑިއޯލާ މީގެ ކުރިން ގިނަ ކާމިޔާބީތަކެއް ހޯދަދީފައިވާ ބާސެލޯނާ މިރޭ ނެގި ޑްރޯގައި މެންޗެސްޓަރ ސިޓީއާ އެއްގްރޫޕެއްގައި ލައްވާލިއިރު، ގާޑިއޯލާއަކީ ސިޓީގެ މިހާރުގެ ކޯޗެވެ.
ގްރޫޕް ސީގައި ބާސެލޯނާއާ މެންޗެސްޓަރ ސިޓީގެ އިތުރުން ދެން ހިމެނެނީ ޖަރުމަނުގެ ބޮރޫޝިއާ މޮންޝެންގްލެޚްބާ އަދި ސްކޮޓްލެންޑްގެ ސެލްޓިކެވެ.
އެންމެ ފަހުގެ ޗެމްޕިއަން ރެއާލްމެޑްރިޑް ލައްވާލީ ގްރޫޕް އެފްގައެވެ. މިގްރޫޕްގައި ދެން ހިމެނެނީ ބޮރޫޝިއާ ޑޯޓްމުންޑް، ސްޕޯޓިންގ ލިސްބަން އަދި ލެޖިއާ ވާސޯއެވެ.
ފްރާންސްގެ ޗެމްޕިއަން ޕީއެސްޖީއާ އިންގްލެންޑްގެ އާސެނަލް ލައްވާލީ ގްރޫޕް އޭގައެވެ.
މިގްރޫޕްގައި ދެން ހިމެނެނީ ބާސެލް އަދި ލުޑޮގޮރެޓްސްއެވެ.
އެންމެފަހުގެ ރަނަރަޕް އެތްލެޓިކޯ މެޑްރިޑް ލައްވާލީ ބަޔާން މިއުނިކާއެކު ގްރޫޕް ޑީގައެވެ. މިގްރޫޕްގައި ދެން ހިމެނެނީ ޕީއެސްވީ އަދި ރޮސްޓޯވްއެވެ. އިންގްލެންޑް ޗެމްޕިއަން ލެސްޓަރ ހިމެނުނީ ޕޯތޯ، ބްރޫޖް އަދި ކޮޕެންހޭގަންއާއެކު ގްރޫޕް ޖީގައެވެ.
އިޓަލީގެ ޗެމްޕިއަން ޔުވެންޓާސްއާއެކު ގްރޫޕް އެޗްގައި ހިމެނެނީ ސެވިއްޔާ ލިޔޯން އަދި ޑައިނަމޯ ޒެގްރެބްއެވެ. ގްރޫޕް ބީގައި ހިމެނެނީ ޕޯޗްގަލްގެ ބެންފީކާ، ނަޕޯލީ، ޑައިނަމޯ ކިއޭވް އަދި ބެސިކްޓާސްއެވެ.
ގްރޫޕް އީގައި ހިމެނެނީ ރަޝީއާގެ ސީއެސްކޭ މޮސްކޯ، ބަޔާ ލެވަކޫސަން، ޓޮޓްނަމް އަދި މޮނާކޯއެވެ.
img:http://s3.psmnews.mv/images/660x400/14721451960221.jpg|
މީގެ އިތުރުން މި ހަފްލާގައިވަނީ ޔޫރަޕްގެ މޮލު ކުޅުންތެރިޔާގެ އެވޯޑްވެސް ދީފައެވެ. ބޭލްއާ ގްރީޒްމަންއާ ވާދަކޮށް މިފަހަރު މިއެވޯޑް އުފުލާލީ ޔޫރޯއާ ޗެމްޕިއަންސް ލީގުވެސް ހޯދި ކްރިސްޓިއާނޯ ރޮނާލްޑޯއެވެ.