ޕާކިސްތާން ބަލިކޮށް، އިންޑިއާއިން ރަނަރަޕްކަން ހޯދައިފި

ޕާކިސްތާންގެ މައްޗަށް ހޯދި މޮޅާއެކު އިންޑިއާއިން ސާފް ފުޓްސަލް ޗެމްޕިއަންޝިޕް 2026 ގެ ރަނަރަޕްކަން ހޯދައިފިއެވެ.

މި މުބާރާތުގެ ރަނަރަޕްކަން ނުވަތަ ރިހި މެޑަލް އިންޑިއާއިން ހޯދީ، މި މުބާރާތުގައި ކުޅުނު އެންމެފަހު މެޗުގައި ޕާކިސްތާންގެ މައްޗަށް 1-4 އިން ކުރިހޯދައިގެންނެވެ.

މެޗުގައި ފުރަތަމަ ލަނޑުޖަހައި ލީޑުނެގީ އިންޑިއާ އިންނެވެ. ހާފުގެ ހަވަނަ މިނެޓުގައި މި ލަނޑު އެ ޓީމަށް ޖަހައިދިނީ ލަލްތުއަންގްލެޗާއެވެ.

ހާފު ނިމުމުގެ ކުރިން ޕާކިސްތާނުން ވަނީ ލަނޑެއްޖަހައި ނަތީޖާ ހަމަހަމަކޮށްފައެވެ. ހާފު ނިމެން މިނެޓަކަށްވެފައި ވަނިކޮށް މި ލަނޑު އެ ޓީމަށް ކާމިޔާބުކޮށްދިނީ އަލީ އާގާއެވެ.

ހަމަހަމަ ނަތީޖާއެއްގައި އޮވެގެން ދެ ޓީމުން ދެވަނަ ހާފު ފެށިއިރު ހާފުގެ ހަތަރުވަނަ މިނެޓުގައި އިންޑިއާއިން ވަނީ ދެވަނަ ލަނޑެއް ޖަހައިފައެވެ. މިއީ ލާލްސަންޕޫޔާ ފޮނުވާލި ހަމަލާއެއް، ޕާކިސްތާންގެ އަލީ އާގާގެ ގައިގައި ޖެހިފައި ގޯލުގެ ތެރެއަށް ވަދެގެން އިންޑިއާއިން ކާމިޔާބުކުރި ލަނޑެކެވެ.

އަދި މެޗުގައި އިންޑީއާއިން ޖެހި ތިންވަނަ ލަނޑަކީ، ކެޕްޓަން ނިކިލް ރާޖެންދްރާ ކާމިޔާބުކޮށްދިން ލަނޑެކެވެ. އިންޑިއާގެ ފަހު ލަނޑަކީ، ޕަވާ ޕްލޭއެއްގައި ކީޕަރު ކުރިއަށް އަރާހުރި ވަގުތު، ހުސް ގޯލެއްގެ ތެރެއަށް ބޯޅަ ފޮނުވާލައިގެން ލާލްސަންޕޫޔާ ކާމިޔާބުކޮށްދިން ލަނޑެކެވެ.

މި މެޗުން ހޯދި މޮޅާއެކު އިންޑިއާއަށް ތާވަލުގެ ދެވަނަ ލިބި ރަނަރަޕްކަން ލިބުނީ 11 ޕޮއިންޓާއެކުއެވެ. ތިންވަނައިގައި އޮތް ނޭޕާލަށް ވެސް 11 ޕޮއިންޓު ލިބި ލޯ މެޑަލް ލިބިފައިވާއިރު އިންޑިއާއަށް ކުރި ލިބެނީ ފައިދާ ގޯލުގެ ތަފާތުންނެވެ. ތާވަލުގެ އެއްވަނަ ހޯދައި ފަޚުރުވެރި ރަސްގެފާނުންގެ ޝަރަފު ހޯދީ ދިވެހިރާއްޖެއިންނެވެ. ރާއްޖެއިން ވަނީ ހުރިހާ މެޗަކުން މޮޅުވެ 18 ޕޮޮއިންޓު ހޯދާފައެވެ.

މެޗުން ބަލިވި ޕާކިސްތާނަށް ޕޮއިންޓް ތާވަލުގައި ލިބެނީ ހަތަރުވަނައެވެ. އެއީ ހަ މެޗުން 10 ޕޮއިންޓާއެކުއެވެ. ތާވަލުގެ ފަސްވަނައިގައި ބަންގްލަދޭޝް ހަތް ޕޮއިންޓާއެކު އޮތްއިރު ހަވަނައިގައި އޮތް ބޫޓާނާއި ފުލުގައި އޮތް ސްރީލަންކާއަށް ލިބިފައިވަނީ އެންމެ ޕޮއިންޓެކެވެ.