އަސަދު ﷲ ގެ ހެޓްރިކާއެކު ރާއްޖެ ބަންގްލަދޭޝްގެ މައްޗަށް ކުރިހޯދައިފިއެވެ.
ބައިނަލްއަޤްވާމީ އެކުވެރިކަމުގެ މިމެޗް ރާއްޖެ ކާމިޔާބުކުރީ 5 ލަނޑު ސުންލަނޑުންނެވެ. އަސަދު ﷲ ގެ ތިން ލަނޑުގެ އިތުރުން މެޗްގައި ރާއްޖޭގެ އަނެއް ދެލަނޑު ރާއްޖެއަށް ކާމިޔާބުކޮށްދިނީ އިސްމާއިލް އީސާ އަދި ހަމްޒާ މުހައްމަދުއެވެ. މިދެ ކުޅުންތެރިންވެސް ކުޅެން ނިކުމެފައިވަނީ ބަދަލު ކުޅުންތެރިއެއްގެ ގޮތުގައި ދެވަނަ ހާފްގައެވެ.
މެޗްގެ ފުރަތަމަ ހާފް ލަނޑެއް ނުޖެހި ނިމުނުއިރު މިހާފްގައި ފެނިގެން ދިޔައީ ހަމަހަމަ ކުޅުމެކެވެ. ސަޕޯޓަރުންނާއެކު މިމެޗަށް ގަލޮޅު ދަނޑު ފުރުނުއިރު ގިނައީ ބަނަގްލަދޭޝް ރައްޔިތުންކަން ފާހަގަކޮށްލެވެއެވެ. ރާއްޖެ ބަންގްލަދޭޝްއާ ދެކޮޅަށް ކުޅުނު މިމެޗަކީ އޭޝިއަން ކަޕް ކޮލިފިކޭޝަން ޕްރިލިމިނަރީ ބުރުގައި ލާއޯސްއާ ދެކޮޅަށް ނިކުތުމުގެ ކުރިން ތައްޔާރުވާން ކުޅުނު މެޗެކެވެ.
ލާއޯސްއާ ރާއްޖެ ވާދަކުރާ މެޗް ކުޅޭނީ މިމަހުގެ 6 ވަނަ ދުވަހުގެ ރޭ އެވެ.