ތައްޓަށް އަމާޒުކޮށް 20 އަހަރުން ދަށުގެ ފަރިތަކުރުންތައް ކުރިއަށް

މާޗް 23 ން އޭޕްރީލް 3އަށް ގަލޮޅު ބޯޅަދަނޑުގައި ބާއްވަން ހަމަޖެހިފައިވާ 20 އަަހަރުން ދަށުގެ ސާފް ޗެމްޕިއަންޝިޕަށް ތައްޔާރުވާ ޒުވާން ގައުމީ ޓީމުގެ ފަރިތަކުރުންތައް ވަރުގަދަކޮށްފިއެވެ.

ސީނިއާ ގައުމީ ޓީމަށް އަހަރުތަކެއް ކުރިން ކޯޗު ކޮށްދިން، ތަޖުރިބާކާރު ކޯޗު އަދި އެފްއޭއެމްގެ ޓެކްނިކަލް ޑައިރެކްޓަރ، އިސްތަވާން އުރުބާނީގެ އިރުޝާދުގެ ދަށުން ގައުމީ ޓީމުން ފަރިތަކުރަމުން އަންނަނީ ހެންވޭރު ބޯޅަ ދަނޑުގައެވެ.

މުބާރާތުގެ ކުރިން ފަރިތަކުރުންތަކަށް މަހެއްހާ ދުވަސް ލިބިފައިވާއިރު އެސިސްޓެންޓް ކޯޗު، އަޙްމަދު ޝާކިރު (ޝާކިއްޓެ) އާއި ގޯލްކީޕަރ ޓްރޭނަރ އިމްރާން މުހައްމަދާއި ޓީމުގެ ޓެކްނިކަލް އޮފިޝަލުން އަންނަނީ ޒުވާން ޓީމަށް މުބާރާތް ކާމިޔާބުކުރެވޭ މިންވަރަށް ޓީމު ތައްޔާރުކުރުމަށް ވަރަށް ބުރަކޮށް މަސައްކަތް ކުރަމުންނެވެ.

ޒުވާން ޓީމުން ރާއްޖޭގައި ފަރިތަކުރުންތައް ފެށީ 26 ފެބުރުއަރީގައެވެ. ރާއްޖޭގައި އުފެދުނު އެންމެ ހުނަރުވެރި ކުޅުންތެރިން ހިމެނޭ މިޓީމަކީ ވަރަށް އުންމީދީ ޓީމެއް ކަމަށް އެފްއޭއެމުން ބުނެފައިވާއިރު ކުޅުންތެރިންގެ ފެންވަރު މަތިކުރުމަށް ސިންގަޕޫރުގައިވެސް ތަމްރީނުތަކެއް ހަދާނެއެވެ.

އަދި މެޗު އެކްސްޕީރިއަންސް ހޯދުމުގެ ގޮތުން ސިންގަޕޫރުގެ 19 އަހަރުން ދަށުގެ ޤައުމީ ޓީމާއެކު އެކުވެރިކަމުގެ ދެ މެޗެއް ކުޅޭނެއެވެ.

ޒުވާން ސްކޮޑްގައި ހިމެނޭ ކުޅުންތެރިންގެ ތެރޭގައި މިދިޔަ އަހަރު އިންޑިއާގައި ބޭއްވި 17 އަހަރުން ދަށުގެ ސާފް ޗެމްޕިއަންޝިޕްގެ ފައިނަލްގައި ކުޅެފައިވާ ކުޅުންތެރިންނާއި މި ހިނގާ ފުޓުބޯޅަ ސީޒަނުގެ މުބާރާތްތަކުގައި އެކި ޓީމުތަކަށް ކުޅެފައިވާ ކުޅުންތެރިން ހިމެނެއެވެ.

ސަރުކާރުގެ އެހީތެރިކަމާއެކު ޒުވާން ޓީމު ސިންގަޕޫރު ކޭމްޕަށް ފުރުމަށް ހަމަޖެހިފައިވަނީ އަންނަ ހުކުރު ދުވަހެވެ.

ސިންގަޕޫރުގައި ރާއްޖެއިން ކޭމްޕް ކުރުމަށް ހަމަޖެހިފައިވާ މުއްދަތުގެތެރޭގައި އެޤައުމުގެ 19 އަހަރުން ދަށުގެ ޤައުމީ ޓީމާއެކު އެކުވެރިކަމުގެ 2 މެޗު ކުޅުމަށް ވަނީ ހަމަޖެހިފައެވެ.

