ޕްރޮޖެކްޓް އައިލާ: ޗުއްޓީ މަންޒިލް، ދާއިމީ ވަޒަނަކަށް

ދިވެހިރާއްޖޭގެ ނަން އިވުމާއެކު ދުނިޔޭގެ ކޮންމެ މީހެއްގެ ސިކުނޑިއަށްވެސް ސިފަވެގެންދަނީ ހުދު ދޮންވެލި ގޮނޑުދޮށްތަކާއި، ވިލުފެހި ކުލައިގެ މޫދާއި، އާދަޔާ ޚިލާފު ރީތި އިރުއޮއްސޭ މަންޒަރުތަކެވެ. އެތައް އަހަރުތަކެއް ވަންދެން މި ޖަޒީރާ ރަށްތަކަކީ ހަމައެކަނި ޗުއްޓީއެއް ހޭދަކޮށްލުމަށްފަހު އެނބުރިދާ ވަގުތީ އުފާވެރިކަމުގެ މަންޒިލެކެވެ. ނަމަވެސް، މިއަދު މިވަނީ މި މަންޒަރުތައް ބަދަލު ކޮށްލާނެ ފަދަ މަޝްރޫޢެއްގެ މަސައްކަތް ފަށާފައެވެ.

އެސްއީޒެޑުގެ ޤާނޫނަށް އިޞްލާޙު ގެނައި ފަހުން ފުރަތަަމަ ފަހަރަަށް ސަސްޓެއިނަބަލް ޓައުންޝިޕެއް ތަރައްޤީ ކުރުމުގެ ހުއްދަ ބޭރުގެ ބަޔަކާ ރަސްމީކޮށް ޙަވާލުކުރީ މިދިޔަ ޑިސެމްބަރު މަހުގެ ތެރޭގައެވެ. އެއީ، ކްރިސްޓަލްސް ހޯލްޑިންގްސް ޕްރައިވެޓް ލިމިޓެޑަށެވެ. ކްރިސްޓަލް ހޯލްޑިންގްސްގެ ފަރާތުން ރާއްޖޭގައި ތަރައްޤީ ކުރާ ފުރަތަމަ ޓައުންޝިޕް ތަރައްޤީ ކުރާނީ، ނ. އަތޮޅުގައެވެ. އަދި މިހާރު މިވަނީ، މި ޓައުންޝިޕްގެ ބިން ހިއްކުމާއި ގޮނޑުދޮށް ޙިމާޔަތް ކުރުމުގެ ހުރިހާ މަސައްކަތެއް ނިމި، ރަސްމީކޮށް ބިންގާވެސް އަޅާފައެވެ.

ނ. އަތޮޅުގެ ދިގުފަރު ފަޅާއި، ދެކުނުފަރު އަދި ކުރަމާދޫގެ ފަޅުގައި "ޕްރޮޖެކްޓް އައިލާ"ގެ ނަމުގައި ތަރައްޤީކުރާ މި ޓައުންޝިޕަކީ ހަމައެކަނި ފަތުރުވެރިންނަށް ޚާއްޞަ ރިސޯޓެއް ނޫނެވެ. މިއީ އެއަށްވުރެ މާ ފުން އަދި މާ ދުރުވިސްނޭ މަޝްރޫޢެކެވެ. އެއީ، ދެމެހެއްޓެނިވި ގޮތެއްގައި ދިރިއުޅުމަށް ބިނާކުރެވޭ ޙަޤީޤީ "ޓައުންޝިޕް" އެކެވެ. މިއީ، "މި އަހަރު ކިތައް ފަތުރުވެރިން އަންނާނެތޯ؟" ކުރާ ސުވާލުގެ ބަދަލުގައި، "މީހުންނަށް މިތާ ދާއިމަށް ދިރިއުޅެވޭނީ ކިހިނެއްތޯ؟" ކުރާ ސުވާލަށް ދެވޭ ޖަވާބެކެވެ.

