ރެއާލް މެޑްރިޑުގެ ތަރި ކިލިއަން އެމްބާޕޭ އަކީ މިވަގުތު ދުނިޔޭގައި ހުރި އެންމެ މޮޅު ސްޓްރައިކަރު ކަމަށް، ވާދަވެރި ބާސެލޯނާގެ ކޯޗު ހާންސީ ފްލިކް ބުނެފިއެވެ.
މިރޭ ރާއްޖެ ގަޑިން 12:00 ގައި ފަށާ ސްޕެނިޝް ސުޕާ ކަޕްގެ ފައިނަލުގައި ރެއާލް މެޑްރިޑާއި ބާސެލޯނާ ބައްދަލުކުރާ މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން ފްލިކް ބުނީ، އެމްބާޕޭ އަކީ ދުނިޔޭގެ ފެންވަރުގެ މޮޅު ކުޅުންތެރިއެއް ކަމަށާއި، އޭނާ އަކީ މިވަގުތު ހުރި އެންމެ މޮޅު ސްޓްރައިކަރު ކަމަށެވެ.
އެފަދަ މޮޅު ކުޅުންތެރިއަކު މިފަދަ ހައިބަތުބޮޑު ފައިނަލެއްގައި ކުޅެން ކޮންމެ މީހަކު ވެސް ބޭނުންވާނެކަން ފާހަގަކޮށް ފްލިކް ބުނީ، ކަން މިހެން އޮތް ނަމަވެސް، ވަކި ކުޅުންތެރިއަކު ކުޅޭތީވެ ނުވަތަ ވަކި ކުޅުންތެރިއަކު ނުކުޅޭތީ، ބާސާއިން މެޗަށް ތައްޔާރުވާ ގޮތް ނުވަތަ ކުޅޭނެ ގޮތް ބަދަލު ނުކުރާނެ ކަމަށެވެ.
ފްލިކް އިތުރަށް ބުނީ، ރެއާލް މެޑްރިޑަކީ ވަރުގަދަ ސްކޮޑެއް، ވަކިވަކި ކުޅުންތެރިންނަށް ބެލިކަމުގައިވީ ނަމަވެސް އޮތް ޓީމެއް ނަމަވެސް، މެޑްރިޑާ ދެކޮޅަށް ކުޅުން އެއީ ބާސާއަށް މި މެޗު ކާމިޔާބުކުރުމަށް ލިބިގެންދާނެ ވަރަށް ބޮޑު ހިތްވަރަކަށް ވެގެންދާނެ ކަމަށެވެ.
ފްލިކް ވަނީ އެމްބާޕޭ ރެއާލްއާ ގުޅުނުފަހުން މިހާތަނަށް 5 އެލްކްލަސިކޯ ކުޅެ، ހަތަރު އެލް ކްލަސިކޯއިން ރެއާލް ބަލިވެފައިވާކަން ފާހަގަކޮށްފައެވެ. އަދި އެއް މެޗު ވީ އެއްވަރުކަން ވެސް އޭނާ ފާޙަގަކުރިއެވެ.
މި ނުވަ މެޗުގެ ތެރެއިން އެމްބާޕޭ ވަނީ ބާސާއާ ދެކޮޅަށް ރެއާލްގެ ޖާޒީގައި ހަ ލަނޑު ކާމިޔާބުކޮށްދީފައެވެ.
ފާހަގަކޮށްލަން ޖެހޭ ގޮތުގައި އެމްބާޕޭގެ ކަކުލަށް ލިބުނު އަނިޔާއަކާ ގުޅިގެން ބެލެވިފައި އޮތީ ސްޕެނިޝް ސުޕާ ކަޕްގައި އޭނާއަށް ނުކުޅެވޭނެ ކަމަށެވެ. މުބާރާތަށް ރެއާލް ފުރިއިރު ވެސް އެމްބާޕޭ ޓީމާއެކު ދަތުރުކޮށްފައެއް ނުވެއެވެ. އަދި ސެމީ ފައިނަލުގައި، އެތުލެޓިކޯ މެޑްރިޑާ ދެކޮޅަށް ވެސް އެމްބާޕޭ ކުޅެފައެއް ނުވެއެވެ.
އެހެންނަމަވެސް މިހާރު އޭނާ ވަނީ ސައުދީ އަރަބިއްޔާއަށް ގޮސް ޓީމާ ގުޅިފައެެވެ. ބެލެވޭ ގޮތުގައި މިރޭގެ މެޗުން އެމްބާޕޭ ފެންނާނެއެވެ.