އަތޮޅުތަކުގައި ޤާއިމުކޮށްފައިވާ މެޖިސްޓްރޭޓް ކޯޓްތަކުގެ ޚިދުމަތް އިތުރަށް ހަރުދަނާ ކުރައްވައި، އެކޯޓްތަކަށް ދިމާވެފައިވާ ޖާގައިގެ ދަތިކަން ޙައްލުކުރެއްވުމަށް 16 މިލިއަން ރުފިޔާގެ ޢުމްރާނީ ތަރައްޤީގެ މަޝްރޫޢުތައް ހިންގަވަމުންދާކަމަށް ޝަރުޢީ ދާއިރާއިން ހާމަކޮށްފިއެވެ.
ޑިޕާޓްމެންޓް އޮފް ޖުޑީޝަލް އެޑްމިނިސްޓްރޭޝަނުން މަޢުލޫމާތު ދެއްވާގޮތުގައި މިއަހަރުގެ ތެރޭގައި 15 މެޖިސްޓްރޭޓް ކޯޓެއްގެ އައު އިމާރާތުގެ މަސައްކަތް ހިންގަވާފައިވެއެވެ. މީގެތެރެއިން ގިނަ ޢިމާރާތްތަކުގެ މަސައްކަތުގެ ބޮޑުބައި ނިމިފައިވާޖަމަށް ޖުޑީޝަރީން މަޢުލޫމާތުދެއްވައެވެ. އަދި މިއިމާރާތްތަކުގެ މަސައްކަތް މިއަހަރުގެ ނިޔަލަށް ނިންމައި ބޭނުންކުރަންފެށޭވަރުވާނެކަމަށް ޑިޕާޓްމެންޓް އޮފް ޖުޑީޝަލް އެޑްމިނިސްޓްރޭޝަނުން މަޢުލޫމާތުދެއްވައެވެ.
ޒަމާނީ ފެންވަރަށް އިމާރާތްކުރައްވާ އާ މެޖިސްޓްރޭޓް ކޯޓުތަކުގެ އިމާރާތްތަކުގައި ޝަރީއްޔަތް ކުރާ މާލަމަކާއި، އިދާރީ މަސައްކަތްތަކަށް ޚާއްސަ ބަޔަކާއި، ކޯޓަށް ހާޒިރުކުރާ ފަރާތްތައް މަޑުކުރުމަށް ޚާއްސަ ބައެއް ހިމެނޭކަމަށް ޖުޑީޝަރީން މަޢުލޫމާތުދެއްވައެވެ. އަލަށް އިމާރާތް ކުރައްވަމުންދާ 15 މެޖިސްޓްރޭޓް ކޯޓަކީ 10 އަތޮޅެއްގެ އެކި ރައްރަށުގައި އިމާރާތްކުރައްވާ ކޯޓުތަކެކެވެ. ޝަރުޢީ ދާއިރާގެ ޢުމްރާނީ ތަރައްޤީގެ މަޝްރޫޢުތައް ހިންގަވަނީ ކޯޓްތަކަށް ހުށައެޅޭ މައްސަލަތަކުގެ ޢަދަދަށް ބައްލަވައި އިސްކަންދެއްވާ ތަރުތީބުންނެވެ.
ޝަރުޢީ ދާއިރާގެ ޢުމްރާނީ ތަރައްޤީގެ ގިނަ މަޝްރޫޢު ތަކެއް މިދިޔަ އަހަރުވެސް ހިންގަވާފައިވެއެވެ. އެގޮތުން 2015 ވަނަ އަހަރުގެ ނިޔަލަށް 26 ރަށެއްގެ މެޖިސްޓްރޭޓް ކޯޓުގެ އާ އިމާރާތުގެ މަސައްކަތް ނިމި، ބޭނުންކުރައްވަން ފައްޓަވައިފައިވާކަމަށް ޑިޕާޓްމެންޓު އޮފް ޖުޑީޝަލް އެޑްމިނިސްޓްރޭޝަނުން ހާމަކުރައްވައެވެ.
ރާއްޖޭގެ 20 އަތޮޅުގައި ޖުމްލަ 191 މެޖިސްޓްރޭޓް ކޯޓް ޤާއިމުކުރައްވައި ހިންގަވަމުންގެންދަވައެވެ.