ލާއޯސް ބަލިކޮށް އޭޝިއަން ކަޕް ކޮލިފައިން ގްރޫޕް ސްޓޭޖުންޖާގަ ހޯދުމުގެ ފުރުސަތު ރާއްޖެއިން ބޮޑުކޮށްފިއެވެ. ގަލޮޅު ދަނޑުގައި ކުޅުނު ޕްލޭ އޯފްފުރަތަމަ ލެގްގެ މެޗް ރާއްޖެ ކާމިޔާބުކުރީ 4 ލަނޑު ސުންލަނޑުންނެވެ.
މެޗްގެފުރަތަމަ ހާފްގައި ރާއްޖޭގެ ފުރަތަމަ ލަނޑު ކާމިޔާބުކޮށްދިނީ އަލީ ފާސިރުއެވެ. މެޗްގެ ދެވަނަ ލަނޑު ދެވަނަ ހާފްގައި ކާމިޔާބުކޮށްދިނީ ކެޕްޓަން އަލީ އަޝްފާގެވެ. ރާއްޖޭގެ ތިންވަނަ ލަނޑު ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން ނުކުތް ހުސެން ނިޔާޒްއެވެ.
މެޗްގެ އިތުރު ވަގުތުގައި ރާއްޖޭގެ ހަތަރުވަނަ ލަނޑުކާމިޔާބުކޮށްދިނީވެސް އަޝްފާގެވެ. މެޗްގައި ލަނޑު ޖަހާނެ ގިނަ ފުރުސަތުތަކެއް އަޝްފާގަށް ލިބުނުކަން ފާހަގަކޮށްލެވެއެވެ. މިމެޗުން މޮޅުވެ ރާއްޖެ އޭޝިއަން ކަޕްގެކޮލިފައިން ގްރޫޕް ސްޓޭޖްގެ ޖާގައަކާ ކައިރިއަށް ޖެހިލިއިރު މިދެޓީމް ވާދަކުރާ ދެވަނަ ލެގްގެ މެޗް އޮންނާނީ އަންނަ މަހުގެ 11 ވަނަ ދުވަހުއެވެ.
img:http://s2.psmnews.mv/images/660x400/14731872282449.jpg|ލާއޯސްއާ ރާއްޖެ ވާދަކުރި މެޗްގެ ތެރެއިން ފޮޓޯ: ޕީއެސްއެމް ވަޙީދު
މެޗަށްފަހު ދިވެހި ގައުމީ ފުޓްބޯޅަ ޓީމްގެ ކޯޗް ޑަރެންސްޓެވާޓް ބުނީ މުޅި މެޗުގައި ޓީމްގެ ކުޅުންތެރިންގެ ފަރާތުން ފެނިގެންދިޔަ ފޯރިއާއި ހިތްވަރަށް ބުނާނެ އެއްވެސް އެއްޗެއް ނެތްކަމަށާއި، ކުޅުންތެރިންނަށް ތައުރީފް ނޫން އެއްޗެއް ނެތްކަމަށެވެ. މެޗުގައި ދެއްކި ކުޅުމަށް ބެލިޔަސް،ނަތީޖާއަށް ބެލިޔަސް ޓީމުން މުޅި ދިވެހި ގައުމު އުފާކޮށްދީފިކަމަށް ކޯޗް ސްޓެވާޓްބުންޏެވެ.