މުޅި ކުޅިވަރު ކޮމިއުނިޓީ ގުޅުވާލާ، މީސް ޕޯޓަލް ރީބްރޭންޑް ކުރަނީ

މިއަދާ ޖެހެންދެން ވެސް ހަމައެކަނި ކުލަބު ޖަމިއްޔާތައް ރަޖިސްޓްރީ ކުރެވޭ ގޮތަށް އޮތް "މީސް ޕޯޓަލް" ރިބްރޭންޑްކޮށް، އެއް މަންސައެއްގެ ތެރެއިން ކުޅިވަރާ ގުޅުންހުރި ރަސްމީ ގިނަ ކަންތައްތަކެއް ކުރެވޭ ގޮތަށް އަޕްގްރޭޑް ކުރުމުގެ މަސައްކަތް ނިންމާލައިފިއެވެ.

މިކަން ހާމަކުރެއްވީ ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި، ކުޅިވަރާއި ހަށިހެޔޮކަމާ ބެހޭ ވަޒީރު އަބްދުﷲ ރާފިއު އެވެ.

ވަޒީރު ވިދާޅުވީ، ކޮމިޝަނަރ އޮފް ސްޕޯޓްސްއާއި ކުޅިވަރު އެސޯސިއޭޝަންތަކާއި ކުލަބު ޖަމިއްޔާތަކެއް މުއާސަލާތުކޮށް، އެކިއެކި ރަސްމީ ލިޔެކިޔުންތައް ބަދަލުކުރެވޭނެ ގުޅިލާމެހިފައިވާ ނިޒާމެއް ގާއިމްކުރުމަކީ ކުޅިވަރު ވުޒާރާއިން ކުރަމުން އައި މަސައްކަތެއް ކަމަށެވެ.

އެ މަސައްކަތުގެ ދަށުން "މީސް ޕޯޓަލް" މިހާރު އަޕްގްރޭޑް ކޮށް ނިންމާލާފައިވާއިރު ކުރިއަށް އޮތް ދެ ހަފްތާއެއްހައި ދުވަހުގެ ތެރޭގައި އެ ޕޯޓަލް ރީބްރޭންޑްކޮށް، ލޯންޗުކުރާނެކަން ވަޒީރު ހާމަކުރެއްވިއެވެ.

"

ކުޅިވަރު އެސޯސިއޭޝަން ތަކުގެ ބެލެނިވެރި ފަރާތަކީ ކޮމިޝަނަރ އޮފް ސްޕޯޓްސް ކަމަށް ވާތީވެ، ކޮމިޝަނަރ އޮފް ސްޕޯޓްސްއާއި އަދި އެސޯސިއޭޝަން ތަކާއި ކުލަބު ޖަމިއްޔާތައް ވެސް ހިމެނޭގޮތަށް، ކޮމިއުނިކޭޝަން، ދެކެވޭ ވާހަކަތައް ނޫނިއްޔާ ބަދަލުކުރެވޭ މައުލޫމާތުތައް ބަދަލުކުރެވޭނެ ރަނގަޅު ނިޒާމެއް ގާއިމްކުރުން. އެގޮތުން އަޅުގަނޑުމެން މިހާރު މިވަނީ އަޅުގަނޑުމެންގެ މިހާރު އޮތް ސޮފްޓްވެއަރ އިތުރަށް އަޕްގްރޭޑުކޮށް، އެހެން ޕްލެޓްފޯމަކަށް އަޅުގަނޑުމެންނަށް ބަދަލުކުރެވިފައި. އެ މަސައްކަތް މިހާރު މިވަނީ ނިމިފައި. އިރާދަކުރެއްވިއްޔާ ދެ ހަފްތާއެއްހައި ދުވަހުގެ ތެރޭގައި އެކަން އަޅުގަނޑުމެންނަށް ލޯންޗުކުރެވޭވަރު ވާނެ.

ކުޅިވަރާއި ހަށިހެޔޮކަމާ ބެހޭ ވަޒީރު އަބްދުﷲ ރާފިއު

ވަޒީރު ވިދާޅުވީ، މި ޕޯޓަލް ލޯންޗުކުރެވުމުން، މޯލްޑިވްސް 2.0 އާ އެއް ޕްލެޓްފޯމެއްގައި ކުޅިވަރު ކޮމިއުނިޓީ އިންޓަގްރޭޓް ކުރުމުގެ މަސައްކަތް ނިމި، ބޭނުންކުރެވެމުންދާނެ ކަމަށެވެ.

މިއީ ލިބޭ ބޮޑު ކުރިއެރުމެއްކަން ފާހަގަކުރައްވައި ވަޒީރު އިތުރަށް ވިދާޅުވީ، މި ބަދަލާއެކު ކުޅިވަރާ ގުޅުންހުރި މުހިންމު މުއާމަލާތްތައް ޑިޖިޓަލް ނިޒާމެއްގެ ތެރެއިން ކުރިއަށް ގެންދެވި، މުހިންމު ވާހަކަތަކާއި މައުލޫމާތާއި ލިޔެކިޔުންތައް އަރުޝީފު ކުރެވިގެންދާނެ ކަމަށެވެ.

އަދި މި ބަދަލާއެކު ކުލަބު ޖަމިއްޔާތަކާއި އެސޯސިއޭޝަންތަކަށް ވެސް ރަޖިސްޓްރޭޝަން ހުށަހެޅުމާއި ހިންގާ ގަވައިދު ހުށަހެޅުމާއި އަދި ގުޅުންހުރި އެހެން ކަންކަން ކުރުމުގެ އިތުރުން، ކުޅުންތެރިންނަށް ރިލީޒް ހޯދުމަށް ހުށަހެޅުމަށް ވެސް ފަސޭހަވެގެންދާނެކަން ކުޅިވަރާއި ހަށިހެޔޮކަމާ ބެހޭ ވަޒީރު ވިދާޅުވިއެވެ.

ޖުމްލަ ގޮތެއްގައި ކޮމިޝަނަރ އޮފް ސްޕޯޓްސްގެ އޮފީހުން ކުރަމުންދާ ހުރިހާ މަސައްކަތެއްހެން މި ޕޯޓަލްގެ ތެރެއަށް ލެވި، ޚިދުމަތް ހޯދޭނެކަމަށް ވަޒީރު ވިދާޅުވިއެވެ.

މި ހުރިހާ ޚިދުމަތެއް ވެސް "ވަންގަވް" ތެރެއިން، އަލަށް ލޯންޗުކުރެވޭ މީސް ޕޯޓަލްގެ ރީބްރޭންޑް ކުރެވިފައިވާ ޕޯޓަލް މެދުވެރިކޮށް ލިބިގެންދާނެެއެވެ.

ސަރުކާރުގެ ވިސްނުމަކީ އަދި އަމާޒަކީ ވެސް، ކުޅިވަރުގެ އެންމެހާ މުހިންމު ކަންތައްތަކެއް ވެސް، އެއް މަންސައެއްގެ ތެރެއިން، ފަސޭހަކަމާއެކު ރައްޔިތުންނަށް ލިބޭނެ މަގު ފަހިކޮށްދިނުންކަމަށް ވަޒީރު ވިދާޅުވިއެވެ.