އެތައްސަތޭކަ ދިވެހިން ނުކުމެ ޤައުމީ ޓީމަށް އޮތް ލޯބި ދައްކާލައިފި
-
ރާއްޖެ ޓީމު އެނބުރި ޤައުމަށް އައިސްފައި ވަނީ 19:45 ހާއިރު
-
އެތައް ބަޔަކު ވަނީ ޤައުމީ ޓީމަށް މަރުހަބާ ކިޔުމަށް އާޓިފިޝަލް ބީޗަށް ޖަމާވެފައި
ފުރަތަމަ ފަހަރަށް ބޭއްވި ސާފް ފުޓްސަލް ޗެމްޕިއަންޝިޕްގެ ޗެމްޕިއަންކަން ހޯދި ރާއްޖޭގެ ޤައުމީ ފުޓްސަލް ޓީމުން ތަށްޓާއެކު އެނބުރި ޤައުމަށް އައުމުން، އެތައް ހާސް ދިވެހިން ނުކުމެ ޤައުމީ ޓީމަށް އޮތް ލޯބި ދައްކާލައިފިއެވެ.
ރާއްޖެ ޓީމު އެނބުރި ޤައުމަށް އައިސްފައި ވަނީ 19:45 ހާއިރުއެވެ. ވެލާނާ އިންޓަނޭޝަނަލް އެއާޕޯޓުން ޓީމަށް މަރުޙަބާ ދެންނެވީ، ރާއްޖޭގެ ކުޅިވަރާ ބެހޭ ވަޒީރު އަބްދުﷲ ރާފިއުއާއި، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް އަޙްމަދު ޠާރިޤް (ޓޮމް) ގެ އިތުރުން، ކޮމިޝަނަރ އޮފް ސްޕޯޓްސް މުޙައްމަދު ޠަލާލްއާއި ކުޅިވަރު ވުޒާރާގެ އިސްވެރިންނާއި ކުޅިވަރު އާއިލާގެ ފާހަގަކޮށްލެވޭ އިސް ފަރާތްތަކުންނެވެ.
މީގެއިތުރުން ޓީމުގެ ކުޅުންތެރިންނާއި އޮފިޝަލުންގެ އާއިލާ މެމްބަރުން ވެސް އެއާޕޯޓުން ޓީމަށް މަރުޙަބާ ކިޔާފައިވެއެވެ.
އެއާޕޯޓުން މާލެއައުމަށްފަހު، ޒުވާނުންގެ މަރުކަޒުން ފެށިގެން އާޓިފިޝަލް ބީޗާ ހަމައަށް ޤައުމީ ޓީމު ދަތުރުކުރީ ދިވެހިންނަށް ތަށި ދައްކާލައި، ޕިކަޕެއްގައެވެ. މަގުމަތީގެ އެކި ސަރަހައްދުތަކުން ވެސް ޓީމަށް މަރުޙަބާ ކިޔުމަށް ޙާއްސަ ހަރަކާތްތަކެއް ބާއްވާފައިވެއެވެ.
ޓީމަށް މަރުހަބާ ކިޔުމަށް ބޭއްވި ޙާއްސަ ހަރަކާތްތައް އޮތީ އާޓިފިޝަލް ބީޗުގައެވެ. އެ ސަރަހައްދަށް އެތައް ހާސް ދިވެހިންނެއް ގޮސްފައިވާއިރު، ޓީމާއެކު ދިވެހިން ހަގީގަތުގައި ވެސް ތިބިކަން ހާމަކޮށްދީ، ޓީމުގެ ފަހަތުގައި، ޓީމަށް ހިތްވަރުދީ ސަޕޯޓުކުރަން ތިބިކަން ހާމަކޮށްދީފައިވެއެވެ.
އާޓިފިޝަލް ބީޗުގައި، ޓީމުގެ ކުޅުންތެރިންނާއި މުބާރާތުގެ ޓްރޮފީއާއެކު ފޮޓޯ ނެގުމުގެ ފުރުސަތު އާންމުންނަށް ހުޅުވާލިއިރު، މި ފުރުސަތުގެ ބޭނުން ގިނަބަޔަކު ހިފިއެވެ.
ޓީމުގެ ކާމިޔާބީ ފާޙަގަކުރުމަށް ހަވާ ވެސް އަރުވާފައިވެއެވެ.
ޖުމްލަ ހަތް ޓީމުން ވާދަކުރި ފުރަތަމަ ސާފް ފުޓްސަލް ޗެމްޕިއަންޝިޕްގެ ތަށި ރާއްޖެއިން ހޯދީ، މުބާރާތުގައި ކުޅުނު ހުރިހާ މެޗަކުން ވެސް މޮޅުވެގެންނެވެ.
ރާއްޖެ ފާހަގަކުރެވުނީ، ކުޅުންތެރިންގެ ހުނަރާއި، ދެއްކި މޮޅު ކުޅުމުގެ ސަބަބުން، މާ ބޮޑު ވާދަވެރިއަކު ނެތި، ވަރަށް ސާބިތުކަމާއެކު މުބާރާތުގެ ތަށި އުފުލާލި ޓީމެއްގެ ގޮތުގައެވެ.