ނިއުރޭޑިއެންޓް ބަލިކޮށް ލީގުގެ އެއްވަނައިގައި މާޒިޔާއިން ހަ ޕޮއިންޓްގެ ލީޑެއް ނަގައިފިއެވެ.
އުރީދޫ ދިވެހި ޕްރިމިއަރ ލީގުގައި މިއަދު ނިއުރޭޑިއެންޓްގެ މައްޗަށް މާޒިޔާ ކުރި ހޯދީ ދެލަނޑު ސުންލަނޑުންނެވެ. މެޗްގެ ފުރަތަމަ ހާފް ލަނޑެއް ނުޖެހި ނިމުނުއިރު ދެވަނަ ހާފްގައި މާޒިޔާއިން ޖެހި ފުރަތަމަ ލަނޑަކީ ނިއުރޭޑިއެންޓްގެ ކެޕްޓަން މުހައްމަދު ރަޝީދު ފައިގައި ޖެހިފައި ބައިކޮޅަށް ވަތްލަނޑެކެވެ.
މާޒިޔާގެ ދެވަނަ ލަނޑު އަޝްފާގުގެ އެހީތެރިކަމާއެކު ކާމިޔާބުކޮށްދިނީ އަހުމަދު ނާޝިދުއެވެ. މިއީ ލީގު ފަހު ބުރުގައި މާޒިޔާ އަދި ނިއުރޭޑިއެންޓްވެސް ކުޅުނު ފަހު މެޗެވެ.
މިމެޗުން ލިބުނު 3 ޕޮއިންޓާއެކު މާޒިޔާ ލީގުގެ އެއްވަނައިގައި އޮތީ 34 ޕޮއިންޓާއެކުއެވެ. ދެވަނައިގައި އީގަލްސްއަށް ލިބެނީ 28 ޕޮއިންޓެވެ. މެޗުން ބަލިވި ނިއުރޭޑިއެންޓް ތާވަލްގެ ހަވަނައިގައި އޮތީ 16 ޕޮއިންޓާއެކުއެވެ.
ލީގުގައި މިރޭ ކުޅޭ މެޗްގައި ވާދަކުރާނީ ވިކްޓްރީއާ ވެލެންސިޔާއެވެ. މިމެޗްވެސް ޕީއެސްއެމްގެ ޔެސްޓީވީއިން ވަގުތުން ގެނެސްދޭނެއެވެ.