އެމެރިކާއިން އިރާނާއި އިޒްރޭލަށް ދެމުންދާ ގެންދާ ހަމަލާތަކުގެ ސަބަބުން ވޯލްޑް ކަޕް ޕްލޭއޯފްގައި ބައިވެރި ނުވެވިދާނެ ކަމަށް އިރާގު ފުޓްބޯޅަ އެސޯސިއޭޝަނުން ބުނެފި އެވެ.
ޖޫން މަހު އެމެރިކާގައި ބާއްވާ ވޯލްޑް ކަޕުގެ އެންމެ ފަހުގެ ޕްލޭއޯފްގެ ފައިނަލަށް އިރާގު ވަނީ ހޮވިފަ އެވެ. ބައްދަލު ކުރަން ޖެހޭނީ ބޮލީވިއާ އާއި ސުރިނާމް ބައްދަލުކޮށް މޮޅުވާ ޓީމަކާ އެވެ. ޕްލޭއޯފް ފައިނަލް ކުޅެން ހަމަޖައްސާފައިވަނީ މި މަހުގެ 31 ވަނަ ދުވަހު ވޯލްޑް ކަޕް ބާއްވާ އެއް ގައުމު ކަމަށްވާ މެކްސިކޯގަ އެވެ.
ނަމަވެސް އިރާގުގެ ގައުމީ ޓީމުން ނެރުނު ބަޔާނުގައި ބުނެފައިވަނީ ހަނަގުރާމައިގެ ސަބަބުން އިރާގުގާއި މެދުއިރުމަތީގެ ގިނަ ގައުމުތަކުގެ ވައިގެ ސަރަހައްދު މިހާރު ވަނީ ބަންދުކޮށްފައި ކަމަށާއި މިހެންގެ ދަތުރު ފަތުރު ކުރެވޭނެ ކަމުގެ އެއްވެސް ޔަގީން ކަމެއް ނެތް ކަމަށެވެ. އަދި އިރާގުގެ ގައުމީ ކޯޗު ގްރަހަމް އާނޮލްޑް ވެސް ވީ ޔޫއޭއީގައި ތާށިވެފައި ކަމަށެވެ.
"ފީފާ އާއި އޭއެފްސީ އަށް މިދަނީ އަހަރުމެންގެ ޓީމުގެ ހުރިހާ މައުލޫމާތެއް ދެމުން. ސަބަބަކީ ވައިގެ ސަރަހައްދު ބަންދު ވުމާއެކު ދަތުރު ފަތުރު ނުކުރެވުން. އަހަރުމެންގެ ގައުމީ ކޯޗު ގްރެހަމް ހުރީ ޔޫއޭއީގައި ތާށި ވެފައި. މީގެ އިތުރުން ގިނަ ގައުމުތަކުގެ އެމްބަސީތައް ބަންދު ކޮށްފައި ހުރުމާއެކު މެކްސިކޯ އަށް ދަތުރު ކުރުމުގައި ވިސާ ހޯދަން ވަނީ ދަތިވެފައި،" އިރާގުގެ ގައުމީ ޓީމުގެ ބަޔާނުގައިވެ އެވެ.
އިރާގުން ބުނީ އެ ގައުމުގެ ސަޕޯޓަރުންނަށް ގައުމީ ޓީމުގެ މައުލޫމާތުތައް އަބަދުވެސް ފޯރުކޮށްދޭނެ ކަމަށާއި ފީފާ އާއި އޭއެފްސީން ވެސް ނިންމާ ކޮންމެ ކަމެއްގެ މައުލޫމާތު ވެސް ލަސްނުކޮށް ފޯރުކޮށްދޭނެ ކަމަށެވެ.
އިރާގުން 1986ގެ ފަހުން މިހާތަނަށް ކުޅެފައިވަނީ އެންމެ ވޯލްޑް ކަޕެކެވެ. ނަމަވެސް މި ފަހަރުގެ މުބާރާތުގެ ޕްލޭއޯފް ކާމިޔާބު ކޮށް އޭޝިޔާއިން ވޯލްޑް ކަޕުގައި ކުޅޭނެ ނުވަ ގައުމު ކަމަށްވާޏީ އިރާގު ކަމަށް ވާނެ ކަމަށް ވަރަށް ބޮޑަށް ވަނީ ބެލެވިފަ އެވެ.