ސާފް ފުޓްސަލް: ޗެމްޕިއަން ދިވެހިރާއްޖެ - ސްރީލަންކާ

ފުރަތަމަ ފަހަރަށް ބާއްވާ ސާފް ފުޓްސަލް ޗެމްޕިއަންޝިޕްގެ އެންމެ ފަހު މެޗުތައް މިއަދު ކުޅޭނެއެވެ.

ޖެނުއަރީ 13 ވަނަ ދުވަހު ފެށި މި މުބާރާތުގެ ޗެމްޕިއަންކަން ހޯދާފައިވާ ދިވެހިރާއްޖެއިން ވެސް، މި މުބާރާތުގައި ކުޅޭ ފަހު މެޗުގައި މިއަދު ލަންކާއާ ދެކޮޅަށް ނުކުންނާނެއެވެ.

ޗެމްޕިއަން ރާއްޖެއިން ބާކީ އެއްމެޗު އޮއްވައި މި މުބާރާތުގެ ޗެމްޕިއަންކަން ކަށަވަރުކުރީ ކުޅުނު ފަސް މެޗު ވެސް ކާމިޔާބުކޮށް، 15 ޕޮއިންޓު ހޯދައިގެންނެވެ. ޗެމްޕިއަނުންނާ ދެކޮޅަށް މި މެޗަށް ނުކުންނަ ސްރީލަންކާ އޮތީ ޕޮއިންޓު ތާވަލުގެ ފުލުން ދެވަނައިގައެވެ.

ދިވެހިރާއްޖެ

ދިވެހިރާއްޖެއިން މި މުބާރާތަށް ނުކުތީ ވެސް ފޭވަރިޓެއްގެ ގޮތުގައެވެ.

ކުރި ބުރަ މަސައްކަތާއި، ދެއްކި ހިތްވަރާއެކު މި މުބާރާތުގައި މިހާތަނަށް ކުޅުނު ފަސް މެޗުން ވެސް ރާއްޖެ ހޯދި މޮޅާމެދު، ބަޔަކު ޝައްކު ކުރާނެ ޖާގައެއް ނެތެވެ.

ފުރަތަމަ ތިން މެޗުގައި އެކަނިވެސް 18 ލަނޑު ޖަހާފައިވެއެވެ. އެ ތިން މެޗުން ބައިކޮޅަށް ވަނީ އެންމެ ދެ ލަނޑެވެ. ދެން ކުޅުނު ދެ މެޗުން ވެސް މޮޅުވެފައިވާއިރު، ރާއްޖެއިން އަމާޒު ހިފާފައި ހުރީ ސައްތައިންސައްތަ މޮޅުވުުގެ ރެކޯޑަކާއެކު މުބާރާތް ނިންމާލާށެވެ.

މި އަމާޒަށް ވާސިލްވުމަށް ދެން އޮތީ އެންމެ ހުރަހެކެވެ. މި ހުރަހާ ވެސް ރާއްޖެއިން ކުރިމަތިލާނީ ސާބިތުކަމާއި އުންމީދާ އެކުގައެވެ.

އެންމެފަހުން ކުޅުނު ފަސް މެޗު

- ދިވެހިރާއްޖެ 7 - 1 ޕާކިސްތާން
- ދިވެހިރާއްޖެ 6 - 1 ބަންގްލަދޭޝް
- ދިވެހިރާއްޖެ 5 - 0 އިންޑިއާ
- ދިވެހިރާއްޖެ 2 - 1 ނޭޕާލް
- ދިވެހިރާއްޖެ 3 - 1 ބޫޓާން

ތަރި

މުޅި މުބާރާތުގައި ވެސް ރާއްޖެއިން އެންމެ ރަނގަޅު ކުޅުމެއް ދެއްކި އެއް ކުޅުންތެރިއަކަށް، ކީޕަރު ޒައިދާން އަޙްމަދު ވާނެއެވެ.

މުބާރާތުގައި ރާއްޖެއިން މިވަނީ ފަސް މެޗުން 15 ޕޮއިންޓު ހޯދާފައެވެ. ޖުމްލަ 23 ލަނޑު ރާއްޖެއިން މުބާރާތުގައި ކާމިޔާބުކޮށްފައިވާއިރު ފައިދާ ގޯލުގެ ގޮތުގައި 19 ލަނޑު އެބައޮތެވެ.

މުބާރާތަކުން ޓީމެއް މޮޅުވުމުގައި ހަމައެކަނި މަދަދުވެރިވަނީ ޖަހާ ލަނޑުތަކެއް ނޫނެވެ. ބައިކޮޅަށް ވަންނަ ލަނޑުގެ އަދަދު މަދުވުން ވެސް މިއީ އެހާމެ މުހިންމު ހިއްސާދާރެކެވެ.

