ނިމުނު ހަފުތާ: ތަރައްޤީގެ ބޮޑެތި މަޝްރޫޢުތަކާއި، ޙިދުމަތްތަކަށް ހެޔޮބަދަލުތަކެއް

ނިމުނު ހަފުތާގައިވެސް އެކިއެކި ދާއިރާތަކުން ފާހަގަކޮށްލެވޭ ކަންތައްތަކެއް ހިނގައިދިޔައެވެ. އެގޮތުން (ޖަނަވަރީ 27) ދިވެހިރާއްޖޭގައި ޤާއިމުކުރާ ސްޕެޝަލް އިކޮނޮމިކް ޒޯން، އެސްއީޒެޑެއްގައި ހިންގިދާނެ އިޤްތިޞާދީ މަސައްކަތްތަކާއި، އެއިން ޒޯނެއްގައި ހިމެނޭ ޖުމްލަ އިންވެސްޓްމަންޓުގެ އެންމެ ކުޑަ މިންގަނޑު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަލުން ކަނޑައެޅުއްވީ ނިމުނު ހަފުތާގެ އަންގާރަ ދުވަހުއެވެ.

(ޖަނަވަރީ 24) ދިވެހި ވަޠަނީ ޚިދުމަތުގެ ތަމްރީނު ޕްރޮގްރާމުގެ ދެވަނަ ބުރަށް ހޮވުނު 350 ޒުވާނުން ތަމްރީން ހެދުމަށް ޅ.މާފިލާފުއްޓަށް ފުރާފައިވަނީ މިދިޔަ ހޮނިހިރު ދުވަހުއެވެ. ދިވެހި ވަޠަނީ ޚިދުމަތުގެ ތަމްރީނު ޕްރޮގްރާމަކީ ދިވެހި ޤައުމިއްޔަތަށް ލޯބި ކުރާ، ނަފްސާނީ ގޮތުން ދުޅަހެޔޮ، ދިވެހި ރައްޔިތެއް ބިނާކޮށް މަސައްކަތަށް އަހުލުވެރި، ހަރުދަނާ ޒުވާން ޖީލެއް ބިނާކުރުމަށް ކުރިއަށްގެންދާ ޕްރޮގްރާމެކެވެ.

(ޖަނަވަރީ 26) ނިމުނު ހަފުތާގައިވަނީ ކާރިސާތަކުން ލިބޭ ގެއްލުންތައް ރިޕޯޓުކުރުމާއި ތަފާސްހިސާބު ބެލެހެއްޓުން ޑިޖިޓަލްކޮށް، ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީން، 'ޑެމޭޖް އެސެސްމަންޓް އެންޑް ލޮސް އެނަލިސިސް' (ޑާލާ) ޕޯޓަލް އިފްތިތާހްކޮށްފައެވެ. ޔޫއެންޑީޕީގެ ފަންޑިންގް ވިންޑޯގެ ތެރެއިން، ޑެންމާކް ލަގްޒެމްބާގް އަދި ދެކުނު ކޮރެއާގެ އެހީތެރިކަމާއެކު ތަރައްޤީކޮށްފައިވާ ޑާލާ ޕޯޓަލް އެންޑީއެމްއޭގެ މަސައްކަތްތައް ޑިޖިޓަލައިޒްކޮށް ކާރިސާތަކުގެ މައުލޫމާތު އެއްކޮށް ބެލެހެއްޓުމަށް ތަރައްޤީކޮށްފައިވާ ޕޯޓަލްއެކެވެ.

