ސަބަލެންކާ އާއި އަލްކަރާޒް ސެމީ ފައިނަލަށް

އޮސްޓްރޭލިއާގެ މެލްބަން ގައި މިހާރު ކުރިއަށްދާ އޮސްޓްރޭލިއަން އޯޕަން ޓެނިސް މުބާރާތުގެ ސެމީ ފައިނަލުގެ ޖާގައެއް އެރީނާ ސަބަލެންކާ އާއި ކާލޯސް އަލްކަރާޒް ހޯދައިފިއެވެ.

ދުނިޔޭގެ އެއްވަނަ އަންހެން ޓެނިސް ކުޅުންތެރިޔާގެ ގޮތުގައި މިވަގުތު ހުރި އުމުރުން 27 އަހަރުގެ ސަބަލެންކާ މި މުބާރާތުގެ ސެމީ ފައިނަލުގެ ޖާގައެއް ހޯދާފައިވަނީ އުމުރުން އެންމެ 18 އަހަރުގެ އެމެރިކާގެ އިވާ ޖޮވިޗް އާއި ދެކޮޅަށް ކުޅުނު މެޗު ހައެއް ތިނެއް އަދި ހައެއް ސުމެއްގެ ނަތީޖާއަކުން މެޗު ކާމިޔާބުކޮށްގެންނެވެ.

މި މުބާރާތުގެ ކުއާޓަރ ފައިނަލުގައި އިވާ ޖޮވިޗް ކުޅުނުއިރު މިއީ ގްރޭންޑް ސްލޭމް މުބާރާތެއްގެ ކުއާޓަރ ފައިނަލުގައި އޭނާ ކުޅުނު ފުރަތަމަ ފަހަރެވެ.

ދެ ފަހަރު މަތިން އޮސްޓްރޭލިއަން އޯޕަން ޓެނިސް މުބާރާތް ކާމިޔާބުކޮށް އެންމެ ފަހުގެ މުބާރާތުގެ ފައިނަލުގައި ކުޅެފައިވާ ސަބަލެންކާ އާއި ދެކޮޅަށް ސެމީ ފައިނަލުގައި ނިކުންނާނީ އެމެރިކާގެ ކޮކޯ ގައުފު ނުވަތަ އެލީނާ ސްވިޓޯލިނާއެވެ.

މި މުބާރާތުގެ ފިރިހެން އިވެންޓުގައި ދުނިޔޭގެ އެއްވަނަ ފިރިހެން ޓެނިސް ކުޅުންތެރިޔާގެ ސްޕެއިންގެ ކާލޮސް އަލްކަރާޒް ސެމީ ފައިނަލުގެ ޖާގައެއް ހޯދާފައިވަނީ އޮސްޓްރޭލިއާގެ އެލެކްސް ޑެމިނޯ އާއި ދެކޮޅަށް ކުޅުނު މެޗު ސީދާ ތިން ސެޓުން ކާމިޔާބުކޮށްގެންނެވެ.

ވާދަވެރި ކުޅުމެއް ފެނިގެން ގޮސްފައިވާ މި މެޗުގެ ސެޓުތައް އަލްކަރާޒް ކާމިޔާބުކޮށްފައިވަނީ ހަތެއް ފަހެއް, ހައެއް ދޭއް އަދި ހައެއް އެކެއްގެ ނަތީޖާއަކުންނެވެ.

ހަ ފަހަރު މަތިން ގްރޭންޑް ސްލޭމް މުބާރާތް ކާމިޔާބުކޮށްފައިވާ އުމުރުން 22 އަހަރުގެ އަލްކަރާޒް ސެމީ ފައިނަލުގެ ޖާގައެއް ހޯދާފައިވާއިރު މިއީ އޭނާ މި މުބާރާތުގެ ސެމީ ފައިނަލުން ޖާގަ ހޯދި ފުރަތަމަ ފަހަރެވެ. އަލްކަރާޒް ވަނީ ޔޫއެސް އޯޕަން އާއި ފްރެންޗް އޯޕަންގެ އިތުރުން ވިމްބަލްޑަން މުބާރާތް މީގެ ކުރިން ކާމިޔާބުކޮށްފައެވެ.

ސެމީ ފައިނަލުގައި އަލްކަރާޒް އާއި ދެކޮޅަށް ނިކުންނާނީ މި މުބާރާތުގައި ތިންވަނަ އަށް ސީޑުކޮށްފައިވާ ޖަރުމަނުގެ އެލެކްޒެންޑަރ ޒްވެރޭވްއެވެ.