ފުޓްސަލް ޓީމަށް މަރުޙަބާ ކިޔުމަށް، ހަވާ އެރުުމާއެކު ޚާއްސަ ހަރަކާތްތަކެއް

ޤައުމީ ފުޓްސަލް ޓީމުން ހޯދި ތާރީޚީ ކާމިޔާބީ ފާހަގަކުރުމަށް މާދަމާ މާލޭގައި ހަވާއަރުވަން ނިންމައިފިއެވެ.

މާދަމާރޭ އާޓިފިޝަލް ބީޗުގައި ހަވާއަރުވަން ނިންމާފައިވާ ކަމަށާއި، ޤައުމީ ޓީމަށް މަރުހަބާ ކިއުމުގެ ގޮތުން ޚާއްސަ ހަރަކާތްތަކެއް ކުރިޔަށް ގެންދަން ނިންމާފައިވާ ކަމަށް ކުޅިވަރާއި ހަށިހެޔޮކަމާއި ބެހޭ ވުޒާރާއިން މައުލޫމާތު ދެއްވައެވެ.

މިއީ ސަރަހައްދީ މުބާރާތަކުން ރާއްޖޭގެ ފުޓްސަލް ޓީމު ހޯދި ފުރަތަމަ ކާމިޔާބީއެވެ. ކުޅުނު ހުރިހާ މެޗެއް ކާމިޔާބުކޮށް ރާއްޖޭގެ ޤައުމީ ޓީމުން ފުރަތަމަ ފަހަރަށް ބޭއްވި ސާފް ފުޓްސަލް ޗެމްޕިއަންޝިޕްގެ ޓްރޮފީ އުލުފާލިއިރު ރާއްޖޭގެ ޤައުމީ ޓީމަށް މަރުހަބާކިއުމަށް ވިހާވެސް ގިނަ ބަޔަކު އާޓިފިޝަލް ބީޗަށް ދިއުމަށް ސަރުކާރުން އެދެއެވެ.

އެފްއޭއެމާއި ކުޅިވަރު ވުޒާރާއިން ގުޅިގެން ޤައުމީ ޓީމަށް މަރުޙަބާ ކިއުމުގެ ހަރަކާތްތައް ރާވާފައިވާއިރު މާދަމާރޭ ހަވާ އެރުވުމުގެ އިތުރުން އާޓިފިޝަލް ބީޗުގައި ބޮޑުބެރުގެ ހަރަކާތްތައްވެސް އޮންނާނެއެވެ. އަދި ޤައުމީ ޓީމުގެ ކުޅުންތެރިންނާއެކު ފޮޓޯ ނެގުމާއި، ޓްރޮފީއާއެކު ފޮޓޯޯ ނެގުމުގެ ފުރުސަތުވެސް އާންމުންނަށް އޮންނާނެއެވެ.

ޤައުމީ ފުޓްސަލް ޓީމުން މި ސަރަހައްދުގެ އެއްވަނަ ހޯދައިގެން ރާއްޖެ އައުމަށް ހަމަޖެހިފައިވާ ބޯޓު ވެލާނަ އިންޓަނޭޝަނަލް އެއަޕޯޓަށް ޖެއްސުމާއެކު އުފާ ފާޅުކުރުމައި މަރުހަބާ ކިއުމުގެ ހަރަކާތްތައް ވެލާނާ އިންޓަނޭޝަނަލް އެއާޕޯޓާއި ހަމައިން ފެށޭނެއެވެ.

އެގޮތުން ވީއައިޕީން ޓީމަށް މަރުހަބާ ދެންނެވުމާއި، އެއަޕޯޓުން ޓީމު މާލެ އައުމަށްފަހު އަމީނީ މަގާއި މަޖީދީ މަގުން ޕިކަޕުގައި އާންމުންނަށް ފެންނަ ގޮތަށް ޓްރޮފީއާއެކު ޓީމުން ދަތުރު ކުރާނެއެވެ. އަދި އާޓިފިޝަލް ބީޗަށް އައިސް ބީޗުގައި އޮންނަ ހަރަކާތްތަކުގައިި އާންމުންނާއެކު ޓީމުގެ އޮފިޝަލުންނާއި ކުޅުންތެރިން ބައިވެރިވާނެއެވެ.