(ޖަނަވަރީ 24) ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅާ އެއްގޮތަށް ކުރިއަށްއޮތް ރަމަޟާންމަހު ގޭބީސީތަކަށް ދޫކުރާ މަސްދަޅު ކޭސް ބަހަން ފަށައިފައިވަނީ ނިމުނު ހަފުތާގެ ހޮނިހިރު ދުވަހުއެވެ. ރޯދަމަހަށް ޚާއްޞަކޮށްގެން ގޭބިސީތަކަށް ބަހަނީ 48 ދަޅުގެ މަސްދަޅު ކޭހެވެ. މި އަހަރު 118673 މަސްދަޅު ކޭސް ރޯދަމަސް ފެށުމުގެ ކުރިންބަހައި ނިމޭނެކަމަށް ސަރުކާރު ވަނީ ވިދާޅުވެފައެވެ.

އިންތިޚާބާގުޅޭ ޚަބަރުތައް:

(ޖަނަވަރީ 28) އެޕްރީލްމަހުގެ 4 ވަނަ ދުވަހު ބޭއްވުމަށް ހަމަޖެހިފައިވާ ލޯކަލް ކައުންސިލް އަދި އަންހެނުންގެ ތަރައްޤީއަށް މަސައްކަތް ކުރާ ކޮމިޓީގެ އިންތިޚާބުގައި ވާދަކުރަން ފޯމު ހުށަހެޅުމަށް ކޮންމެ ދުވަހަކުވެސް ހުޅުވާލާ ވަގުތު 2 ގަޑިއިރަށް އިތުރު ކުރުމަށް އިލެކްޝަންސް ކޮމިޝަނުން ނިންމީ ނިމުނު ހަފުތާގެ ބުދަ ދުވަހުއެވެ. އަދި ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބުގެ، ވޯޓު ދިނުމުގެ ޙައްޤު ލިބިގެންވާ މީހުންގެ ރަޖިސްޓްރީއަށް ހުށަހެޅި ޝަކުވާތަކާ ގުޅިގެން ގެނައި ބަދަލުތަކަށް ޝަކުވާ ހުށަހެޅުމަށް އިލެކްޝަންސް ކޮމިޝަނުން ހުޅުވާލީވެސް ހަމަ އެދުވަހުއެވެ.

(ޖަނަވަރީ 29) ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއްކޮށް ބާއްވާގޮތަށް ޤާނޫނުއަސާސީއަށް ހުށަހަޅާފައިވާ އިސްލާހާ ގުޅޭގޮތުން ސިޔާސީ ޕާޓީތަކުގެ ޚިޔާލު ހޯދުމަށް ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީން ނިންމާފައިވަނީ ބުރާސްފަތި ދުވަހުއެވެ. ދެ އިންތިޚާބު އެކުގައި ބޭއްވުމަށް، ރައްޔިތުންގެ މަޖިލީހުގެ ދައުރުގެ މުއްދަތަށް ބަދަލު ގެނައުމުގެ ބިލެއް ރައްޔިތުންގެ މަޖިލީހަށް ހުށަހަޅާފައިވަނީ މިމަހުގެ 6 ވަނަ ދުވަހުއެވެ. އަދި މި ބިލު ސަރުކާރުގެ ފަރާތުން މަޖިލީހަށް ހުށަހެޅުއްވީ، އިނގުރައިދޫ ދާއިރާގެ މެންބަރު އިބްރާހީމް ފަލާޙެވެ.

އުމްރާނީ ތަރައްޤީ:

ނިމުނު ހަފުތާގައި އުމްރާނީ ތަރައްޤީގެ ދާއިރާއިން ފާހަގަކޮށްލެވޭ، މުހިއްމު މަޝްރޫޢުތަކެއް މަސައްކަތް ވަނީ ފަށާފައެވެ. (ޖަނަވަރީ 29) އެގޮތުން ނ. އަތޮޅުގައި ތަރައްޤީކުރާ 'އައިލާ ސަސްޓެއިނަބަލް ޓައުންޝިޕް' މަޝްރޫޢުގެ ބިންގާ އަޅާފައިވަނީ މިދިޔަ ބުރާސްފަތި ދުވަހުއެވެ. މި މަޝްރޫޢުގެ ބިންގާ އަޅުއްވާދެއްވީ އެކަމަށްޓަކައި ބޭއްވި ހާއްސަ ރަސްމިއްޔާތެއްގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއެވެ.