އެގޮތުން ރާއްޖޭގެ 20 އަހަރުން ދަށުގެ ޓީމާއި ސިންގަޕޫރުގެ 19 އަހަރުން ދަށުގެ ޓީމު ބައްދަލުކުރާ އެކުވެރިކަމުގެ ފުރަތަމަ މެޗު އޮންނާނީ 8 މާޗްގައި، ޗޮއާ ޗު ކަންގ ސްޓޭޑިއަމްގައެވެ.

ދެވަނަ މެޗު އޮންނާނީ، 11 މާޗްގައި ބިޝާން ސްޓޭޑިއަމްގައެވެ. މި ދެމެޗަށްވެސް ޓިކެޓް ގަތުމަކާއި ނުލާ އާންމުންނަށް ހިލޭ މެޗުބަލަން ވަދެވޭގޮތަށް ސިންގަޕޫރުގެ ފުޓްބޯޅަ އެސޯސިއޭޝަނުން ވަނީ ހަމަޖައްސާފައެވެ.

20 އަހަރުން ދަށުގެ ސާފް ޗެމްޕިއަންޝިޕް ފުޓުބޯޅަ މުބާރާތުގައި މިއަހަރު ރާއްޖެ ހިމެނެނީ ގުރޫޕް އޭގައެވެ. މި ގުރޫޕުގައި ދެން ހިމެނެނީ ނޭޕާލް، ބޫޓާން އަދި ސްރީލަންކާއެވެ.

ގްރޫޕް ބީގައި ހިމެނެނީ ބަނގްލަދޭޝް، އިންޑިއާ އަދި ޕާކިސްތާނެވެ. މުބާރާތުގައި ރާއްޖެއިން އެންމެ ފުރަތަމަ ނިކުންނާނީ 23 މާޗް ވާ ހޯމަ ދުވަހުގެ ރޭ 20:30 ގައި ސްރީލަންކާއާއި ދެކޮޅަށެވެ.

ރާއްޖޭގެ ދެވަނަ މެޗުގައި 25 މާޗްގައި ޒުވާން ޓީމު ނިކުންނާނީ ބޫޓާނާއި ދެކޮޅަށެވެ. ތިން ވަނަ މެޗުގައި 27 މާޗްގައި ނިކުންނާނީ ނޭޕާލާއި ދެކޮޅަށެވެ. މުބާރާތުގެ ސެމީ ފައިނަލް އޮންނާނީ 1 އޭޕްރީލްގައެވެ. ފައިނަލް މެޗު އޮންނާނީ 3 އޭޕްރީލްގައެވެ.

ދެ އަހަރުގެ މެދުކެނޑުމަކަށްފަހު ރާއްޖެއިން ބައިވެރިވި ސާފްގެ 19 އަހަރުން ދަށުގެ މުބާރާތުގައި މިދިޔަ އަހަރު ރާއްޖެވަނީ ސެމީ ފައިނަލާއި ހަމައަށް ދަތުރުކޮށްފައެވެ. އިންޑިއާގައި އޮތް އެ މުބާރާތުގައި މޮޅު ކުޅުމެއް ކުޅުންތެރިން ދެއްކިިއިރު 19 އަހަރުން ދަށުގެ ސާފް ޗެމްޕިއަންޝިޕްގެ ސެމީގައި ރާއްޖެއިން ވަނީ ދެފަހަރު ވާދަކޮށްފައެވެ. އެއީ 2025 އަދި 2023 ވަނަ އަހަރެވެ. ރާއްޖެއިން މީގެ ކުރިން މި އުމުރުފުރާގެ ތިންވަނަ ވެސް ހޯދިއެވެ.

20 އަހަރުން ދަށުގެ ސާފް ޗެމްޕިއަންޝިޕް ރާއްޖޭން ހޯސްޓުކުރާއިރު ރާއްޖެއަށް ތަށި ހޯދައިދިނުމަށް ކުޅުންތެރިން ކުރާ މަސައްކަތަށް ހިތްވަރުދިނުމުގެ ގޮތުން ވީހާވެސް ގިނަ ދިވެހިން ގަލޮޅު ދަނޑަށް އައިސް ސަޕޯޓް ކޮށްދިނުމަށް އެފްއޭއެމުން ވަނީ އެދިފައެވެ.