ދިވެހިންގެ އެންމެ ރީތި އެއް ސިފައަކީ އެއްބައިވަންތަކަމެވެ. ޒަމާނުންސުރެ ދިވެހިންނަކީ އެކެއް އަނެކެއްގެ އުފަލާއި ހިތާމައިގައި ބައިވެރިވުމުގައި ދުނިޔެއަށް ނަމޫނާ ދައްކަމުންދާ ބަޔަކަށްވާއިރު، ޤައުމަށް ލިބޭ ކޮންމެ ރީތި ނަމެއްގައި ކުދިބޮޑު ކޮންމެ ފަރުދަކުވަމުންދާ ހިއްސާ، ވަކިން ބޮޑަށް ޚާއްސަވެއެވެ. ޤައުމުގެ ފަޚުރާއި ޝަރަފާއި ގުޅިފައިވާ ކޮންމެ ކަމެއްގައި ދިވެހިން ހިތާއި ރޫހުން އުފަލުން ފޮޅިފައިވާ ހިތަކާއިއެކު ބައިވެރިވަމުންދާއިރު މިމަހުގެ 26 ވަނަ ދުވަހަކީ އަނެއްކާވެސް ދިވެހިންގެ ލޯތައް އުފާވެރިކަމުގެ ކަރުނައިން ތެއްމާލި ދުވަހެކެވެ.
ކުޅިވަރަކީ މުޖުތަމަޢުގެ އެކަކު އަނެކަކު ގުޅުވާލާ ތެރަހެއްގެ ގޮތުގައި ސިފަކުރެވެނީ މި ސަބަބަށްޓަކައެވެ. ދިވެހިންނަކީ ކުޅިވަރަށް ލޯބިކުރާ ބަޔަކަށްވާއިރު، ރާއްޖޭގައި ނަންހިނގާ މޮޅެތި އެތުލީޓުންނަކީ ކުރިއަރަމުން އަންނަ ޒުވާން އެތުލީޓުންގެ ނަމޫނާއަކަށްވަނީ ވެފައެވެ. މަދު ވަސީލަތްތަކަކާއެކު ފަރިތަކުރުމަށްފަހު ބައިނަލްއަޤުވާމީ ދުނިޔެއަށް ރާއްޖޭގެ ގައުމީ ޓީމުތަކުން ނުކުންނަ ކޮންމެ ފަހަރަކީ ދިވެހިން ނޭވާ ހިފަހައްޓާލާ ޓީމަށް ހިތްވަރު ދިނުމަށް އެންމެ ފަހު ސިކުންތާއި ހަމައަށްވެސް ތިބޭ ބައެއްކަން ވަނީ ސާބިތުކޮށްދީފައެވެ. ސަޕޯޓަރުންގެ ހިތްވަރާއި ހެޔޮ ދުއާ ޓީމުގެ ކާމިޔާބީއާއި ގުޅިފައިވާއިރު ސަޕޯޓަރުންނަކީ ޓީމުގެ އެންމެ މުހިންމު ކުޅުންތެރިޔާކަމަށް އެއްމެންވެސް އިއްތިފާގުވަނީ މިސަބަބާއި ހުރެއެވެ.
މުޅިން އަލަށް ބޭއްވި ސާފް ފުޓްސަލް ޗެމްޕިއަންޝިޕުގެ ތަށި މިމަހުގެ 26 ވަނަ ދުވަހު ގައުމީ ފުޓްސަލް ޓީމުން އުފުލާލުމާއެކު ދިވެހިން އެންމެ ބޮޑަށް އިންތިޒާރުކުރަމުން ދިޔައީ އެ ޝަރަފާއިއެކު ގައުމީ ޓީމުން އެނބުރި މާލެ އަންނާނެ ވަގުތަކަށެވެ. ގައުމީ ފުޓްސަލް ޓީމުގެ ކުޅުންތެރިންނާއި ބައްދަލުކޮށް މަރުހަބާ ކިޔާލާ ސާފުގެ ރަން ތަށީގައި އަތް ބީއްސާލުމަށް އެދިއެދި ތިބި ކުދިބޮޑު އެންމެންގެ އިންތިޒާރަށް ނިމުން އެންމެފަހުން މިވަނީ އައިސްފައެވެ.