ނ. ވިހަފަރުގައި ތަރައްޤީކުރާ އެއާޕޯޓަށް ބޭނުންވާ ބިން ހިއްކުމުގެ މަސައްކަތް ފަށާފައިވަނީވެސް ނިމުނު ހަފުތާގެ ބުރާސްފަތި ދުވަހުއެވެ. ވިހަފަރުފަޅުގައި ބޭއްވި ޚާއްސަ ރަސްމިއްޔާތު ޝަރަފުވެރިކޮށްދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒެވެ. ވިހަފަރު ބިން ހިއްކުމުގެ މަސައްކަތް ސަރުކާރުން ކުރަނީ މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، އެމްއޭސީއެލްއާ ޙަވާލުކޮށްގެންނެވެ.

(ޖަނަވަރީ 25) ހުޅުމާލެ 3 ވަނަ ފިޔަވަހީގެ ދަށުން ހިއްކުމަށް ހަމަޖެހިފައިވާ 63 ހެކްޓަރުގެ ބިން ހިއްކައި ނިމިފައިވަނީ ނިމުނު ހަފުތާގެ އާދީއްތަ ދުވަހުއެވެ. މިމަޝްރޫޢުގެ މަސައްކަތް ބާރު ސްޕީޑުގައި ކުރިއަށް ގެންދިޔުމަށް ސަރުކާރުންވަނީ ބޮޑު ޑްރެޖަރެއްވެސް ގެނެސްފައެވެ.

(ޖަނަވަރީ 26) ބާޒާރުމަތީ މަގު ހެދުމުގެ މަޝްރޫޢުގެ ދަށުން، ޝީޓް ޕައިލްކުރުމުގެ މަސައްކަތް ނިމުނީ މިދިޔަ ހޯމަ ދުވަހުއެވެ. އެމްޓީސީސީން ވިދާޅުވީ، މާލޭ ބޮޑުތަކުރުފާނު މަގު ތަރައްޤީކުރުމުގެ ދެވަނަ ފިޔަވަހީގެ މަސައްކަތުގެ ތެރެއިން، 260 މީޓަރުގެ ސަރަހައްދެއް ޝީޓްޕައިލްކޮށްފައިވާކަމަށެވެ.

ޞިއްޙީ ދާއިރާ:

(ޖަނަވަރީ 27) ހދ. ކުޅުދުއްފުށީ ރީޖަނަލް ހޮސްޕިޓަލުގައި ޕްރައިވެޓް ރޫމް، އައިސޮލޭޓް ކުރެވޭގޮތަށް ފެސިލިޓީއެއް އެޅުމަށް އެއްބަސްވުމެއްގައި ސޮއިކޮށްފައިވަނީ ނިމުނު ހަފުތާގެ އަންގާރަ ދުވަހުއެވެ. މި މަޝްރޫޢަށް ސަރުކާރުން 53 މިލިޔަނަށްވުރެ ގިނަ ރުފިޔާ ޚަރަދު ކުރެއެވެ. މި މަޝްރޫޢަކީ، އޭޝިއަން އިންފްރާސްޓްރަކްޗަރ އިންވެސްޓްމަންޓް ބޭންކުން ފަންޑު ކޮށްގެން ކުރިއަށްގެންދާ މަޝްރޫޢެކެވެ.

(ޖަނަވަރީ 28) އައްޑޫ އިކުއެޓޯރިއަލް ހޮސްޕިޓަލުގެ ކެތު ލެބުގެ ޚިދުމަތް ފަށައިފައިވަނީ ނިމުނު ހަފުތާގެ ބުދަ ދުވަހުއެވެ. މިއީ، މާލެއިން ބޭރުގައި ޤާއިމްކުރި ފުރަތަމަ ކެތު ލެބެވެ. ކެތު ލެބުގެ ޚިދުމަތް ފަށާފައިވަނީ، އައްޑޫ އެކުއެޓޯރިއަލް ހޮސްޕިޓަލާއި އައިޖީއެމްއެޗާއި ގުޅިގެންނެވެ.

