ދާރުލްއާސާރަށް ބަދަލު ގެނައުމުގެ މަސައްކަތްތަކެއް މިއަހަރު!

ޤައުމީ ދާރުލްއާސާރަށް ބަދަލު ގެނައުމުގެ މަސައްކަތްތަކެއް މިއަހަރުތެރޭ ކުރިއަށްގެންދިޔުމަށް ހަމަޖެހިފައިވާކަމަށް ދިވެހިބަހާއި ސަގާފަތާއި ތަރިކައާބެހޭ ވަޒީރު އާދަމް ނަޞީރު އިބްރާހީމް ވިދާޅުވެއްޖެއެވެ.

ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ދިވެހިބަހާއި ސަޤާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހީމް ވަނީ، އެ ވުޒާރާއިން މިއަހަރަށް ރާވާފައިވާ ބައެއް މަސައްކަތްތަކުގެ މަޢުލޫމާތު ހިއްސާކުރައްވާފައެވެ.

ނޫސްވެރިންގެ ބައްދަލުވުމެއްގައި ވަޒީރު އާދަމް ނަޞީރު ވިދާޅުވީ، މާލޭގައި ހުންނަ ޤައުމީ ދާރުލްއާސާރަކީ އެ ޒަމާނަށް ވަރަށް ރަނގަޅު ދާރުލްއާސާރެއްކަމަށެވެ. ނަމަވެސް، ދުނިޔޭގެ ދާރުލްއާސާރުތައް ތަރުތީބުކުރެވޭގޮތާއި، ޒަމާނީ ޓެކްނޮލޮޖީއާއެކު ޤައުމީ ދާރުލްއާސާރު ތަރައްޤީކުރަން ޖެހޭ ކަމަށެވެ.

ދާރުލްއާސާރަކީ އޭރު ޗައިނާގެ އެހީގައި ހަދާފައިވާ ތަނެއްކަން ފާހަގަކުރައްވާ ވަޒީީރު ވިދާޅުވީ، އެތަން އިތުރަށް މަރާމާތުކުރުމުގެ މަސައްކަތްކުރުމަށް ސަރުކާރުގެ ފަރާތުން ޗައިނާއާވެސް ވާހަކަދައްކަމުންދާކަމަށެވެ.

ވަޒީރު ވިދާޅުވީ، ދާރުލްއާސާރަށް ބަދަލުތައް ގެނެސް، އިތުރަށް ތަރައްޤީކުރުމުގެ މަސައްކަތް މިއަހަރުތެރޭ ކުރުމަށް ހަމަޖެހިފައިވާކަމަށެވެ.

"އޭގެއިތުރަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ޚާއްސަ އިރުޝާދުގެ ދަށުން މިއަހަރުތެރޭގަ ދާރުލްއާސާރު މި ދެންނެވި، މިހާރު މިހިރަ ދާރުލްއާސާރުގެ އެތެރެއަށް ބަދަލުތައް ގެނައުމުގެ މަސައްކަތްތަކެއް މިއަހަރުތެރޭގަ އަޅުގަނޑުމެން ކުރާނަން. އެކަން ޕްލޭންކުރެވިފަ ރޭވިފަ އެބައޮތް". ވަޒީރު ވިދާޅުވިއެވެ.

ވަޒީރު ވިދާޅުވީ، މާލޭގައި ތަރައްޤީކުރާ އިންޓަރެކްޓިވް މިއުޒިއަމްގެ މަސައްކަތްތައް ނިމިގެންދިއުމާއެކު، މިހާރު ހުރި ދާރުލްއާސާރުގެ އެތެރެއާއި، ފަންނީ ދާރުލްއާސާރާއެކު ތަފާތު އިންޤިލާބީ ބަދަލެއް ފެނިގެންދާނެކަމަށެވެ.

"އިންޓަރެކްޓިވް މިއުޒިއަމްގެ މަސައްކަތް ނިމިގެން އަންނައިރު ދާރުލްއާސާރުގެ އެތެރެއާއި މި ދަންނަވާ ފަންނީ ދާރުލްއާސާރާ މި ދެބައި ގުޅިގެން މުޅިން ތަފާތު އިންޤިލާބީ ބަދަލެއް އަނެއްކާވެސް ދާރުލްއާސާރުގެ ތެރެއިންވެސް ފެނިގެންދާނެ". ވަޒީރު ވިދާޅުވިއެވެ.

އިޤުތިސާދު ސިންތަފާތު ކުރުމާއި، ފަތުރުވެރިކަން ސިންދަފާތުކުރުމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ގެންގުޅުއްވާ ޚާއްސަ ސިޔާސަތުގެ ތެރެއިން ތަރިކައިގެ ފަތުރުވެރިކަން ކުރުމަށް އެ ވުޒާރާއިން އަންނަނީ ގިނަ މަސައްކަތްތަކެއް ކުރައްވަމުންނެވެ.