އަޒީޒާއި ނިހާޒްގެ ހަނދާނުގައި އަގު ބޮޑު ބިލިއާޑް މުބާރާތެއް

މާލޭ ޕޫލް ބިލިއާޑް އެސޯސިއޭޝަން (އެމްޕީބީއޭ) އަށް ގިނަ ޚިދުމަތްތަކެއް ކޮށްދީފައިވާ ދެ މީހެއްގެ ހަނދާނުގައި "10 ބޯލް ޑަބަލްސް ޓޯނަމަންޓް" ގެ ނަމުގައި ބިލިއާޑް މުބާރާތެއް ފަށައިފިއެވެ.

އެއްވަނައަށް ދާޓީމަކަށް 1000 އެމެރިކާ ޑޮލަރު އަދި 2 ވަނައަށްދާ ޓީމަކަށް 600 ޑޮލަރު އަދި 3 ވަނައަށް ހޮވޭ ޓީމަށް 300 ޑޮލަރު ހުށަހަޅާފައިވާ މި މުބާރާތުގައި 4 އިން 8 ވަނައަށް ދާ ޓީމުތަކަށް ކޮންމެ ޓީމަކަށް 100 ޑޮލަރު ދިނުމަށް ވަނީ ހަމަޖެހިފައެވެ. މި އިނާމުތަކަކީ ހެޔޮއެދޭ ފަރާތްތަކުން ހަދިޔާކޮށްފައިވާ ފައިސާ ކަމަށް، ކޮމިއުނިޓީ ސްޕޯޓްސް ކުލަބުން ބުނެއެވެ.

މިއީ ކޮމިއުނިޓީ ސްޕޯޓްސް ކުލަބު (ސީއެސްސީ) އާއި އެމްޕީބީއޭއިން ގުޅިގެން ކުރިޔަށް ގެންދާ މުބާރާތެކެވެ. މި މުބާރާތް ޚާއްސަކޮށްފައިވަނީ، ޕޫލް ބިލިއާޑް ކޮމިއުނިޓީއަށް ގިނަ ޚިދުމަތްތަކެއް ކޮށްދެއްވާފައިވާ އެމްޕީބީއޭގެ ހިންގާ ކޮމިޓީގެ ކުރީގެ މެންބަރު، އަލްމަރްޙޫމް މުޙައްމަދު ނިހާޒް އަދި އެސޯސިއޭޝަނުގެ ކުރީގެ މެންބަރު އަލްމަރްޙޫމް އަބްދުލް އަޒީޒުގެ ހަނދާނުގައެވެ.

މަރްޙޫމް ނިހާޒަކީ އެމްޕީބީއޭގެ ކުރިއެރުމަށް ގިނަ ޚިދުމަތްތަކެއް ކޮށްދީފައިވާ މެންބަރެކެވެ. އަދި މަރްޙޫމް އަޒީޒަކީ އެސޯސިއޭޝަނުގެ މެންބަރެއްގެ ގޮތުންނާއި މިކުޅިވަރު ކުޅުންތެރިއެއްގެ ގޮތުން އެސޯސިއޭޝަނާއި ޕޫލް ބިލިއާޑް ކޮމިއުނިޓީއަށް ގިނަ އެހީތަކެއް ދިން މެންބަރެއް ކަމަށް އެމްޕީބީއޭއިން ބުނެއެވެ.

މި ދެ މީހުންވެސް ނިޔާވެފައިވަނީ ކެންސަރުބަލީގައެވެ. 10 ބޯލް ޑަބަލްސް ޓޯނަމަންޓްގެ ނަމުގައި ކުރިއަށްދާ ބިލިއާޑް މުބާރާތާއި ގުޅޭގޮތުން ޕީއެސްއެމް ނިއުސްއާއި މައުލޫމާތު ހިއްސާ ކުރަމުން އެސޯސިއޭޝަނުގެ ނައިބު ރައީސް އަހުމަދު މާހިދު ވިދާޅުވީ، މި މުބާރާތް ކުރިޔަށްދާ ދުވަސްތަކުގައި އެސޯސިއޭޝަނުގައި ޚާއްސަ ފަންޑު ފޮއްޓެއްވެސް ބަހައްޓާފައިވާނެ ކަމަށެވެ. އަދި އެފަންޑަށް ލިބޭ ފައިސާއިން މި ދެ މަރްހޫމުންގެ ނަމުގައި ދާއިމީ ގޮތެއްގައި ފައިދާ ހުރި ކަމަކަށް ސަދާގާތް ކުރުމަށް ނިންމާފައިވާކަމަށެވެ.

އަދި މިއީ އެ ދެ މަރްހޫމުންނަށް ޕޫލް ބިލިއާޑް ކޮމިއުނިޓީގެ ފަރާތުން ދާއިމީ ސަދަގާތެއް ގޮތުގައި ކޮށްދެވޭނެ ކަމެއް ބެލުމަށް މާތް މަގްސަދެއްގައި ބާއްވާ މުބާރާތެއް ކަމަށެވެ. އަދި ކުރިޔަށް އޮތްތަނުގައި ކޮންމެ އަހަރަކުވެސް ރަމަޟާން މަހު މި މުބާރާތް ބޭއްވުމަށް މަސައްކަތް ކުރާނެ ކަމަށެވެ.