ނ. ވެލިދޫގައި ސީ އެމްބިއުލާންސްގެ ޚިދުމަތް ފަށައިފާވަނީވެސް ނިމުނު ހަފުތާގެ ބުދަ ދުވަހުއެވެ. ނ. އަތޮޅުގައި މީގެކުރިން ސީ އެމްބިއުލާންސް ޚިދުމަތް ދެނީ، ނ. މަނަދޫގައި އޮތް ސީ އެމްބިއުލާންސްއިންނެވެ.

ވިޔަފާރީގެ ދާއިރާ:

ވިޔަފާރީގެ ދާއިރާއިން ފާހަގަކޮށްލެވޭ ޚަބަރުތަކަށް ބަލާލާއިރު، (ޖަނަވަރީ 23) މިލަދުންމަޑުލު ދެކުނުބުރީގެ ވެލިދޫއަށް ޤައުމީ އެއަރލައިން މޯލްޑިވިއަންގެ ސީޕްލޭން ދަތުރުތައް ފެށި ޚަބަރު ފާހަގަކޮށްލެވެއެވެ. މި ދަތުރުތަށް ފެށުމަށް ވެލިދޫގައި ސީޕްލޭން ޕްލެޓްފޯމެއް ޤާއިމްކޮށް ވެލިދޫ ކައުންސިލް އިދާރާގައި ޗެކިން ކުރުމަށާއި ދަތުރުވެރިން މަޑުކޮށްލައިގެން ތިބުމަށް ހާއްސަ ލައުންޖެއް ވަނީ ތައްޔާރުކޮށްފައެވެ.

(ޖަނަވަރީ 29) ޑިވެލޮޕްމަންޓް ބޭންކް އޮފް މޯލްޑިވްސް ޑީބީއެމްއަށް، ބޭންކިން ވިޔަފާރި ފެށުމުގެ ހުއްދަ މޯލްޑިވްސް މަނިޓަރީ އޮތޯރިޓީ، އެމްއެމްއޭއިން ދޫކޮށްފައިވަނީ މިދިޔަ ބުރާސްފަތި ދުވަހުއެވެ. ޑިވެލޮޕްމަންޓް ބޭންކް އޮފް މޯލްޑިވްސް ލިމިޓެޑްގެ ނަމުގައި ދިވެހި ސަރުކާރުގެ ސައްތައިންސައްތަ ހިއްސާ އެކުލެވިގެންވާ، ސަރުކާރުގެ ކުންފުންޏެއް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އުފެއްދެވީ 16 މެއި 2024ގައެވެ

(ޖަނަވަރީ 26) ދިވެހިރާއްޖެއަށް އަންނަ އާގު ބޯޓުފަހަރަށް، 24 ގަޑިއިރު ޕޯޓް ލިމިޓް އޭރިޔާއަށް ވަދެވޭގޮތަށް ހުޅުވާލާފައިވަނީ ނިމުނު ހަފުތާގެ ހޯމަ ދުވަހުއެވެ. ރާއްޖެއަށް އަންނަ އުޅަނދުތައް ގިނަވަމުންދާތީ، ގައުމުގެ އިގްތިސާދަށް ފައިދާވާނެހެން ކޮންމެ ވަގުތެއްގައިވެސް ބަނދަރަށް ވަދެވޭނެ އިންތިޒާމުތައް ގާއިމުކުރުމަށް ސަރުކާރުން މިހާރު ވަނީ ކަނޑައަޅުއްވާފައެވެ.

