އަމާން ދޯދި 1ގައި ހިނގި އަލިފާނުގެ ހާދިސާއާ ގުޅޭގޮތުން ފަތުރާ ވާހަކަތައް ދޮގުކޮށްފި

ފަހި ދިރިއުޅުން ކޯޕަރޭޝަން، އެފްޑީސީއިން ހުޅުމާލޭގައި ތަރައްޤީކުރި 4000 ފްލެޓުގެ ތެރެއިން 'ދޯދި 1' ހައުސިން ކޮމްޕްލެކްސްގައި މިއަދު މެންދުރުގެ ވަގުތެއްގައި ވަނީ އަލިފާނުގެ ހާދިސާއެއް ހިނގައިފައެވެ. މި ހާދިސާ ހިނގުމާއެކު އެމްއެންޑީއެފް ފަޔަރ އެންޑް ރެސްކިއު ސާވިސްއިން ވަނީ ވަގުތުން ހަރަކާތްތެރިވެ، އަލިފާންގަނޑު ކޮންޓްރޯލްކޮށްފައެވެ.

އެފްޑީސީން މައުލޫމާތު ދޭ ގޮތުގައި މި ހާދިސާގައި އެއްވެސް މީހަކަށް އަނިޔާއެއް ލިބިފައެއް ނުވެއެވެ. އަދި މިހާރު އެ ސަރަހައްދު ވަނީ ރައްކާތެރިކުރެވި، ހާދިސާ ހިނގަން މެދުވެރިވި ސަބަބު ދެނެގަތުމަށްޓަކައި ކުރަންޖެހޭ އިންސްޕެކްޝަންތައް ފަށާފައި ކަމަށްވެސް އެ ކޯޕަރޭޝަނުން ވިދާޅުވެއެވެ.

FDC confirms a minor fire incident at the Dhoadhi 1 housing complex was quickly contained by MNDF Fire & Rescue, with no injuries reported. The area has been secured and inspections are underway. We have also noted misinformation circulating within certain private Viber groups…

— Fahi Dhiriulhun Corporation Limited (@Fdc_mv) January 23, 2026

މި ހާދިސާއާ ގުޅިގެން އެފްޑީސީިއިން ނެރުނު ބަޔާނެއްގައި ވިދާޅުވީ، ހަގީގަތާ ޚިލާފު ދޮގު މައުލޫމާތު ފަތުރަމުންދާކަން ފާހަގަކުރެވިފައިވާ ކަމަށެވެ. ހާއްސަކޮށް، އިމާރާތުގެ ވެންޓިލޭޝަން ޝާފްޓްތަކާއި ކުނި އުކާލުމުގެ ނިޒާމާ ގުޅުވައިގެން ދޮގު ވާހަކަތައް ފަތުރަމުންދާ ކަމަށް އެ ކޯޕަރޭޝަނުން ވިދާޅުވިއެވެ.

މީގެ އިތުރުން، ކަށަވަރުނުކުރެވޭ މައުލޫމާތު ނުފެތުރުމަށާއި، މިފަދަ ހާދިސާތައް ކުރިމަތިވެދާނެ ފަދަ ކަންކަމުން ދުރުހެލިވެ، ހުރިހާ ފަރާތްތަކުންވެސް ޒިންމާދާރުކަމާއެކު އަމަލުކުރުމަށް އެ ކޯޕަރޭޝަނުން ވަނީ އިލްތިމާސްކޮށްފައެވެ.

އެފްޑީސީން ވިދާޅުވީ، މި ހާދިސާއާ ގުޅޭ އެންމެ ފަހުގެ މައުލޫމާތުތައް ކުރިއަށް އޮތް ތަނުގައި އާންމުކުރަމުންދާނެ ކަމަށެވެ. އަދި ކަންކަމުގެ ހަގީގަތް އޮޅޭގޮތަށް ވާހަކަ ނުދެއްކުމަށް އެ ކޯޕަރޭޝަނުން ވަނީ ތަކުރާރުކޮށް އެދިފައެވެ.