އެސްޓަން ވިލާގެ ފޯވާޑް ގުއެސާންޑް ކްރިސްޓަލް ޕެލަސްއަށް

އެސްޓަން ވިލާގެ ފޯވާޑް އެވަން ގުއެސާންޑް ލޯނު އެއްބަސްވުމެއްގެ ދަށުން މި ސީޒަނުގެ ނިޔަލަށް ކްރިސްޓަލް ޕެލަސްއަށް ބަދަލުވެއްޖެއެވެ.

ޕެލަސްއިން އޭނާގެ ސޮއިހޯދީ ދާއިމީކޮށް އެ ކުލަބަށް ބަދަލުވުމުގެ ފުރުސަތުވެސް އޭނާއަށް ދީގެންނެވެ. އައިވަރީ ކޯސްޓްގެ ފޯވާޑް އެސްޓަން ވިލާއާއި ގުޅުނީ މިދިޔަ ހޫނު މޫސުމުގައި 26 މިލިޔަން ޕައުންޑަށެވެ. އޭނާވަނީ އެކުލަބަށް 21 މެޗު ކުޅެދީ 2 ގޯލު ޖަހައިދީފައެވެ.

ކްރިސްޓަލް ޕެލަސް މިވަގުތު އޮތީ ޕްރިމިއާ ލީގުގެ 15 ވަނައިގައި ރެލިގޭޝަނުން ސަލާމަތްވެފައެވެ.

އިނގިރޭސި ޑިފެންޑަރ މާކް ގުއޭހީ މެންޗެސްޓަރ ސިޓީއަށް ވިއްކާލާފައިވާއިރު ފްރާންސްގެ ސްޓްރައިކާ ޖީން ފިޕިލޭ މަޓޭޓާ ވެސް ވަނީ ކުލަބު ދޫކޮށްދާން ބޭނުންވާކަމަށް ޕެލަސްއަށް އަންގާފައެވެ.

ގުއެސާންޑް ބުނީ މިއީ އޭނާ ވަރަށް ގިނަ ދުވަސްވަންދެން އުންމީދުކޮށްގެން ހުރި ކަމެއް ކަމަށެވެ. އަދި އައު އެކުވެރިންނާއެކު ކުޅެން މިހުރީ ވަރަށް އުފާވެފައި ކަމަށެވެ. 24 އަހަރުގެ ގުއެސާންޑް ވަނީ 19 ފަހަރު އޭނާގެ ގައުމު އައިވަރީ ކޯސްޓް ތަމްސީލު ކޮށްދީ ގައުމީ ޓީމަށް 3 ފަހަރަށް ގޯލު ޖަހައިދީފައެވެ. އެންމެ ފަހުން އޭނާ ގައުމީ ޓީމަށް ކުޅެފައިވަނީ އެފްރިކަން ކަޕް އޮފް ނޭޝަންސްގައެވެ.

ޕެލެސްއިން ގުއެސާންޑް ގެނެސްފައިވާއިރު އެކުލަބުން ބުނީ އޭނާއާއި މެދު އިތުބާރު އެބައޮތް ކަމަށާއި، އެއީ މޮޅު ކުޅުންތެރިއެއް ކަމަށެވެ. އަދި އޭނާ އައުމުން ޕްރިމިއާ ލީގާއި ޔޫރަޕްގައިވެސް ސީޒަނުގެ ދެވަނަ ހާފުގައި ކުލަބު އިތުރަށް ކުރިޔަށް ގެންދިއުމަށް އިތުރު ހިތްވަރެއް ލިބިގެންދާ ކަމަށް ޕެލަސްގެ ޗެއަރމަން ސްޓީވް ޕެރިޝް ވަނީ ބުނެފައެވެ.