"އެ ދެ ބޭފުޅުންނަށް ޕޫލް ބިލިއާޑް ކޮމިއުނިޓީގެ ފަރާތުން ދާއިމީ ސަދަގާތެއް ގޮތުގައި ކޮށްދެވޭނެ ކަމެއް ބެލުން. އެގޮތުން ފަންޑު ރެއިޒް ކުރުމަށްފަހު ލިބޭ ފައިސާގެ އަދަދަށް ބަލާފައި ފެންވަޅެއް ބަހައްޓަން ނުވަތަ މިސްކިތަކަށް ނޫނީ މިކަހަލަ ކޮންމެވެސް ގޮތަކަށް އެ ދެބޭފުޅުންނަށް ފައިދާ ވާނެ ގޮތަކަށް ދާއިމީ ސަދަގާތެއް ކުރުން އެއީ މި މުބާރާތުގެ މަގްސަދަކީ" މާހިދު ވިދާޅުވިއެވެ.

އަދި މީގެ އިތުރުން އެސޯސިއޭޝަނުގެ ވިސްނުމަކީ، ދާއިމީ ފަންޑެއް ހުޅުވުންކަމަށާއި، އަހަރުތެރޭގައި ކޮންމެ މީހަކަށްވެސް އެ ފަންޑަށް ފައިސާ ޖަމާކުރެވޭގޮތަށް ހަމަޖެއްސުން ކަމަށެވެ. އަދި އެ ފަންޑަށް ލިބޭ ފައިސާއިން އެސޯސިއޭޝަނުގެ މެންބަރުންނަށް ދިމާވާ ބޮޑެތި ކަންތައްތަކުގައި، ބޭނުން ޖެހިއްޖެ ހާލަތެއްގައި އެ ފަންޑުން އެހީތެރިކަން ފޯރުކޮށްދޭނެ ކަމަށެވެ.

ކޮމިއުނިޓީ ސްޕޯޓްސް ކުލަބުގެ މެންބަރު، ހަސަން މުހައްމަދު ބުނީ ސީއެސްސީއަށް މި މުބާރާތް އިންތޒިާމު ކުރުމުގެ ފުރުސަތެއް ލިބުނީތީ ޝުކުރު އަދާކުރާ ކަމަށާއި މުބާރާތް ފެށުމުގެ ރަސްމިއްޔާތުގައި މުބާރާތް ޚާއްސަކުރާ ދެ ފަރާތުގެ އާއިލާއިން ބައިވެރިވެފައިވާތީ ޝުކުރު އަދާކުރާކަމަށެވެ.

އަދި މަރްޙޫމް ނިހާޒާއި މަރްޙޫމް އަޒީޒުގެ ހަނދާނަށް ޚާއްސަ މި މުބާރާތް ކުރިޔަށްދާ ވަގުތު އެމްޕީބީއޭގެ މާލޭ ހޯލްގައި ބަހައްޓާފައިވާ ފަންޑުފޮއްޓަށް ވީހާވެސް ގިނަ ބަޔަކު ފައިސާ ހަދިޔާކުރުމަށް ހަސަން މުހައްމަދު ވަނީ އެދިފައެވެ. އަދި އޮންލައިންކޮށްވެސް މި ފަންޑަށް ފައިސާ ޖަމާކުރެވޭނެ އިންތިޒާމު ހަމަޖެހިފައިވާ ކަމަށް އޭނާ ބުނެފައިވެއެވެ.

އޭނާ ބުނީ ގާތްގަނޑަކަށް 6 ދުވަސްފަހުން އެ ފަންޑަށް ލިބޭ ފައިސާގެ އަދަދު ކަށަވަރުކުރުމަށްފަހު ހަދިޔާކުރުމުގެ ކަންކަން ހަމަޖައްސާނެ ކަމަށެވެ.

6 ދުވަހުގެ މުއްދަތަށް ކުރިޔަށްދާ މި މުބާރާތަކީ މޯލްޑިވްސް ޕޫލް ބިލިއާޑް އެސޯސިއޭޝަން (އެމްޕީބީއޭ) އިން، މާތް މަޤްސަދެއްގައި މިފަދަ ގޮތަކަށް ބާއްވާ ފުރަތަމަ މުބާރާތެވެ. މި މުބާރާތުގައި ގާތްގަނޑަކަށް 96 ކުޅުންތެރިން ބައިވެރިވެފައިވާއިރު ޖުމްލަ 48 ޓީމުން ވާދަކުރެއެވެ.

ނިހާޒް އާއި އަޒީޒުގެ ހަނދާނުގައި ބާއްވާ "10 ބޯލް ޑަބަލްސް ޓޯނަމަންޓް" ފެށުމުގެ ގޮތުން ވަނީ ނިހާޒް އާއި އަޒީޒުގެ ފުރާނައަށް ރަހްމަތް ލެއްވުން އެދި ޚާއްސަ ދުޢާއެއްވެސް ކޮށްފައެވެ.