ހިޔާ ޓަވަރުގެ އަލިފާނުގެ ހާދިސާ: 37 މީހަކަށް ވަގުތީ ބޯހިޔާވަހިކަން

ހުޅުމާލެ ދެވަނަ ފިޔަވަހީގެ ހިޔާ ފްލެޓުގެ 5 ވަނަ ޓަވަރުގައި ހިނގި އަލިފާނުގެ ހާދިސާއާ ގުޅިގެން ހާލުގައި ޖެހުނު 37 މީހަކަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން ވަގުތީ ބޯހިޔާވަހިކަން ފޯރުކޮށްދީފިއެވެ.

އެންޑީއެމްއޭއިން ވިދާޅުވީ މި ހާދިސާގެ ސަބަބުން އިމާރާތުގެ މައި ފާހާނާ ހޮޅިއަށް ބޮޑެތި ގެއްލުންތަކެއް ލިބިފައިވާ ކަމަށެވެ. މި ގެއްލުންތަކާ ގުޅިގެން އެ ޓަވަރުގެ ބައެއް އެޕާޓްމަންޓުތަކުގެ ފާހާނާ ބޭނުން ނުކުރެވޭ ދަރަޖައަށް ގޮސްފައިވާ ކަމަށް އިންސިޑެންޓް ކޮމާންޑަރު ވަނީ މައުލޫމާތު ދެއްވާފައެވެ. މިހާރު އެޗްޑީސީން ދަނީ ނަރުދަމާއަށް ލިބުނު ގެއްލުންތައް މަރާމާތު ކުރުމުގެ މަސައްކަތް ކުރަށްވަމުންނެވެ.

އެންޑީއެމްއޭއިން ވިދާޅުވީ ހިޔާ ޓަވަރު 5 ގައި ހިނގި އަލިފާނުގެ ހާދިސާއާއި ގުޅިގެން އެ ޓަވަރުގެ 7 އެޕާޓްމަންޓެއްގެ 37 ފަރާތަކަށް ވަގުތީ ބޯހިޔާވަހިކަން ފޯރުކޮށްދީފައިވާކަމަށެވެ.

ހިޔާ ޓަވަރު 5 ގައި ރޭގައި ހިނގާ ދިޔަ އަލިފާނުގެ ހާދިސާއާއި ގުޅިގެން އެ ޓަވަރުގެ 7 އެޕާޓްމަންޓެއްގެ 37 ފަރާތަކަށް މި އޮތޯރިޓީން ވަނީ ވަގުތީ ބޯހިޔާވަހިކަން ފޯރުކޮށްދީފަ. މި ހާދިސާއަށް ފަހު ނަރުދަމާއަށް ލިބުނު ގެއްލުން ދެނެގަނެ ގެއްލުންތައް މަރާމާތުކުރުމުގެ މަސައްކަތް… pic.twitter.com/AwloHXOvw7

— NDMA Maldives (@NDMAmv) January 31, 2026

މި ހާދިސާއާ ގުޅިގެން ލިބުނު ގެއްލުންތައް ދެނެގަނެ، މަރާމާތުގެ މަސައްކަތްތައް އަވަސް ކުރުމަށް ދަނީ ގުޅިގެން މަސައްކަތް ކުރަމުންނެވެ. މިމަސައްކަތުގައި ހަރަކާތްތެރިވަމުންދަނީ އެންޑީއެމްއޭ، އެމްއެންޑީއެފް، ފުލުހުން، އެޗްޑީސީ، އެމްޑަބްލިއުއެސްސީ އަދި ސްޓެލްކޯއިނެވެ. މީގެ އިތުރުން، މި ހާދިސާއާ ގުޅިގެން އިތުރަށް ބަލަން ޖެހޭ ކަންކަން އެޗްޑީސީއާއި ކަމާބެހޭ އިދާރާތަކުން ދަނީ ތަހުގީގު ކުރަމުންނެވެ.

ހިޔާ ޓަވަރު 5 ގައި އަލިފާނުގެ ހާދިސާ ހިނގާފައިވަނީ ރޭ 7 ޖަހާކަށްހާއިރެވެ. އެމްއެންޑީއެފް ހުޅުމާލެ ފަޔަރ ސްޓޭޝަނުން ވަނީ ވަގުތުން ހަރަކާތްތެރިވެ އަލިފާން ކޮންޓްރޯލް ކޮށްފައެވެ. މި ހާދިސާގައި އެއްވެސް މީހަކަށް ޖިސްމާނީ އަނިޔާއެއް ލިބިފައި ނުވެއެވެ.

އެންޑީއެމްއޭއިން ވަނީ މި ހާދިސާއާ ގުޅިގެން އެއްވެސް އެހީތެރިކަމެއް ބޭނުންވާ ނަމަ އެ އޮތޯރިޓީގެ އެމެޖެންސީ ހޮޓްލައިން 115 އަށް ގުޅުއްވުމަށް އިލްތިމާސްކުރައްވާފައެވެ