ސާފް ފުޓްސަލް ޗެމްޕިއަންޝިޕުގެ ފަޚުރުވެރި ތައްޓާއެކު ގައުމީ ޓީމުން އެނބުރި މާލެ އައުމަށްފަހު، މާލޭގެ މަގުތަކުގައި ޕިކަޕު ބުރެއްޖަހާލާފަވާއިރު، އާންމުންވަނީ ނުކުމެ ޓީމަށް ތަރުހީބުދީ އައްސަރިބަހާއި ސާބަސް ދީފައެވެ. ގައުމީ ފުޓްސަލް ޓީމު ދަތުރުކުރަމުންދިޔަ ޕިކަޕުގެ ފަހަތުން ދުވެ ގޮސް އަރާ ހަމަކޮށް ސާފުގެ ތަށީގެ އަތްޖައްސާލުމަށް ކުޑަކުދިން ދިޔައީ މަސައްކަތްކުރަމުންނެވެ. ތަށީގައި އަތްޖައްސާލުމާއެކު އެތުއްތު ހިތްތައް ޝުކުރުން ފުރިގެންދާތަން ފެނެއެވެ. ގަދައަޅާ ކުރާ ބުރަ މަސައްކަތުން ކާމިޔާބަށް ވާސިލްވުމަށް އެ ޅަ ސިކުނޑިތަކުގައި ކުރަހާނެ "ބްލޫ ޕްރިންޓަކަށް" މި ކާމިޔާބީ ވެދާނެކަމާމެދަކު ޝައްކެތްވެސް ނެތެވެ.
ގައުމީ ފުޓްސަލް ޓީމަށް މަރުހަބާ ކިޔުމަށް އާޓިފިޝަލް ބީޗުގައި ކުރިއަށްދިޔަ ހަރަކާތުގައި ގިނަ އަދަދެއްގެ ބަޔަކުވަނީ ބައިވެރިވެފައެވެ. ޓީމުގެ ކުޅުންތެރިންނާއި ޓްރޮފީއާއިއެކު ފޮޓޯ ނެގުމުގެ ފުރުސަތު ހުޅުވިފައި އޮތް އިރު އެފުރުސަތު ބޭނުން ގިނަ ބަޔަކު ހިފިއެވެ. ގައުމީ ޓީމުން ހޯދި ކާމިޔާބީއާމެދު ފަޚުރުވެރިވާކަމަށާއި ގައުމަށް އެފަދަ ޝަރަފެއް ހޯދައިދިނީތީ އުފާކުރާކަމަށް އެންމެންވެސް ބުނަމުންދިޔައިރު، އެފަދަ ބައެއް ފަރާތްތަކުގެ ޝުއޫރުވަނީ ޕީއެސްއެމް ނިއުސްއާއި ހިއްސާކޮށްފައެވެ. ތުއްތު ކުދިން ގައުމީ ފުޓްސަލް ޓީމަށް މަރުހަބާ ކިޔާފަވާއިރު ޒުވާނުންވަނީ މި ކާމިޔާބީގެ ސަބަބުން އުންމީދުތަކެއް އައު ވެގެންދިޔަކަމަށް ބުނެފައެވެ. ސާފް ފުޓްސަލް ޗެމްޕިއަންޝިޕުގައި ރާއްޖޭގެ މެޗުތައް ވަރަށް ގާތުން ބަލަމުން ދިޔަކަމަށާއި ގައުމީ ޓީމާއިއެކު އެފަރާތްތަކުގެ ހެޔޮ ދުއާ އަބަދުވެސް އޮތްކަމަށް ސަޕޯޓަރުންވަނީ ބުނެފައެވެ.
ދިވެހިން އަނެއްކާވެސް މިދައްކުވައިދިނީ ގައުމާއެކު ތިބިކަމެވެ. ގައުމީ ކޮންމެ ކަމެއްގައި އެއްބައިވަންތަކަމާއެކު ދެންވެސް ތިބޭނެކަމެވެ.
ގައުމަށް ލިބޭ ކޮންމެ ކާމިޔާބީއަކީ އަމިއްލަ ކަމެއްގެ ގޮތުގައި ދެކިގެން އުފަލާއެކު ބައިވެރިވެދޭނެކަމެވެ. ދިވެހިންނަކީ އެއްބައެއްކަމާއި، ރަތުގެ ލަޝްކަރަކީ އެކެއް އަނެކަކަށް މަދަދުވެރިވާނެ ޒާތީ ތަޢައްޞުބެއް ނެތް އަޚުވަންތަ ބައެއްކަން ދިވެހިން މިވަނީ އަނެއްކާވެސް ދުނިޔެއަށް ސާބިތުކޮށްދީފައެވެ.