(ޖަނަވަރީ 25) ބޭންކް އޮފް މޯލްޑިވްސްއިން ވިޔަފާރިތަކަށް ފަސޭހަކަމާއެކު އެއްފަހަރާ ގިނަ އެކައުންޓްތަކަކަށް ފައިސާ ފޮނުވޭ "ބަލްކް ޕޭމަންޓް" ޚިދުމަތް ވަނީ ތަޢާރަފްކޮށްފައެވެ. މި ޚިދުމަތް މެދުވެރިކޮށް މުސާރަ، އެލަވަންސް އަދި ޑިވިޑެންޑް ފަދަ ފައިސާ އެއްފަހަރާ ގިނަ އެކައުންޓްތަކަކަށް ފޮނުވޭނެއެވެ. (ޖަނަވަރީ 28) ބޭންކް އޮފް މޯލްޑިވްސް، ބީއެމްއެލްއިން ދޫކޮށްފައިވާ ކްރެޑިޓް ކާޑުތަކުން ރާއްޖޭން ބޭރުން ގަންނަ މުދަލާއި ޚިދުމަތަށް ފައިސާ ދެއްކޭ ލިމިޓް އިތުރުކޮށްފައިވާކަން ހާމަކުރީ ބުދަ ދުވަހުއެވެ. މި އައު ލިމިޓަށް ޢަމަލުކުރަން ފަށާނީ އަންނަ ފެބުރުއަރީ މަހުގެ 1ވަނަ ދުވަހުން ފެށިގެންނެވެ.

އެހެނިހެން ދާއިރާތައް:

(26 ޖަނަވަރީ) ސާފް ފުޓްސަލް މުބާރާތުގެ ޗެމްޕިއަންކަން ރާއްޖެއިން ހޯދީވެސް ނިމުނު ހަފުތާގެތެރޭގައެވެ. މުބާރާތުގައި އެންމެ ގިނަ ލަނޑު ޖެހީ ވެސް ރާއްޖެއިންނެވެ. އަދި އެންމެ ގިނަ ލަނޑު ޖެހި ކުޅުންތެރިއަކީ ރާއްޖޭގެ ކެޕްޓަން މުޙައްމަދު އިމްރާނެވެ. އޭނާ ވަނީ ޖުމްލަ ނުވަ ލަނޑު ޖަހާފައެވެ.

(27 ޖަނަވަރީ) މަސްދުވަހުގެ ޗުއްޓީއަކަށް ފަހު ދިރާސީ އައު އަހަރުގެ ކިޔެވުން ފަށާފައިވަނީ ނިމުނު ހަފުތާގެ އަންގާރަ ދުވަހުއެވެ. މި އަހަރުތަކަކަށް ފަހު ޖަނަވަރީ މަހު ދިރާސީ އަހަރުގެ ކިޔެވުން ފެށި އަހަރުކަން ފާހަގަކޮށްލެވެއެވެ. ދިރާސީ އަހަރުގެ ކިޔެވުން މިއަދު ފެށިއިރު ސަރުކާރުގެ 218 އެއްހާ ސްކޫލްގައި 77000އަށްވުރެ ގިނަ ދަރިވަރުން ތަޢުލީމް ހާސިލްކުރަމުން ދާނެއެވެ. މި ސަރުކާރުން ތަރައްޤީކުރި، "ޝަހީދު ޢަލީ" ސްކޫލް ރަސްމީކޮށް ހުޅުވައިފައިވަނީވެސް އެދުވަހުއެވެ. މި ސްކޫލް ރަސްމީކޮށް ހުޅުވައިދެއްވީ، ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުއެވެ. ހުޅުމާލެ ދެވަނަ ފިޔަވަހީގައި ތަރައްޤީކޮށްފައިވާ ޝަހީދު ޢަލީ ސްކޫލަކީ، އެންމެ ޒަމާނީ ފެންވަރަށް ތަރައްޤީކޮށްފައިވާ ސްކޫލްއެކެވެ.