ރަސޫލުބޭކަލުންގެ ޙަޔާތްޕުޅުން އެތައް ފިލާވަޅެއް ޢުމްރާވެރިންނަށް

މައްކާއަކީ މުސްލިމުންގެ މުހިއްމު އާސާރުތަކެއް ހުރި މުޤައްދަސް ރަށެކެވެ. އެހެންކަމުން އެތަންތަނަށް ޒިޔާރަތްކޮށް ރަސޫލު ބޭކަލުންގެ ޤުރުބާނީއާއި ދީން އަޅުގަނޑުމެނާ ހަމައަށް ގެނެސްދެއްވުމަށް އެބޭކަލުން އުފުއްލެވި ބުރަ ހިތަށް ގެނައުމަށް މުސްލިމުން މަސައްކަތް ކުރެއެެވެ. ޙައްޖު ކޯޕަރޭޝަންގެ ޙަވާލުގައި ރަމަޟާން މަހުގެ ފަހު 15ގެ ޢުމްރާއަށް އައި ފަރާތްތަކުން މިވަނީ މައްކާގައި ހުރި މުހިއްމު އާސާރުތައް ބައްލަވާލައްވާފައެވެ.

އެންމެ ފުރަތަމަ ޢުމްރާވެރިން ދިޔައީ، ކީރިތި ރަސޫލާ ޙިޖްރައަށް ވަޑައިގަތް ދަތުރުފުޅުގައި އަރާވަޑައިގަތް ޘައުރު ފަރުބަދައަށެވެ. މިދަތުރުގައި ރަސޫލުاللهގެފާނު الله އަށް ކުރެއްވި އިތުބާރަކީ، މިއަދު މުޅި އުއްމަތުން ފިލާވަޅު ލިބިގަންނާންޖެހޭކަމެކެވެ. الله އަށް އިތުބާރުކުރެއްވުމުން ރައްކާތެރިކުރެއްވުމަށް އެދުވަހު ފޮނުއްވި ލަޝްކަރު މިއަދުވެސް ވަޑައިގަންނަވާނެކަމުގެ ޔަޤީންކަން ހިތަށް ގެންނަންޖެހެއެވެ. އަބޫބަކުރުގެފާނުގެ ފަރާތްޕުޅުން ފެނިގެންދިޔަ އެކުވެރިކަމާއި، ދަތުރަށް ދުރާލާ ވެވަޑައިގަތް ތައްޔާރީއަކީވެސް އެތައް ފިލާވަޅެއް ލިބިދޭ ނަމޫނާއެކެވެ.

ޢުމްރާވެރިން ދެންދިޔައީ، ޢަރަފާތު ބިމަށެވެ. އެއީ ޙައްޖު ދުވަހު މުސްލިމުން ހޭދަކުރާ ބިމެވެ. އެބިމަކީ އެތައް ގޮތަކުން މުސްލިމުންނަށް ޚާއްސަވާ ބިމެކެވެ. ބުނެވޭގޮތުގައި އެއީ ސުވަރުގެއިން ނެރެލެއްވުމަށްފަހު، އާދަމްގެފާނާއި ޙައްވާގެފާނު ބިންމަތީގައި ފުރަތަމަ ފަހަރަށް ބައްދަކުވީ ބިމެވެ. އަދި އެއީ ރަސޫލުﷲގެފާނު ޙައްޖަތުލް ވަދާޢުގައި ކުރެއްވި އަސަރުގަދަ ދުޢާ ކުރެއްވުމަށް އަރާވަޑައިގަތީ ޢަރަފާތު ބިމުގައި ހުންނަ ޖަބަލުއް ރަޙްމާއަށެވެ.

މިއިން އެއްވެސް ޒިޔާރަތަކީ، ޢުމްރާގެ ރުކުންތަކުގެ ތެރޭގައި ހިމެނޭ ކަމެއް ނޫނެވެ. އެހެންނަމަވެސް އިސްލާމީ ތާރީޚުގައި މުހިއްމު ކަންތައްތަކެއް ހިނގާފައިވާ ތަންތަންކަމަށްވުމުން މައްކާއަށް އާދެވުމުން މިތަންތަނަށް ޒިޔާރަތްކޮށް ދީނީގޮތުން ހޭލުންތެރިކަން އިތުރުކުރުމަށް ޢުމްރާއަށްދާ ގްރޫޕްތަކުން މަސައްކަތްކުރެއެވެ.