ވިކްޓްރީން އައު ކޯޗާއެކު ފަރިތަކުރުންތައް ފަށައިފި

ރާއްޖޭގެ ތަޖުރިބާކާރު ކޯޗު އަލީ ސިޔާޒް (މޯހަން) ގެ އިރުޝާދުގެ ދަށުން ވިކްޓްރީ ސްޕޯޓްސް ކުލަބުގެ ފަރިތަކުރުންތައް ފަށައިފިއެވެ.

އެ ކުލަބުގެ ހެޑްކޯޗުގެ މަގާމަށް ޝިޔާޒް ހަމަޖެއްސީ 28 ފެބުރުއަރީގައެވެ. އޭނާގެ އިރުޝާދުގެ ދަށުން ބޭއްވި ފުރަތަމަ ފަރިތަކުރުންތައް ބޭއްވީ ރޭ މާފަންނު ޓާފް ދަނޑުގައެވެ.

ވިކްޓްރީން ޝިޔާޒްގެ އިރުޝާދުގެ ދަށުން އެންމެ ފުރަތަމަ ނިކުންނާނީ އެފްއޭ ކަޕަށެވެ. އެ މުބާރާތް އަންނަ އޭޕްރީލުމަހުގެ ކުރީކޮޅަށް ތާވަލުކޮށްފައިވާއިރު ރެއިން ފެށިގެން ވިކްޓްރީން ފަރިތަކުރުންތައް ފަށާފައިވަނީ އެފްއޭކަޕުގައި ރަނގަޅު ހިސާބަކަށް ކުލަބު ގެންދިއުމުގެ މަގްސަދުގައެވެ.

ފަރިތަކުރުންތަކުގައި ގިނަ އަދަދެއްގެ ކުޅުންތެރިން ބައިވެރިވެފައިވާއިރު ކޯޗް ޝިޔާޒާއެކު އެސިސްޓެންޓް ކޯޗެއްގެ ދައުރު އަދާކުރާނީ އާދަމް އަބްދުލްލަތީފް (ލައްޗޭ) އެވެ.

ވިކްޓްރީއަކީ ރާއްޖޭގެ ފުޓުބޯޅައިގެ ރަން ޒަމާނުގައި އެންމެ ކާމިޔާބު އެއް ކުލަބެވެ. އޭރުގެ ވިކްޓްރީ އަލުން އަނބުރާ ހޯދުމަށް އެ ކުލަބުގެ މެނޭޖުމެންޓުން އަންނަނީ ގިނަ މަސައްކަތްތަކެއް ކުރަމުންނެވެ.

އެގޮތުން ރާއްޖޭގައި މިވަގުތު ތިބި އެންމެ ތަޖުރިބާކާރު ކޯޗުންގެ ތެރެއިން ނަތިޖާ ނެރެދެވޭފަދަ ކޯޗަކާއި ޓީމު ހަވާލުކުރުމާއި، ކުޅުންތެރިންގެ ފެންވަރު މަތިކުރުމަށް ކުލަބުން ފަހިކޮށްދޭން ޖެހޭ އެންމެހާ ކަންކަން އެ ކުލަބުން އަންނަނީ ކުރަމުންނެވެ.

ވިކްޓްރީއަށް ނިމިގެން ދިޔަ ލީގުގައި ދިމާވި އެންމެ ބޮޑު މައްސަލައަކީ ޓީމުގެ ފަރިތަކުރުންތަކުގައި ހުރިހާ ކުޅުންތެރިންނަށް އެއްފަހަރާ ބައިވެރިނުވެވުމެވެ. ނަތީޖާއެއްގެ ގޮތުން މެޗުތައް އޮންނަ ދުވަހު ދަނޑުމަތީގައި ކުޅުންތެރިންގެ ގުޅުން ދަށްވެ ކޮންސަންޓްރޭޝަނާއި، މޮޅުވުމުގެ ރޫހު ދަށްވެގެން ދިޔަ ބައެއް މެޗުތަށް ފެނިގެން ދިޔައެވެ.

އެހެންނަމަވެސް ކުރިޔަށް އޮތް އެފްއޭކަޕްގައި ކުރިން ހެދުނު ގޯސްތައް ރަނގަޅުކޮށް ވާދަވެރި މެޗުތަކެއް ކުޅެ ރަނގަޅު ނަތީޖާއަކާއި ހަމައަށް ކުލަބު ގެންދިއުމަށް ވިކްޓްރީގެ މެނޭޖުމެންޓުން ކުޅުންތެރިންނާއި ކޯޗިން ސްޓާފުންނަށް އެއްބާރުލުންދޭނެ ކަމަށް އެ ކުލަބުން ބުނެއެވެ.

އަންނަ ސީޒަނުގެ ނިޔަލަށް ވިކްޓްރީއާއި ހަވާލުވި ކޯޗު، ޝިޔާޒު ބުނެފައިވަނީ އޭނާގެ ގާބިލުކަން ހުރި މިންވަރަކުން އެކުލަބުގެ ހަޤީޤީ މަގާމު ހޯދައިދޭން ކުރެވެން ހުރި ހުރިހާ މަސައްކަތެއް ކުރާނެ ކަމަށެވެ. އޭނާ ބުނީ ވިކްޓްރީގެ މަގާމަކީ ތަށި ކަމަށާއި، އޭނާ ކުލަބާ ހަވާލުވުމަށްފަހު ކުރިޔަށް އޮތް އެފްއޭ ކަޕުން ފެށިގެން އަންނަ ސީޒަނުގެ ހުރިހާ މުބާރާތެއްގައި ވިކްޓްރީއަށް ކާމިޔާބު ހޯދައިދޭން ކުރެވެން ހުރި ހުރިހާ މަސައްކަތެއް ކުރާނެ ކަމަށެވެ.

ޝިޔާޒް އެންމެ ފަހުން މަސައްކަތް ކުރީ ރާއްޖޭގެ ޤައުމީ ޓީމުގެ ހެޑްކޯޗުގެ މަގާމުގައެވެ. އަދި މިސީޒަން ފެށީ ކްލަބް އީގަލްސްގެ ހެޑް ކޯޗުގެ މަގާމްގައި ހުރެގެންނެވެ.