ރާއްޖެއާއި އިންޑިއާގެ އިޤްތިސާދީ ގުޅުން ދަނީ ބަދަހިވެ، ކުރިއަރަމުން

ރާއްޖެއާއި އިންޑިއާގެ އިޤްތިސާދު ގުޅުން ދަނީ ދުވަހެއް ދުވަހަކަށް ބަދަހިވެ، ކުރިއަރަމުންކަމަށް އެ ޤައުމުން ރާއްޖެއަށް ކަނޑައަޅުއްވާފައި ހުންނަވާ ސަފީރު ޖީ. ބާލަސުބްރަމާނިއަން ވިދާޅުވެއްޖެއެވެ.

ސަފީރު މިހެން ވިދާޅުވީ، އިންޑިއާގެ ޖުމްހޫރީ ދުވަހުގެ މުނާސަބަތުގައި، ސޯޝަލް ސެންޓަރުގައި ބޭއްވި ރަސްމިއްޔާތުގައި ވާހަކަދައްކަވަމުންނެވެ.

އިންޑިއާގެ 77ވަނަ ޖުމްހޫރީ ދުވަހުގެ މުނާސަބަތުގައި ސޯޝަލް ސެންޓަރުގައި ބޭއްވި ރަސްމިއްޔާތުގައި ވާހަކަދައްކަވަމުން އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ވަނީ، އިންޑިއާއާއި ރާއްޖެ ގުޅިގެން ކުރާ މަސައްކަތްތަކުގެ މައްޗަށް އަލިއަޅުއްވާލައްވާފައެވެ.

މިއަދު އިންޑިއާގެ އިޤްތިސާދަކީ، ދުނިޔޭގެ ހަތަރުވަނައަށް އެންމެ ބޮޑު އަދި އެންމެ ހަލުވިކަމާއެކު ކުރިއަރަމުން އަންނަ އިޤްތިސާދުކަން ފާހަގަކުރައްވާ ސަފީރު ވިދާޅުވީ، ހުރިހާ ދާއިރާތަކަކުންވެސް އިންޑިއާއިން ބޮޑެތި ކުރިއެރުންތަކެއް ހޯދަމުން އަންނަކަމަށެވެ. އަދި އިންޑިއާއާއި ރާއްޖެ ގުޅިގެން ޢުމްރާނީ ތަރައްޤީގެ ގިނަ މަޝްރޫޢުތަކެއް ކުރެވެމުންދާކަމަށާއި މީގެ ސަބަބުން ދެ ޤައުމުގެ އިޤްތިސާދީ ގުޅުން ދުވަހެއް ދުވަހަކަށް ބަދަހިވެ، ކުރިއަރަމުން އަންނަކަން ސަފީރު ފާހަގަކުރެއްވިއެވެ.

"އިންޑިއާއާއި ރާއްޖޭގެ ޒަމާންވީ ގުޅުމުގެ ސަބަބުން ދެ ގައުމަށްވެސް އެތަކެއް ފައިދާތަކެއް ކުރޭ. ރާއްޖޭގެ ޢުމްރާނީ އެތަކެއް މަޝްރޫޢުތަކެއް ކުރިއަށްގެންދިއުމުގައި ދެގައުމު ގުޅިގެން މަސައްކަތް އެބަކުރެވޭ. މީގެ ސަބަބުން ރާއްޖޭގެ ޢުމްރާނީ ތަރައްޤީއަށް އެތަކެއް ފައިދާތަކެއް އެބަ ކުރޭ" ސަފީރު ވިދާޅުވިއެވެ.

ސަފީރުގެ ވާހަކަފުޅުގައި ވަނީ ދެ ޤައުމުގެ ސިޔާސީ ގުޅުން ކުރިއަށްއޮތްތަނުގައިވެސް އިތުރަށް ބަދަހިވެގެންދާނޭކަން ފާހަގަކުރައްވާފައެވެ. އިންޑިއާގެ ޖުމްހޫރީ ދުވަހުގެ މުނާސަބަތުގައި، ސޯޝަލް ސެންޓަރުގައި ބޭއްވި ރަސްމިއްޔާތުގައި ދައުލަތުގެ އިސްވެރިންނާއި ކުރީގެ ބައެއް ރައީސުންނާއި ސިޓީތަކުގެ މޭޔަރުންވެސް ބައިވެރިވެވަޑައިގެންނެވިއެވެ.