"އައިލާ ފަދަ މަޝްރޫޢުތަކުގެ ސަބަބުން ރާއްޖެއަކީ ހަމައެކަނި ޗުއްޓީ ހޭދަކޮށްލަން އަންނަ މަންޒިލެއްގެ ބަދަލުގައި، ދިރިއުޅުމަށާއި އިންވެސްޓް ކުރުމަށް އެންމެ އެކަށީގެންވާ ތަނެއްގެ ގޮތުގައި ދުނިޔެއަށް ބަލައިގަންނާނެ. މި މަޝްރޫޢުގެ ސަބަބުން ލައިފްސްޓައިލް، ތަޢުލީމު، ވެލްނަސް އަދި ޞިއްޙީ ދާއިރާއިން ފަތުރުވެރިންނަށް ލިބޭ ތަޖުރިބާ އިތުރަށް ފުރިހަމަ ވެގެންދާނެ. މިއީ ރާއްޖެއަކީ ހަމައެކަނި ޗުއްޓީ ހޭދަކޮށްލަން އަންނަ މަންޒިލެއްގެ ބަދަލުގައި، ދިރިއުޅުމަށާއި، އިންވެސްޓް ކުރުމަށާއި، ދިގު މުއްދަތުގެ އަގުހުރި މަސައްކަތްތަކެއް ބިނާކުރެވޭނެ ތަނެއްގެ ގޮތުގައި ބަލައިގަތުމަށް ލިބޭ އަގުހުރި ފުރުޞަތެއް." އެސްއީޒެޑުގެ ދަށުން ރާއްޖޭގައި ތަރައްޤީކުރާ އެންމެ ފުރަތަމަ ސަސްޓެއިނަބަލް ޓައުންޝިޕް ޕްރޮޖެކްޓުގެ ބިންގާ އެޅުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވިއެވެ.

ވޭތުވެދިޔަ ބައިގަރުނު ތެރޭގައި ރާއްޖޭގެ އިޤްތިޞާދު ބިނާވެފައިވަނީ ވަކިވަކި ރަށްތަކެއްގައި ހިންގާ ރިސޯޓުތަކެއްގެ މައްޗަށެވެ. ނަމަވެސް، 750 މިލިޔަން ޑޮލަރުގެ މި މަޝްރޫޢަކީ މުޅި މި ތަޞައްވުރުން އެއްކޮށް ބަދަލުކޮށްލާ އިސްތިރާޖީ ވިސްނުމެކެވެ. މި ޓައުންޝިޕަކީ ގުޅިފައިވާ މުޖުތަމަޢެކެވެ. އާއިލާއެއް ބިނާކޮށް، މަތީ ތައުލީމު ހާސިލުކޮށް، ދުނިޔޭގެ ފެންވަރުގެ ޞިއްޙީ ޚިދުމަތް ލިބިގަނެވޭނެ ތަނެކެވެ. މާލެއަށް ބާރުބޮޑުވެ، ޒުވާނުން ތައުލީމާއި އެހެނިހެން ފުރުޞަތުތަކަށް އެދި ބޭރު ޤައުމުތަކަށް ހިޖުރަކުރާ މި ދަނޑިވަޅުގައި، މިއީ ކޮންމެހެންވެސް ބޭނުންތެރި ބަދަލެކެވެ.

މި މަޝްރޫޢުގެ މައިގަނޑު އަސާސަކީ "ދާއިމީކަން"މިއެވެ. މިއީ މެހުމާނުންނަށް ބިނާކުރާ ކޮޓަރިތަކެއްގެ ބަދަލުގައި، ރައްޔިތުންނަށް ފަރުމާކުރެވޭ ގެދޮރެކެވެ. އަދި ރާއްޖެއަކީ ތިމާވެށީގެ ގޮތުން ނާޒުކު ޤައުމަކަށްވާއިރު، މި ޒޯން ހިންގުމަށް ބޭނުންކުރާ ހަކަތައިގެ މަދުވެގެން 60 އިންސައްތައަކީ އިއާދަކުރަނިވި ހަކަތައަށް ވެގެންދާނެއެވެ. ހަމަމިއާއެކު، ޒަމާނީ ކުނި މެނޭޖުކުރުމުގެ ނިޒާމާއި އަދި ކާނާގެ ރައްކާތެރިކަން ކަށަވަރު ކުރެވޭނެ ފަދަ ދަނޑުވެރިކަމުގެ ނިޒާމުތަކުގެ މައްޗަށެވެ. މިކަމަށް އެކަނިވެސް 17 ހެކްޓަރުގެ ބިމެއް ވަނީ ކަނޑައަޅާފައެވެ.

