ޝާރުޖާ އޮންޓަޕްރިނިއަރޝިޕް ފެސްޓިވަލްގައި ރާއްޖޭން ބައިވެރިވެއްޖެ

ސަރަހައްދީ އެންމެ ބޮޑު އެއް ވިޔަފާރިއާބެހޭ ފެސްޓިވަލް، ޝާރުޖާ އޮންޓަޕްރިނިއަރޝިޕް ފެސްޓިވަލް 2026 ގައި ދިވެހިރާއްޖެއިން ބައިވެރިވެއްޖެއެވެ.

އެކުވެރި އަރަބި އިމާރާތުގައި ޝާރުޖާގައި، 31 ޖެނުއަރީން ފެބްރުއަރީ 1 އަށް ކުރިއަށްދާ މި ފެސްޓިވަލުގައި ދިވެހިރާއްޖެ ތަމްސީލްކުރާ ވަފުދުގައި އިސްކޮށް ޙަރަކާތްތެރިވަނީ ބިޒްނަސް ސެންޓަރ ކޯޕަރޭޝަން (ބީސީސީ) އިންނެވެ.

މި ފެސްޓިވަލްގައި، ރާއްޖޭގެ ޓެކްނޮލޮޖީ ދާއިރާގައި ފާހަގަކޮށްލެވޭ ތިން ވިޔަފާރިއެއް ދަނީ، ބީސީސީ މެދުވެރިކޮށް ބައިވެރިވަމުންނެވެ. އެއީ ޕައި ނެޓްވޯކްސް، ޖަވާބު އަދި އީޒެޕެވެ. މި ފެސްޓިވަލްގައި ބައިވެރިވުމުގެ މައިގަނޑު މަގްސަދަކީ ދިވެހި އީޖާދީ މަސައްކަތްތައް ސަރަހައްދީ ފެންވަރުގައި ދައްކާލުމާއި، އިސްތިރާތީޖީ ގުޅުންތައް ގާއިމުކުރުން ކަމަށް ބީސީސީން ވިދާޅުވެއެވެ.

ބީސީސީން ވިދާޅުވީ ރާއްޖޭގެ ކުދި އަދި މެދު ފަންތީގެ ވިޔަފާރިތަކަށް ބައިނަލްއަގުވާމީ މާކެޓްތަކުން ފުރުސަތު ހޯދައިދިނުމަކީވެސް މި ފެސްޓިވަލްގައި ބައިވެރިވުގެ މުހިންމު ބޭނުމެއް ކަމަށެވެ. މި ފެސްޓިވަލްގެ ތެރެއިން ކުރިއަށްދާ އެގްޒިބިޝަންތަކާއި ނެޓްވޯކިންގް ސެޝަންތަކުގެ އެހީގައި، ޓެކްނޮލޮޖީގެ ދާއިރާއިން އެއްބާރުލުން ދިނުމާއި އިންވެސްޓްމަންޓްތައް ހޯދުމުގެ ފުރުސަތުތައް ދިވެހި ވިޔަފާރިތަކަށް ފަހިވެގެންދާނެ ކަމަށް އެ ކޯޕަރޭޝަނުން ވިދާޅުވެއެވެ.

މި ފެސްޓިވަލަކީ މެދުއިރުމައްޗާއި އެ ސަރަހައްދުގެ ގައުމުތަކުގެ ސްޓާޓްއަޕްތަކާއި، އީޖާދީ މަސައްކަތްތަކާއި، އަދި އެކި ގައުމުތަކުގެ މެދުގައި ގުޅުން ބަދަހިކުރުމަށް ބާއްވާ އެންމެ ފާހަގަކޮށްލެވޭ އެއް ހަރަކާތެވެ. މި ހަރަކާތުގައި އިންވެސްޓަރުންނާއި، ސިޔާސަތު އެކުލަވާލާ ފަރާތްތަކުގެ އިތުރުން ވިޔަފާރީގެ ދާއިރާ ކުރިއަރުވާ ފަރާތްތަކުން ބައިވެރިވެއެވެ.

ބީސީސީން މި ފެސްޓިވަލްގައި ބައިވެރިވެފައިވަނީ ދިވެހި ވިޔަފާރިތައް ކުރިއެރުވުމަށާއި، ޕްރައިވެޓް ސެކްޓަރގެ ވާދަވެރިކަން އިތުރުކުރުމަށް އެ ކޯޕަރޭޝަނުން ކުރަމުންދާ މަސައްކަތުގެ ދަށުންނެވެ. މިކަމުގެ ސަބަބުން ދިވެހި ވިޔަފާރިތައް ބައިނަލްއަގުވާމީ އީޖާދީ ވިއުގަތަކާ ގުޅުވައިދިނުމަށް ބޮޑު އެހީއަކަށް ވެގެންދާނެ ކަމަށް ބީސީސީން ވިދާޅުވިއެވެ.