ފޮރެސްޓް އިން ސިޓީ ހިފަހައްޓައިފި

އިނގިރޭސި ޕްރިމިއާ ލީގުގައި ރޭ ނޮޓިންހަމް ފޮރެސްޓް އާއި ދެކޮޅަށް މެންޗެސްޓަރ ސިޓީ ކުޅުނު މެޗު 2-2 ގެ ނަތީޖާއަކުން އެއްވަރުވެއްޖެ އެވެ.

މެންޗެސްޓަރ ސިޓީގެ އިއްތިހާދު ސްޓޭޑިއަމްގައި ކުޅުނު މި މެޗު އެއްވަރުވެފައިވާއިރު ތާވަލުގެ ކުރީގައި އޮތް އާސެނަލް އާއި ދެމެދުވާ ފަރަގު ކުޑަކުރުމަށް އެ ޓީމަށް ލިބުނު ފުރުސަތު ވަނީ ގެއްލިފަ އެވެ.

އާސެނަލް އަށްވުރެ އެއް މެޗު މަދުން ކުޅެގެން ސިޓީ އަށް ލިބިފައިވަނި 60 ޕޮއިންޓެވެ. އަދި މި މެޗު އެއްވަރުވުމާއިއެކު ނޮޓިންހަމް ފޮރެސްޓަށް ލިބިފައިވާ 28 ޕޮއިންޓާއެކު އެ ޓީމަށް ވަނީ ތާވަލުގެ 17 ވަނަ މަގާމް ލިބިފަ އެވެ.

މި މެޗުގެ 31 ވަނަ މިނިޓުގައި މެންޗެސްޓަރ ސިޓީގެ އެންޓޮއިން ސެމެންޔޯ ވަނީ ލަނޑެއް ޖަހާ އެ ޓީމަށް ކުރި ހޯދަދީފަ އެވެ. މިއީ އޭނާ މިދިޔަ ޖެނުއަރީ މަހު ސިޓީ އާއި ގުޅުނު ފަހުން އެ ކްލަބަށް ޖަހައިދިން 7 ވަނަ ލަނޑެވެ.

ނަމަވެސް ދެވަނަ ހާފުގެ ކުޅުން ފެށުނުތާ 11 ވަނަ މިނިޓުގައި ނޮޓިންހަމް ފޮރެސްޓްގެ މޯގަން ގިބްސް ވައިޓް ވަނީ ލަނޑެއް ޖަހާ މެޗުގެ ނަތީޖާ އެއްވަރުކޮށްފަ އެވެ.

މެންޗެސްޓަރ ސިޓީ އިން މި މެޗުގައި ދެވަނަ ފަހަރަށް ކުރި ހޯދާފައިވަނީ މެޗުގެ 62 ވަނަ މިނިޓުގައި ރޮޑްރީ ކާމިޔާބުކޮށްދިން ލަނޑުންނެވެ.

ސިޓީ އިން ދެވަނަ ފަހަރަށް ކުރި ހޯދިތާ 14 މިނިޓު ފަހުން ނޮޓިންހަމް ފޮރެސްޓްގެ އެލިއޮޓް އެންޑަސަން ވަނީ ލަނޑެއް ޖަހާ މެޗުގެ ނަތީޖާ 2-2 އަށް ބަދަލުކޮށްފަ އެވެ.