ބައެއް ގައުމުތަކުން މުބާރާތުގެ ބައެއް މެޗުތަކުގައި، އެންމެ މެޗެއްގައި ވެސް ބައިކޮޅަށް ފަސް، ހަ ލަނޑު ވަދެފައިވާއިރު ރާއްޖެއިން މަސް މެޗު ނިންމާލިއިރު ބައިކޮޅަށް ޖުމްލަ ވަތް ލަނޑުގެ އަދަދުވެސް އެ އަދަދާ އަރާ ހަމަ ނުކުރެއެވެ.

މި ހުރިހާ ކަމެއްގެ ޝުކުރަކާއި ތައުރީފެއް ހައްގު ވަކި ކުޅުންތެރިއަކަށް ހަމަ ގައިމުވެސް ވާނީ ޒައިދާންއެވެ.

ރާއްޖެ ކޮޅަށް ލަނޑު ވަނުން ހުއްޓުވުމުގެ އިތުރުން ޕާކިސްތާނާ ދެކޮޅަށް ކުޅުނު މެޗުގައި ޒައިދާން ވަނީ ލަނޑު ވެސް ޖަހާފައެވެ.

ސްރީލަންކާ

މި މުބާރާތަށް ސްރީލަންކާއިން ވެސް ތައްޔާރީތަކެއް ވިއެވެ.

އެހެންނަމަވެސް ފުޓުބޯޅައިގައި ވެސް އަދި ފުޓްސަލްގައި ވެސް މި ސަރަހައްދުގައި ވެސް ލަންކާއަކީ ފާހަގަކޮށްލެވޭ ޤައުމެއް ނޫނެވެ.

މި މުބާރާތުގައި ވެސް ލަންކާއަކަށް މާ އެދެވޭ ނަތީޖާއެއް ނެރެވިފައެއް ނުވެއެވެ.

ޕޮއިންޓު ތާވަލަުގައި، ކުޅުނު ފަސް މެޗުން އެންމެ ޕޮއިންޓަކާއެކު ލަންކާ އޮތީ ހަވަނައިގައެވެ. ބައިކޮޅަށް 19 ލަނޑު ވަދެފައިވާއިރު ކާމިޔާބުކުރެވިފައި ވަނީ އެންމެ އަށް ލަނޑެވެ.

އެންމެފަހުން ކުޅުނު ފަސް މެޗު

- ސްރީލަންކާ 3 - 3 ބޫޓާން
- ސްރީލަންކާ 1 - 2 ނޭޕާލް
- ސްރީލަންކާ 2 - 5 ޕާކިސްތާން
- ސްރީލަންކާ 1 - 5 ބަންގްލަދޭޝް
- ސްރީލަންކާ 1 - 4 އިންޑިއާ

ތަރި

ސްރީލަންކާ ޓީމުގައި، ތަރިންގެ ގިންތީގައި ގުނާލެވޭނެ އެއްވެސް ކުޅުންތެރިއެއް ނެތެވެ.

އެހެންނަމަވެސް މި މުބާރާތަށް ބަލާލާއިރު މުޙައްމަދު އާކިބަކީ ފާޙަގަކޮށްލެވިދާނެ ނަމެކެވެ.

ސަބަބަކީ، މި މުބާރާތުގައި މިހާތަނަށް ސްރީލަންކާއިން ޖެހި އަށް ލަނޑުގެ ތެރެއިން ތިން ލަނޑަކީ އޭނާ ކާމިޔާބުކޮށްފައިވާ ލަނޑުތަކަކަށް ވާތީއެވެ.

ކޮންމެއަކަސް މި މެޗަކީ ސްރީލަންކާއަށް މާ މުހިންމު މެޗަކަށް ނުވިޔަސް، މިއީ ރެކޯޑު ދަމަހައްޓައި، ލިބުނު ކާމިޔާބީއަށް އިތުރު ބޮޅެއް އިތުރުކޮށްލަން ރާއްޖެއަށް ލިބޭ ފުރުސަތަކެވެ.

މި ކާމިޔާބީ ހޯދުމަށް ބޭނުންވާކަމަށް ކުޅުންތެރިންނާއި ކޯޗުންގެ އިތުރުން ސަޕޯޓަރުންނާއި ގައުމުގެ ވެރިން ވެސް އަންނަނީ ބުނަމުންނެވެ.

މި ކާމިޔާބީ ހޯދުމަށް ރާއްޖެއިން ނުކުންނަ މެޗު ފަށާނީ މިއަދު ރާއްޖެ ގަޑީން 12:00 ގައެވެ.