އިޤްތިޞާދީ ނަޒަރަކުން ބަލާއިރު، މިއީ ރާއްޖޭގެ ޤައުމީ އުފެއްދުންތެރިކަމުގެ މިންގަނޑުގައި އެންމެ ބޮޑު ބައެއް ޙިއްސާކުރާ ފަތުރުވެރިކަމުގެ ސިނާޢަތް ސިންދަފާތު ކޮށްލަން ލިބޭ ރަނުގެ ފުރުޞަތެކެވެ. އެހެނީ ހޮސްޕިޓާލިޓީ ދާއިރާއިން އެއް ފަހަރާ 100 މީހުން ތަމްރީނު ކުރެވޭނެ ފަދަ ސްކޫލުތައް މިތަނުގައި ޤާއިމްވެގެންދާނެތީއެވެ.

މީގެ އިތުރުން، ލަގްޒަރީ ވިލާތަކާއި މެރީނާތަކުގެ އިތުރުން، މަލްޓި-ޕްލޭސް ހައިޕަރބަރިކް ޗޭމްބަރަކާއި، ތެރަޕީތަކުގެ އިތުރުން، އެތުލީޓުން ރިކަވަރީ އަދި ރިހެބިލިޓޭޝަން ފޯރުކޮށްދިނުމަށް ބައިނަލްއަޤުވާމީ ފެޑެރޭޝަންތަކާ ގުޅިގެން މަސައްކަތްކުރާ، އަދި އެންމެ ފަހުގެ ޒަމާނީ ވަސީލަތްތަކުން ފުރިހަމަވެފައިވާ ޞިއްޙީ މަރުކަޒުތައްވެސް މި ތަނުގައި ޤާއިމްވެގެންދާނެތީއެވެ. އަދި ޓެކްނޮލޮޖީގެ މާހިރުން މި މުޖުތަމަޢުގެ ތެރެއަށް އައުމުން، ފަތުރުވެރިކަމުގެ ބޭރުން އެތައް ވަޒީފާއެއް އުފެދިގެންދާނެތިއެވެ. މިއާއެކު، ޒުވާނުންނަށް އަމިއްލަ ވަޒަނުގައި ތިބެގެން ކުރިއަށް ދިއުމުގެ މަގު ތަނަވަސްވެގެންދާނެއެވެ.

ސަރުކާރުގެ އަމާޒަކީ 2028ވަނަ އަހަރުގެ ނިޔަލަށް މި ބިޔަ މަޝްރޫއު އެއްކޮށް ނިންމާލުމެވެ. އަދި އެ މުއްދަތަށް މި މަޝްރޫޢުގެ މަސައްކަތް އެއްކޮށް ނިންމާލެވުމާއެކު، ސުވަރުގެއެއް ފަދަ މި ޖަޒީރާތަކަކީ "ޗެކްއައުޓް" ވުމުން ނިމޭ ތަނެއްގެ ބަދަލުގައި، އިންސާނިއްޔަތާއި ދިރިއުޅުން ދެމިގެންދާ ވަޒަނަކަށް ވާނެއެވެ. ދުނިޔެއަށް މަރުޙަބާ ކިޔުމުގައި ދިވެހިންނަކީ ނަމޫނާއެކެވެ. މިހާރު މި އޮތީ އެއަށްވުރެ ބޮޑު ތަޞައްވުރެކެވެ. އެއީ މީހުން އައިސްފައިދާ މަންޒިލެއްގެ ބަދަލުގައި، މީހުން ނިސްބަތްވާ، ދާއިމަށް ދިރިއުޅޭ "ދިވެހިރާއްޖެ" އެއް ބިނާކުރުމެވެ. މިއީ ހަމަޔަޤީނުންވެސް މި ޖަޒީރާ ސުވަރުގޭގައި ދިރިއުޅުމުގެ އައު، އުންމީދީ ފެށުމެކެވެ.