ސްޓެލްކޯގެ ކަސްޓަމަރ ސަރވިސް ޕޯޓަލް "ވަށަނި" އިފްތިތާޙްކޮށްފި

ސްޓެލްކޯއިން ރައްޔިތުންނަށް ފޯރުކޮށްދޭ ޚިދުމަތްތައް އެއް ޕްލެޓްފޯމަކުން ފޯރުކޮށްދެވޭނެހެން ފަރުމާކޮށްފައިވާ "ވަށަނި" ޕޯޓަލް އިފްތިތާހުކޮށްފިއެވެ.

ޒަމާނީ ފަސޭހަތަކާއެކު، ސްޓެލްކޯގެ ކަރަންޓާއި ގުޅުންހުރި ހުރިހާ ޚިދުމަތަކަށް އެދެވޭގޮތަށް ފަރުމާކޮށްފައިވާ މި ޕޯޓަލް އިފްތިތާހުކޮށްދެއްވީ އެކަމަށްޓަކާ ބޭއްވި ޚާއްސަ ރަސްމިއްޔާތުގައި ސްޓެލްކޯ ހިންގެވުމާއި ހަވާލުވެވަޑައިގެން ހުންނެވި، ޑެޕިއުޓީ މެނޭޖިންގ ޑިރެކްޓަރ ޑރ. އަލީ އަޒުވަރެވެ.

މި ރަސްމިއްޔާތުގައި ވާހަކަދައްވަމުން ޑރ. އަލީ އަޒުވަރު ވިދާޅުވީ "ވަށަނި"އަކީ ސްޓެލްކޯއިން ފޯރުކޮށްދޭ ޚިދުމަތްތައް ލުއިފަސޭހަކޮށް ހޯދުމާއި، ޚިދުމަތް ކުރިޔަށްދާގޮތް އަދާހަމަކޮށް އެއް މަންސައަކުން ވަށާޖެހޭ ނިޒާމެއްގެ ތެރެއިން ބޭނުން ކުރެވޭނެހެން ފަރުމާ ކޮށްފައިވާ ޕޯޓަލެއްކަމަށެވެ. އެގޮތުން މި ޕޯޓަލް މެދުވެރިކޮށް ބިލްތައް ބަލައި، ބިލަށް ފައިސާ ދައްކާ، އޭގެ އަޕްޑޭޓުތައް ފޯނުން ފަސޭހަކަމާއެކު ބަލާލެވޭނެކަމަށް ޑރ. އަޒުވަރު ވިދާޅުވިއެވެ. އަދި އައު ޚިދުމަތެއްގެ ގޮތުގައި އިންޖިނިއަރުންގެ ފާސް ބޭނުންވާ މަސައްކަތްތައް ޕޯޓަލް މެދުވެރިކޮށް ހޯދޭނެކަމުގައި އޭނާ ވިދާޅުވިއެވެ.

"އަޅުގަނޑު ޤަބޫލުކުރަނީ، އަޅުގަނޑުމެން މި ލޯންޗުކުރަން މިއުޅޭ ޚިދުމަތަކީ އާއްމުން ބަލައިގަންނާނެ، އާއްމުންނަށް އަޅުގަނޑުމެން މިހާރު ކުންފުނީގެ ފަރާތުން މި ފޯރުކޮށްދޭ ޚިދުމަތް މިހާރަށް ވުރެ ބޮޑަށް ފަސޭހެކަމާއެކު ލިބިގެންދާނެ ޚިދުމަތެއްކަމަށް." ސްޓޭލްކޯގެ ޑެޕިއުޓީ މެނޭޖިން ޑިރެކްޓަރ، ޑރ. އަލީ އަޒުވަރު ވިދާޅުވިއެވެ.

"ވަށަނި" ޕޯޓަލަށް ވަނުމަށް، ރަޖިސްޓަރީކުރުމަށްޓަކައި، އީފާސް ނުވަތަ ފޯނު ނަންބަރު ބޭނުންކުރެވޭނެއެވެ. އަދި އަމިއްލަ މީހެއް ނުވަތަ ވިޔަފާރިއެއްގެ ގޮތުގައި ރަޖިސްޓަރީވެވޭނެކަމަށް ސްޓެލްކޯއިން ވިދާޅުވިއެވެ. މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ "މޯލްޑިވްސް 2.0"ގެ ސިޔާސަތުގެ ދަށުން ޚިދުމަތްތައް ޓިޖިޑަލައިޒްކުރުމަށް ކުރެވުނު މުހިންމު މަސައްކަތެއްގެ ގޮތުގައި ސްޓެލްކޯއިން ފާހަގަކުރައްވައެވެ.

ރާއްޖެއާއި ރާއްޖެއިން ބޭރުންވެސް، ޕޯޓަލް މެދުވެރިކޮށް ކަރަންޓުގެ ޚިދުމަތްތަކަށް އެދުމާއި ފައިސާ ދެއްކޭނެއެވެ. އަދި ހުށަހަޅާފައިވާ އެޕްލިކޭޝަންތަކުގެ މައުލޫމާތާއި، ކުރިން ހޯދާފައިވާ ހިދުމަތްތަކުގެ ތަފްސީލުގެ އިތުރުން، ހިދުމަތްތަކުގެ މަރުހަލާތައް ކުރިއަށްދާގޮތުގެ އަދާހަމަ މައުލޫމާތު އެސްއެމްއެސް މެދުވެރިކޮށް ފޯނަށް ލިބޭނެއެވެ.