އެސްޓީއޯގެ ބޯޑުގައި އާންމު ހިއްސާދާރުން ތަމްސީލްކުރާ ޑިރެކްޓަރުގެ މަޤާމަށް ހުޅުވާލައިފި

ސްޓޭޓް ޓްރޭޑިންގ އޯގަނައިޒޭޝަން، އެސްޓީއޯގެ ޑިރެކްޓަރުންގެ ބޯޑަށް އާންމު ހިއްސާދާރުންގެ ފަރާތުން އިންތިޚާބުކުރާ ޑިރެކްޓަރުގެ މަޤާމަށް ކުރިމަތިލުމުގެ ފުރުސަތު އެކުންފުނިން ހުޅުވާލައިފިއެވެ. މިއީ 2026-2027 ވަނަ އަހަރަށް ބޯޑަށް އިންތިޚާބުކުރާ މަޤާމެކެވެ.

އެސްޓީއޯއިން ނެރުނު އިޢުލާނެއްގައި ވިދާޅުވީ، މި މަޤާމަށް ކުރިމަތިލާ ފަރާތްތަކަކީ ކުންފުނީގެ ހިންގުމުގެ ދާއިރާއަށް ބޭނުންތެރި، ތަޖުރިބާކާރު އަދި ޤާބިލު ފަރާތްތަކަކަށް ވާންޖެހޭނެ ކަމަށެވެ. މިގޮތުން ކުރިމަތިލާ ފަރާތްތަކުގެ ކިބައިގައި ހުންނަންޖެހޭ މުހިންމު ޝަރުތުތަކެއް އެ ކުންފުނިން ވަނީ ކަނޑައަޅާފައެވެ.

މި މަޤާމަށް ކުރިމަތިލާ ފަރާތްތަކުގައި ހުންނަންޖެހޭ ޝަރުތުތަކަށް ބަލާއިރު، އެސްޓީއޯގެ ހިއްސާދާރަކަށް ވުމާއެކު، އުމުރުން 30 އަހަރާއި 70 އަހަރާ ދެމެދުގެ މީހަކަށް ވާންޖެހެއެވެ. ތައުލީމީ ގޮތުން ވިޔަފާރި ނުވަތަ އެއާ ގުޅޭ ދާއިރާއަކުން ފުރަތަމަ ޑިގްރީ ހާސިލުކޮށްފައިވުމާއެކު، މަދުވެގެން 5 އަހަރުގެ މަސައްކަތުގެ ތަޖުރިބާ ހުންނަންޖެހެއެވެ. ނުވަތަ އެކަށީގެންވާ ތަޖުރިބާ ހުރިނަމަ، ޑިޕްލޮމާއަކާއެކު 10 އަހަރުގެ ތަޖުރިބާ ހުންނަންޖެހޭނެ ކަމަށް އެސްޓީއޯއިން ވިދާޅުވެއެވެ.

މީގެ އިތުރުން، ބަނގުރޫޓުވެފައިވާ ފަރާތެއް ކަމަށް ޝަރުޢީ ކޯޓަކުން ކަނޑައަޅާފައިވާ މީހަކަށް ނުވުމާއި، ޖިނާއީ ބޮޑު ކުށެއް ސާބިތުވެފައިވާ މީހަކަށް ނުވުމަކީވެސް މި މަޤާމަށް ކުރިމަތިލާ ފަރާތްތަކުގެ ކިބައިގައި ހުންނަންޖެހޭނެ ޝަރުތެއް ކަމަށް އެސްޓީއޯއިން ވިދާޅުވެއެވެ.

އެސްޓީއޯއިން ވިދާޅުވީ، މި މަޤާމަށް މީހުން ހޮވުމުގައި ކުންފުނީގެ "ނޮމިނޭޓިން އެންޑް ރިމިއުނަރޭޝަން ކޮމިޓީ" އިން ފަރާތްތައް އިންޓަވިއުކޮށް، ޤާބިލުކަން ވަޒަންކުރާނެއެވެ. އަދި ބޯޑު މެންބަރަކު ރަސްމީކޮށް އިންތިޚާބު ކުރެވޭނީ ކުންފުނީގެ އަހަރީ އާންމު ޖަލްސާގައެވެ.

މި މަޤާމަށް ކުރިމަތިލުމަށް އެދޭ ފޯމާއި ބޭނުންވާ ލިޔެކިޔުންތައް ހުށަހެޅުމުގެ ސުންގަޑިއަކީ އަންނަ މަހުގެ 12 ވަނަ ދުވަހެވެ. ފޯމު ހުށަހަޅަންޖެހޭނީ އެސްޓީއޯގެ ހެޑް އޮފީހަށް ނުވަތަ އީމެއިލް މެދުވެރިކޮށް ކަމަށް އެސްޓީއޯއިން ވިދާޅުވެއެވެ.